ຂປລ. ໃນທ້າຍປີນີ້, ລັດຖະບານຈະພິຈາລະນາ ປັບຄ່າແຮງງານຂັ້ນຕ່ຳຂຶ້ນຕື່ມ ເພື່ອສ້າງແຮງດຶງດູດໃຈ ໃຫ້ແຮງງານລາວ ປະກອບ ອາຊີບຕາມຕຳແໜ່ງງານ ໃນຫົວໜ່ວຍທຸລະກິດ ໃນປະເທດໃຫ້ຫລາຍຂຶ້ນ, ແຕ່ການປັບຄ່າແຮງງານຄັ້ງນີ້ ຍັງຈະຕ້ອງໄດ້ພິຈາລະນາ ເຖິງເງື່ອນໄຂຕົວຈິງ ຂອງຜູ້ໃຊ້ແຮງງານ ແລະ ສີມືຂອງຜູ້ອອກແຮງງານ.
ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ສຳພາດ ເມື່ອບໍ່ດົນນີ້ວ່າ: ບັນຫາຄ່າແຮງງານ ເປັນປັດໄຈສຳຄັນຕໍ່ຜູ້ອອກແຮງງານ ກໍຄືກຳມະກອນລາວ ເຖິງວ່າ ໃນຕົ້ນເດືອນເມສາ ຜ່ານມານີ້ ລັດຖະບານໄດ້ປັບຄ່າແຮງງານຂັ້ນຕ່ຳສຸດ ໃນຂົງເຂດທຸລະກິດ ຈາກ 626.000 ກີບ ມາເປັນ 900.000 ກີບ ແລ້ວກໍຕາມ, ແຕ່ຍັງບໍ່ສາມາດສ້າງແຮງດຶງດູດໃຈ ໃຫ້ແຮງງານລາວ ມີ ຄວາມກະຕືລືລົ້ນ ໃນການຊອກວຽກເຮັດງານທຳເທົ່າທີ່ຄວນ, ບາງຈຳນວນຍັງໄປອອກແຮງງານ ຢູ່ປະເທດໃກ້ຄຽງ ເຮັດໃຫ້ເກີດປະກົດການຫຍໍ້ທໍ້ຕ່າງໆ, ສະນັ້ນ, ເພື່ອແກ້ໄຂບັນຫາດັ່ງກ່າວ ລັດຖະບານຈຶ່ງມີແຜນ ຈະປັບຄ່າແຮງງານຂັ້ນຕ່ຳຂຶ້ນຕື່ມ ໃນທ້າຍປີນີ້.
ທ່ານ ຫົວໜ້າກົມຄຸ້ມຄອງແຮງງານ ຍັງໃຫ້ຮູ້ຕື່ມວ່າ: ປັດຈຸບັນ ກະຊວງແຮງງານ ແລະ ສະຫວັດດີການສັງຄົມ ໄດ້ສົມທົບກັບ ພາກສ່ວນກ່ຽວຂ້ອງ ປະຕິບັດສັນຍາຮ່ວມມື ດ້ານການຈ້າງງານ ກັບປະເທດໃກ້ຄຽງ ໂດຍມີຄະນະຮັບຜິດ ຊອບຢ່າງລະອຽດ ເພື່ອປັບປຸງສະຖານະພາບ ແຮງງານລາວ ທີ່ ໄປອອກແຮງງານບໍ່ຖືກຕ້ອງ ຕາມລະບຽບກົດໝາຍ ຂອງປະເທດໃກ້ຄຽງ ໃຫ້ໄດ້ຮັບການປົກປ້ອງສິດ ຜົນປະໂຫຍດ ແລະ ບໍ່ຖືກກົດຂີ່ຂູດຮີດແຮງງານ.
ແຫລ່ງຂ່າວ:
