ໃນວັນທີ 9 ຕຸລາ 2015 ທີ່ຜ່ານມາ ມີຜູ້ໃຊ້ເຟສບຸກທ່ານໜຶ່ງຊື່ Valaphone Svn (ວະລາພອນ) ໄດ້ໂພສຂໍ້ຄວາມລົງໃນເຟສບຸກຂອງຕົນວ່າ ຖືກທ່ານໝໍໃນຄລີນິກແຫ່ງໜຶ່ງ ໃນເຂດບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນ ຮ້ອງຄ່າບໍລິການແພງເກີນໄປ. ໂດຍຜູ້ກ່ຽວໄດ້ເລົ່າດ້ວຍຂໍ້ຄວາມ ທີ່ຂ້ອນຂ້າງຜິດຫວັງກັບຈັນຍາບັນ ຂອງວິຊາຊີບຂອງແພດໝໍ ດັ່ງຂໍ້ຄວາມສຳຄັນຄື: “… ເຂົາຄົນນັ້ນ ເປັນບຸກຄົນທີ່ພວກເຮົາ ຍົກຍ້ອງ ຂຶ້ນຊື່ວ່ານັກຮົບເສື້ອຂາວ ທີ່ມີຄວາມບໍລິສຸດ ມີຄຸນນະທຳແລະຈະລິຍະທຳ. ແຕ່ຄົນ(ໝໍ)ຄົນນີ້ ເບື້ອງໜ໊າຖືເອກະສານສິດປະກອບການ ຄລີນິກ ເພື່ອກອບກູ້ເອົາຊີວິດຂອງຄົນເຮົາ ນັ້ນເປັນພຽງການໂຄສະນາດຶງດູດ ເອົາລູກຄ້າເຂົ້າຮ້ານ ເພື່ອປຸ້ນຊັບ ຫຼືສໍ້ໂກງຊັບ ຢ່າງບໍ່ເກັງກົວກົດໝາຍ ຈິ່ງເວົ້າໄດ້ວ່າ ດຣ ຄົນນີ້ ຂາດຈັນຍາບັນຂອງຄວາມເປັນໝໍ ຕົວຢ່າງ ວັນທີ 7 ຕຸລາ 2015 ທີ່ຜ່ານມາ ຄລີນິກບ່ອນນີ້ໄດ້ປຸ້ນຊັບຂ້າພະເຈົ້າໄປ ເປັນເງິນ 1,500,000 ກີບ ທັ້ງໆ ທີ່ວ່າຢາຂອງເພິ່ນມີມູນຄ່າພຽງ 179,000 ກີບ ແຕ່ຜູ້ກ່ຽວບີບໃຫ້ຈ່າຍເງິນທັງໝົດ 1,679,000 ກີບ… ”
ຂໍ້ຄວາມດັ່ງກ່າວຖືກສັງຄົມສົ່ງຕໍ່ ຢ່າງກວ້າງຂວາງ ແລະມີການວິພາກວິຈານ ຕ່າງໆນານາເຖິງບັນຫາດັ່ງກ່າວ ຢ່າງເຂັ້ມຂຸ້ນ ໂດຍສະເພາະຄ່າຢາຊະນິດໜຶ່ງ ທີ່ມີລາຄາສູງເຖິງ 1,480,000 ກີບນັ້ນ ແມ່ນແພງເກີນຄວາມເໝາະສົມ. ໃນຂະນະທີ່ບາງຄົນກໍໃຫ້ຄຳເຫັນວ່າ ຄລີນິກແມ່ນທຸລະກິດໜຶ່ງ ທີ່ມີຄ່າໃຊ້ຈ່າຍຫຼາຍຢ່າງ ເຊັ່ນ ຄ່າເຊົ່າສະຖານທີ່, ຄ່າຈ້າງພະນັກງານ ແລະທ່ານໝໍຊ່ຽວຊານ ດັ່ງນັ້ນ, ການເກັບຄ່າຢາແລະຄ່າບໍລິການ ຈຶ່ງແພງກວ່າໂຮງໝໍລັດຢູ່ແລ້ວ ແຕ່ກໍຄວນຢູ່ໃນເກນທີ່ພໍດ້າມພໍດີ.
ແນວໃດກໍຕາມ, ຂ່າວນີ້ກໍຍັງເປັນຂ່າວດ້ານດຽວ ເຊິ່ງທີມຂ່າວພວກເຮົາກຳລັງຕິດຕາມຂ່າວ ຈາກຝ່າຍເຈົ້າຂອງຄລີນິກດັ່ງກ່າວ ຢູ່ຕື່ມອີກ.
