ຫາກເຈົ້າເຄີຍຝັນວ່າຈະໄດ້ໄປຢຽບອາວະກາດໂດຍບໍ່ຕ້ອງໄປເໜື່ອຍກັບການຝຶກຝົນສຳລັບນັກບິນອາວະກາດ ໃນໄວໆນີ້ ເຈົ້າອາດຈະໄດ້ມ່ວນຊື່ນໄປກັບບັນຍາກາດມະຫັດສະຈັນຄືກັບຢູ່ໃນອາວະກາດໂດຍບໍ່ຕ້ອງອອກໄປນອກໂລກ ເພາະໂຮງແຮມໃນເມືອງຊູລິກ ປະເທດສະວິດເຊີລ໌ແລນຫາກໍ່ເປີດຕົວຫ້ອງພັກຊຸດໃໝ່ ຊຶ່ງມີອຸປະກອນຕ່າງໆ ທີ່ຈຳເປັນສຳລັບການຂື້ນໄປອາວະກາດ ຈົນເບິ່ງຄືກັບວ່າຢູ່ໃນສະຖານີອາວະກາດຂອງແທ້ແລ້ວ
ເນື່ອງດ້ວຍຮູບເງົາ “Martian” ຂອງ Ridley Scott ທີ່ກຳລັງສາຍຢູ່ໃນໂຮງໜັງ ແລະ ເປັນທີ່ກ່າວເຖິງໃນຂະນະນີ້ ອາດເຮັດໃຫ້ຜູ້ຄົນສົນໃຈທີ່ຈະອອກໄປອາວະກາດ ດັ່ງນັ້ນຫ້ອງພັກອາວະກາດແຫ່ງໂຮງແຮມ “Grand Kameha” ຈຶ່ງອາດຕອບສະໜອງຄວາມຕ້ອງການຂອງທຸກຄົນ ດ້ວຍການຕິດຕັ້ງຕຽງໄຮ້ແຮງໂນ້ມຖ່ວງ ເຮັດໃຫ້ເຈົ້າຮູ້ສຶກຄືກັບລອຍຈາກພື້ນດິນ ແລະ ຫ້ອງອົບໄອນ້ຳທີ່ເຮັດໃຫ້ຮູ້ສຶກຄືກັບກຳລັງອາບນ້ຳຢູ່ໃນຍານອາວະກາດຂອງແທ້
ສິນລະປິນຜູ້ສ້າງສັນອານາເຂດແຫ່ງອາວະກາດ
ຫ້ອງພັກຊຸດນີ້ຖືກອອກແບບຂຶ້ນໂດຍສິນລະປິນຊາວເຍຣະມັນຊື່ “Michael Najjar” ຊຶ່ງເມື່ອສາມປີກ່ອນ ພວກເຂົາໄດ້ຮັບການອົບຮົມກ່ຽວກັບການເດີນທາງໄປຍັງອາວະກາດສຳລັບພົນລະເຮືອນເມື່ອສາມປີກ່ອນຈາກອົງກອນ “Virgin Galactic” ແລະນັ້ນເຮັດໃຫ້ພວກເຂົາໄດ້ແຮງບັນດານໃຈມາສ້າງສັນງານຂອງພວກເຂົາ
ແຕ່ຢ່າງໃດກໍຕາມ ຫ້ອງພັກອາວະກາດນີ້ອາດບໍ່ເໝາະສຳລັບຄົົນທີ່ສະແຫວງຫາທີ່ພັກຜ່ອນໃນມື້ຢຸດ
“ມັນເປັນໄປບໍ່ໄດ້ເລີຍທີ່ຈະສ້າງຫ້ອງພັກແນວນີ້ໃຫ້ມັນສະດວກສະບາຍ ເພາະຂ້ອຍຕ້ອງການສ້າງໃຫ້ບ່ອນນີ້ສົມຈິງຄືກັບຢູ່ໃນສະຖານີອາວະກາດຫລາຍທີ່ສຸດ” Najjar ກ່າວ
ໂທລະທັດທີ່ເຊື່ອມຕໍ່ກັບ NASA
ນອກຈາກນີ້ຍັງມີການຕິດຕັ້ງວີດີໂອສອງພາບທີ່ຖືກຕິດຕັ້ງໃຫ້ຄືກັບພາບທີ່ສາຍໃຫ້ເຫັນພາບຄືກຳລັງໂຄຈອນຮອບໂລກ ມີການຕິດຕັ້ງສະປອດໄລ້ຊຶ່ງໄດ້ຮັບແຮງບັນດານໃຈມາຈາກຊິ້ນສ່ວນຂອງຈະຫລວດທີ່ກຳລັງທ່ອງອາວະກາດ ແລະມີຊັ້ນວາງຂອງທີ່ຄືກັບຖົງມືອາວະກາດໄວ້ສຳລັບວາງຂອງນ້ອຍໆ ຢ່າງໂທລະສັບຫລືກະເປົາເງິນ
ໃນຫ້ອງຍັງມີຫນັງສື ແລະ ຮູບເງົາກ່ຽວກັບການທ່ອງອາວະກາດ ແລະຍັງມີສຽງຕອບຮັບອັດຕະໄນມັດຊຶ່ງໄດ້ຮັບແຮງບັນດານໃຈມາຈາກຮູບເງົາ ” Dark Star” ຂອງ John Carpenter
“ພວກເຂົາຈະລືມໄປເລີຍວ່າ ກຳລັງຢູ່ໃນໂຮງແຮມ ພວກເຂົາຈະຮູ້ສຶກຄືກັບກຳລັງທ່ອງໄປໃນອາວະກາດອັນກວ້າງຂວາງ” Najjar ບອກ
ໃນຂະນະທີ່ໂຮງແຮມທົ່ວໄປຈະມີໂທລະທັດຫລາກຫລາຍຊ່ອງໃຫ້ເລືອກ ໃນຫ້ອງພັກອາວະກາດແຫ່ງນີ້ຈະມີຖ່າຍທອດຈາກສະຖານີອາວະກາດນານາຊາດ ແລະ ມີໂທລະທັດທີ່ເຊື່ອມຕໍ່ໂດຍກົງກັບຊ່ອງຂອງ NASA
ລາຄາ 2,000 ຫລຽນ
“ອາວະກາດນັ້ນຄືສຸດເຂດແດນຂອງມວນມະນຸດ” Najjar ກ່າວ “ທຸກມື້ນີ້ຍັງມີການພັດທະນາກ່ຽວກັບການທ່ອງທ່ຽວແລະສຳຫລວດອາວະກາດຢູ່ສະເໝີ ແລະມັນຈະສົ່ງຜົນອັນຍິ່ງໃຫຍ່ຕໍ່ມະນຸດເທິງໂລກ ຈັກມື້ໃນອະນາຄົດອາດຈະມີໂຮງແຮມໃນອາວະກາດແທ້ໆ ແຕ່ວ່າມື້ນີ້ ພວກເຮົາຈະຍົກມັນມາໄວ້ທີ່ໂຮງແຮມແຫ່ງນີ້ກ່ອນ”
ດ້ວຍລາຄາ 2,000 ຫລຽນຕໍ່ຄືນ ຄິດວ່າໃຜຈະເປັນກຸ່ມເປົ້າໝາຍຂອງຫ້ອງພັກແບບນີ້?
“ແຂກທີ່ຮັກໃນສິລະປະນັກສະສົມ ຫລືໃຜກໍຕາມທີ່ຢາກເກັບກ່ຽວປະສົບການຈາກທົ່ວໂລກ” Carsten K. Rath ຜູ້ບໍລິຫານໂຮມແຮມ Kameha ອະທິບາຍ
ນອກຈາກນີ້ລູກຄ້າຍັງສາມາດໃຊ້ລະບົບຈຳລອງການບິນຂອງແອລ໌ບັດ A320 ໃຫ້ຮ່າງກາຍລອຍໂຕ ແລະຝຶກການລອຍໄປມາໃນອາກາດ