ເພື່ອເປັນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສະຫະພັນຣັດເຊຍ ຄົບຮອບ 55 ປີ ທ່ານ ມີຄາອິນ ບາຣານນົບ ເອກອັກຄະລັດຖະທູດ ແຫ່ງ ສະຫະພັນຣັດເຊຍ ປະຈຳ ສປປ ລາວ ຈັດງານລ້ຽງອາຫານຄ່ຳຂຶ້ນໃນວັນທີ 7 ຕຸລາ 2015 ທີ່ສະຖານທູດຣັດເຊຍ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ແສງເພັດ ຮຸ່ງບຸນຍວງ ລັດຖະມົນຕີຊ່ວຍວ່າການກະຊວງການຕ່າງປະເທດ ໂດຍມີບັນດາລັດຖະມົນຕີ ບັນດາທູດ ຫົວໜ້າກົມ ບັນດາກະຊວງກ່ຽວຂ້ອງ ແລະ ພ້ອມດ້ວຍແຂກຖືກເຊີນ ເຂົ້າຮ່ວມ.
ໃນໂອກາດດັ່ງກ່າວ ທ່ານ ແສງເພັດ ຮຸ່ງບຸນຍວງ ແລະ ທ່ານ ມີຄາອິນ ບາຣານນົບ ໄດ້ຜັດປ່ຽນກັນຂຶ້ນປະກອບຄຳເຫັນ ເຊິ່ງທັງສອງຝ່າຍໄດ້ກ່າວເຖິງຜົນສຳເລັດ ແຫ່ງການພົວພັນຮ່ວມມືໃນໄລຍະ 55 ປີຜ່ານມາ ລະຫວ່າງສອງລັດຖະບານ ກໍ່ຄືປະຊາຊົນສອງຊາດ ລາວ-ຣັດເຊຍ.
ໃນໄລຍະໃໝ່ການພົວພັນຮ່ວມມືລະຫວ່າງສອງປະເທດ ແມ່ນມີບາດກ້າວຂະຫຍາຍຕົວຕໍ່ເນື່ອງ ດ້ານການເມືອງເຫັນວ່າດີ ສອງປະເທດມີຄວາມເຊື່ອໝັ້ນໄວ້ວາງໃຈ ແລະ ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ບົນພື້ນຖານການເປັນປະເທດຄູ່ຮ່ວມຍຸດທະສາດນຳກັນ ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ຈົນເຖິງລະດັບຕ່າງໆຢ່າງເປັນປົກກະຕິ ທາງພາກລັດ ແລະ ເອກະຊົນ ນອກນັ້ນ ການພົວພັນຂອງສອງປະເທດ ຍັງສືບຕໍ່ຂະຫຍາຍການຮ່ວມມືໃນຫຼາຍດ້ານນຳກັນ ເຊັ່ນ: ດ້ານເສດຖະກິດ ການຄ້າ ການລົງທຶນ ການທ່ອງທ່ຽວ ການທະຫານ ການສຶກສາ-ວັດທະນະທຳ ແລະ ດ້ານອື່ນໆ ເຊິ່ງເປັນການປະກອບສ່ວນທີ່ສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີແຕ່ຍາວນານ ມີຄວາມໝັ້ນຄົງ ປີ 2015 ເປັນປີແຫ່ງການສະເຫຼີມສະຫຼອງວັນ ສ້າງຕັ້ງສາຍພົວພັນການທູດ ລາວ-ຣັດເຊຍ ຄົບຮອບ 55 ປີ ແລະ ວັນສ້າງຕັ້ງສະມາຄົມມິດຕະພາບ ລາວ-ຣັດເຊຍ ຄົບຮອບ 50 ປີ.
ໂອກາດດຽວກັນ ທັງສອງຝ່າຍກໍ່ໄດ້ສະແດງຄວາມຫວັງທີ່ຈະສືບຕໍ່ເສີມສ້າງ ແລະ ຮັດແໜ້ນສາຍພົວພັນຮ່ວມມືທີ່ດີໃນປັດຈຸບັນ ລະຫວ່າງສອງປະເທດ ໃຫ້ເຕີບໃຫຍ່ຂະຫຍາຍຕົວໄປສູ່ບາດກ້າວອັນໃໝ່ໃນຕໍ່ໜ້າ ຍິ່ງເພີ່ມທະວີເຮັດໃຫ້ງານຄັ້ງນີ້ ເຕັມໄປດ້ວຍບັນຍາກາດແຫ່ງມິດຕະພາບອັນອົບອຸ່ນ.
ແຫລ່ງຂ່າວ:
