ສຳນັກຂ່າວຕ່າງປະເທດ ລາຍງານໃນວັນທີ 7 ຕຸລານີ້ວ່າ ມີປະຊາຊົນອົບພະຍົບຫລົບໜີຄວາມຮຸນແຮງຈາກສົງຄາມຢູ່ປະເທດເຢແມນແລ້ວ ຫລາຍກ່ວາ 114,000 ຄົນ ແລະ ຄາດວ່າຕົວເລກອາດເພີ່ມຂຶ້ນສູງຂຶ້ນຢ່າງໜ້ອຍ 200,000 ຄົນ ພາຍໃນທ້າຍປີ 2016 ມຸ່ງໜ້າສູ່ປະເທດເອທິໂອປີ, ໂຊມາລີ ແລະ ຊູດັງ ເນື່ອງຈາກສົງຄາມທີ່ເລີ່ມຂຶ້ນໃນເດືອນມີນາຜ່ານມາ ພາຍຫລັງພັນທະມິດຊາດອາຫລັບ ນຳໂດຍປະເທດອາຣັບບີ ຊາອຸດິດ ໄດ້ເລີ່ມປະຕິບັດການໂຈມຕີທາງອາກາດໃສ່ເປົ້າໝາຍຕ່າງໆ ຕໍ່ກຸ່ມຕິດອາວຸດຮູຕິ ພາຍໃນປະເທດເຢແມນ ເພື່ອປົກປ້ອງປະທານາທິບໍດີ ອັນດຸນ ຣັບບູ ມານຊູ ຮາດີ ແຫ່ງເຢແມນ ທີ່ຖືກກຸ່ມຕິດອາວຸດຍຶດອຳນາດການປົກຄອງ.