spot_img
Homeຂ່າວການສຶກສາຫລາຍ​ແຫ່ງສະຫລອງ​ວັນ​ຄູ​ແຫ່ງ​ຊາດ 7 ຕຸລາ ດ້ວຍບັນຍາກາດຟົດຟື້ນ

ຫລາຍ​ແຫ່ງສະຫລອງ​ວັນ​ຄູ​ແຫ່ງ​ຊາດ 7 ຕຸລາ ດ້ວຍບັນຍາກາດຟົດຟື້ນ

Published on

teacher's day

ວັນ​ທີ 6 ຕຸລາ​ນີ້, ໂຮງຮຽນຫລາຍ​ແຫ່ງ​ໃນ​ນະຄອນຫລວງ​ວຽງ​ຈັນ, ​ໄດ້ຈັດ​ພິທີ​ສະ​ເຫລີ​ມສະຫລອງ​ວັນ​ຄູ​ແຫ່ງ​ຊາດ 7 ຕຸລາ ຄົບຮອບ 21 ປີ (1994-2015) ດ້ວຍ​ບັນຍາກາດ​ຟົດ​​ຟື້ນ, ເພື່ອ​ຫວນ​ຄືນ​ມູນ​ເຊື້ອ​ຂອງ​ວັນ​ດັ່ງກ່າວ ​ແລະ ຈາລຶກຄຸນ​​ງາມ​ຄວາມ​ດີຂອງ​ຄູ-ອາຈານ ທີ່​ໄດ້​ເສຍ​ຫລະ ​ແລະ ອຸທິດ​​ເຫື່ອ​ແຮງ​ຕົນ​ ​​ເຂົ້າ​ໃນ​ການ​ສິດສອນ, ຖ່າຍ​ທອດ​ຄວາມ​ຮູ້, ​ຄວາມ​ສາມາດ​ໃຫ້​ແກ່​ນັກຮຽນ​​ໃນ​ແຕ່ລະ​ຮຸ້ນຢ່າງ​ບໍ່​ຮູ້​ອິດ​ຮູ້​ເມື່ອຍ, ຊຶ່ງ​​ໃນ​ນີ້ ຢູ່​ໂຮງຮຽນ​ມັດທະຍົມ​ສົມບູນ ວຽງ​ຈັນ (ມ.ສ ວຽງ​ຈັນ), ​ກໍໄດ້​ຈັດ​ຕັ້ງ​ພິທີ​ດັ່ງກ່າ​ວຂຶ້ນ​, ​ໂດຍ​ມີ​ທ່ານ ບຸນ​ທ່ຽງ ສາຍ​ສຸວັນ ຫົວໜ້າ​ສຶກສາ​ນິ​ເທດ ພະ​ແນ​ກສຶກສາ​ທິການ ​ແລະ ກິລາ ນະຄອນຫລວງ​ວຽງຈັນ, ພ້ອມ​ດ້ວຍຄູ-ອາຈານ ແລະ ນັກຮຽນ​​ເຂົ້າ​ຮ່ວມ​ເປັນ​ຈຳນວນ​ຫລາຍ.

ຜູ້ອຳ​ນວຍ​ການ​​ໂຮງຮຽນ ມ.ສ ວຽງ​ຈັນ ​​ໄດ້ມີຄຳເຫັນ ໃນພິທີອັນມີຄວາມໝາຍສໍາຄັນດັ່ງກ່າວວ່າ: ມັນເປັນໂອກາດອັນດີໃຫ້ຄູ-ອາຈານ ແລະ ນັກຮຽນພວກເຮົາໄດ້ທົບ​ທວນ​​ຄືນ​ຄຸນງາມຄວາມດີ ​ແລະ ສະແດງຄວາມຮູ້​ບຸນຄຸນ​ຕໍ່​ຄູ-ອາຈານ​ທີ່​ໄດ້​ສິດສອນ​ສົ່ງຄວາມຮູ້ ຄວາມສາມາດໃຫ້ແກ່ຕົນເອງ ທັງເປັນການ​ເຊີດ​ຊູ​ກຽດ​ສັກ​ສີ​ຖານະ​ບົດບາດ​ຂອງ​ຄູ​ໃນ​ສັງຄົມ​ໃຫ້​ສູງ​ຂຶ້ນ ​ແລະ ຍົກ​ໃຫ້​ເຫັນ​ຜົນສຳ​ເລັດ​ຂອງ​ການ​ສຶກສາ​ຮ່ຳຮຽນ ​ແລະ ການ​ດຳລົງ​ຊີວິດ. ນອກ​ຈາກ​ນີ້ ຍັງ​ເປັນ​ໂອກາດ​ອັນ​ດີ​ໃຫ້ຄູ-ອາຈານ, ຜູ້​ປົກຄອງ​ນັກ ຮຽນ, ສິດ​ເກົ່າ, ອຳນາດ​ການ​ປົກຄອງ​ທ້ອງ​ຖິ່ນ ​ແລະ ຊຸມ​ຊົນ ​ໄດ້​ຮັບ​ຮູ້ສະພາບ​ຄວາ​ມ​ເປັນ​ຈິງ​ຂອງ​ໂຮງຮຽນ ​ແລະ ພ້ອມ​ກັນ​ປຶກສາ​ຫາລື​ພັດທະນາ​ໂຮງຮຽນ​ໃຫ້​ນັບ​ມື້​ກ້າວ​ນ້າ​ຂະຫຍາຍຕົວນັບທັງ​ດ້ານ​ພື້ນຖານ​ໂຄງ​ລ່າງ ກໍ​ຄື​ຄຸນ​ນະພາ​ບການ​ຮຽນ-ການ​ສອນ​ຂອງໂຮງຮຽນ ​ແລະ ​ເພື່ອ​ເຮັດ​ໃຫ້​ນ້ຳ​ໃຈວັນ​ຄູ​ແຫ່ງ​ຊາດ 7 ຕຸລາຍືນຍົງຄົງຕົວ ຢູ່ຕະຫລອດໄປດັ່ງກ່າວຄຳສຸພາສິດກ່າວໄວ້​ວ່າ: ການ​ສຶກສາ​ແມ່ນ​ພາລະກິດ​ຂອງ​ທົ່ວພັກ ທົ່ວ​ປວງ​ຊົນລາວຕະຫລອດໄປ.

ທ່ານອຳນວຍການ ມສ ວຽງຈັນ ໃຫ້ຮູ້ວ່າ: ຕະຫລອດ​ໄລຍະ​ຜ່ານ​ມາ ​ໂຮງຮຽນ ມ.ສ ວຽງ​ຈັນ ​ສາມາດສ້າງ​ນັກຮຽນ​ສຳ​ເລັດ​ການ​ຮຽນ​ລະດັບ​ຊັ້ນ​ມັດທະຍົມ​ ປາຍທັງໝົດ 41.000 ກວ່າ​ຄົນ. ພິເສດແມ່ນ​ສົກ​ປີຜ່ານມານີ້, ​ໂຮງຮຽນ​ດັ່ງກ່າວ​​ໄດ້​ຮັບ​ການ​ຮອງ​ຮັບ​ເປັນ​ໂຮງຮຽນ​ຕົວ​ແບບ​ຄຸນ​ນະພາ​ບຂອງ​ນະຄອນຫລວງ​ວຽງຈັນ, ນັກຮຽນ​ຊັ້ນ​ ມ4 ​ແລະ ມ7 ​ເສັງ​ໄດ້ 100% ​ໄດ້​ຮັບ​ໃບ​ປະ ກາດ​ແດງ ​ແລະ ​​​ເດັ່ນ​ຮອບດ້ານ, ພ້ອມ​ທັງສົ່ງ​ນັກຮຽນ​ເຂົ້າ​ຮ່ວມ​ແຂ່ງຂັນ​ນັກຮຽນ​ເກັ່ງ​ລະດັບ​ຊາດ ​ຍາດໄດ້​ອັນ​ດັບທີ 1, 2 ຫລາຍ​ວິຊາ ​ແລະ ​ໃນ​ສົກ​ປີ​ 2015-2016ນີ້, ຄູ-ອາຈານ ​ຈະໄດ້ສືບ​ຕໍ່​ກໍ່ສ້າງ​ນັກຮຽນ​ຕາມ 3 ລັກສະນະ ​ແລະ 5 ຫລັກ​ມູນ​ການ​ສຶກສາໃຫ້​ເຂັ້ມ​ງວດ, ພ້ອມ​ທັງ​ພັດທະນາ​ໂຮງຮຽນ​ໃຫ້​ສົມ​ເປັນ​​ໂຮງຮຽນ​ຕົວ​ແບບ​ຄຸນ​ນະພາ​ບ​ແທ້​ຈິງ.

ມື້ດຽວກັນໂຮງຮຽນ ມສ ໂພນທັນ, ເມືອສີສັດຕະນາກ ກໍໄດ້ຈັດ​ພິທີ​ສະ​ເຫຼີ​ມສະຫຼອງ​ວັນ​ຄູ​ແຫ່ງ​ຊາດ 7 ຕຸລາ​ຂື້ນ​ຢ່າງ​ຟົ​ດຟື້ນ,​ໂດຍ​ມີ​ຜູ້​ຕ່າງ​ໜ້າ​ຈາກ​ພະ​ແນ​ກ​ສຶກສາ​ທິການ ​ແລະ ກິລາ,ພ້ອມ​ດ້ວຍຄູ​ອາຈານ, ນັກຮຽນ ​ແລ ະພໍ່​ແມ່​ຜູ້​ປົກຄອງ​ເຂົ້າ​ຮ່ວມ​ເປັນ​ຈຳນວນ​ຫຼາຍ.

ທ່ານ ອ້ອມ​ເພັງ ບາ​ວວັນ​ຄຳ,ອຳນວຍ​ການ​ໂຮງຮຽນ​ດັ່ງກ່າວ​ກ່າວ​ໃນ​ພິທີ​ວ່າ: ​ເພື່ອ​ເປັນ​ການ​ຫວນ​ຄືນ​ມູນ​ເຊື້ອ​ວັນ​ຄູ​ແຫ່ງ​ຊາດ​ທີ່​ໝູນ​ວຽນມາ​ຄົບຮອບ 21 ປີ​,ກໍ​ຄືວັນ​ທີ 7 ຕຸລາ 1994 – ວັນ​ທີ 7 ຕຸລາ 2015 ,ດັ່ງ​ນັ້ນ​ທາງ​ໂຮງຮຽນ​ ມ ສ ​ໂພນ​ທັນ​ຈຶ່ງ​ໄດ້​ຈັດ​ພິທີ​ສະ​ເຫຼີ​ມສະຫຼອງ​ວັນ​ດັ່ງກ່າວ​ຂື້ນ​ເພື່ອ​ລະນຶກ​ເຖິງ​​ຜົນງານ ​ແລ ຄຸນງາມຄວາມດີຂອງ​ຄູ​ລາວ​ກໍ​ຄື​ຄູ​ໃນ​ໂຮງຮຽນ​ຂອງ​ຕົນ,ທີ່​ມີ​ຜົນງານ​ສ້າງ​ຊັບພະຍາກອນ​ມະນຸດ​ໃຫ້​ ຊາດ ​ແລະ ສັງຄົມ,ຊຶ່ງ​ໃນ​ພິທີ​ສະ​ເຫຼີ​ມສະຫຼອງ​​ໄດ້​ມີ​ຫຼາຍ​ກິດຈະ​ກິດ​ຄື: ການສະ​ແດງ​ສີລະ​ປະ​ຈາກ​ນ້ອງ​ນັກຮຽນ,ການ​ຫຼິນ​ເກນ ​ແລະ ອື່ນໆ.

ຜູ້ອຳນວຍການ​ກ່າວ​ວ່າ: ​ໃນ​ສົກ​ຜ່ານ​ມາ​ໂຮງຮຽນ​ຂອງ​ຕົນ​ຍາດໄດ້ຜົນສຳເລັດຫຼາຍ​ດ້ານ​​ຄື: ການ​ສອບ​​ເສັງ​​ເລືອນ​ຊັ້ນ ມ4 ບັນລຸ​ໄດ້ 97,45% ​ແລະ ມ7 ບັນລຸ​ໄດ້ 94,58%, ແລະ ​ເພື່ອ​ສືບ​ຕໍ່​ພັດທະນາ​ການ​ສຶກສາ​ໃນ​ສົກ​ປີ 2015-2016 ທາງ​ໂຮງ ຮຽນ​ໄດ້ວາງຄາດໝາຍໃຫ້​ແກ້​ໄຂ​ແນວ​ຄິດຊ້ຳ​ເຮື້ອ​ຂອງ​ວຽກ​ງານ​ການ​ສຶກສາ​ທີ່​ເຄີຍ​ມີ​ມາ​, ບຸກທະ ລຸ​ດ້ານ​ການ​ສ້າງ​ຊັບພະຍາກອນ​ມະນຸດ​ແນ່​​ໃສ່​ບຳລຸງ ​ແລະ ຍົກ​ສະດັບ​ຄວາມ​ສາມາດ​ຂອງຄູ​ໃຫ້​ສູງ​ຂື້ນ,ບຸກທະລຸ​ການ​ຄຸ້ມ​ຄອງ​ລະບຽບການ​ສື​ກສາໃຫ້​ໜັກ​ແໜ້ນ​​ເຂັ້ມ​ແຂງ,ນຳ​ເອົາ​ມາດ​ຕະຖານ​ການ​ສຶກສາ ແລະ ຄຸນ​ນະພາ​ບຂອງ​ຄູ​ໃຫ້ບັນລຸ​ເປົ້າໝາຍ​ທີ່​ໂຮງ​ຮຽນ​ໄດ້​ກຳ​ນົດ​ໄວ້ ​ແລະ ບຸກທະລຸ​ດ້ານ​ການ​ລົງ​ທືນ,ລ​ະດົມ​ທືນທັງ​ພາຍ​ໃນ ​ແລະຕ່າງປະ​ເທດ​ເພື່ອ​ສ້າງ​ພື້ນຖານ​ໂຄງ​ລ່າງ ການ​ສຶກສາພາຍ​ໃນ​ໂຮງຮຽນ​ໃຫ້​ພຽງພໍ​ໂດຍ​ພື້ນຖານ​ເພື່ອ​ເປັນກຳລັງ​ແຮງ​ຍົກ​ສູງ​ຄຸນ​ນະພາ​ບການ​ສຶກສາ​ໃຫ້​ສູງ​ຂື້ນ ແລະ ເອົາ​ໃຈ​ໃສ່​ປະຕິບັດ​ຂໍ້​ແຂ່ງຂັນ 3 ດີ​ຄື: ສອນ​ດີ,ຮຽນ​ເກັ່ງ,ຕ້ານ​ກັບ​ສິ່ງ​ເສບ​ຕິດ​ໃນ​ຫ້ອງ​ຮຽນ ​ແລະ ສ້າງ​ສິ່ງ​ແວດ​ລ້ອມ​ໂຮງຮຽນ​ໃຫ້​ດີຂຶ້ນ.

 

ແຫລ່ງຂ່າວ:

ລພນ

ບົດຄວາມຫຼ້າສຸດ

ມີໃຜຊື່ຍາວກວ່ານີ້ບໍ່? ຊາຍຊາວນິວຊີແລນມີຊື່ຍາວທີ່ສຸດໃນໂລກ ໃຊ້ເວລາອ່ານ 20 ນາທີ ຈຶ່ງອ່ານແລ້ວ

ມາຮູ້ຈັກກັບຊາຍຜູ້ທີ່ມີຊື່ທີ່ຍາວທີ່ສຸດໃນໂລກ, ລໍເລນ ວອດກິນ (Laurence Watkins) ອາຍຸ 60 ປີ, ອາໄສຢູ່ເມືອງໂອດແລນ ປະເທດນິວຊີແລນ ລາວມີຈໍານວນຊື່ຍາວເຖິງ 2,253 ຄໍາ. ຜ່ານມາຊາຍຄົນນີ້ຫຼົງໄຫຼໃນລາຍການ Ripley's...

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄຂຂຶ້ນຢ່າງເປັນທາງການ

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ເປີດຂຶ້ນໃນວັນທີ 21 -...

ກຳນົດຈັດງານ 5 ວັນ ບຸນນະມັດສະການພຣະທາດຫຼວງວຽງຈັນ ຈະຈັດຂຶ້ນໃນລະຫວ່າງວັນທີ 1-5 ພະຈິກ 2025

ໃນວັນທີ 21 ຕຸລາ 2025 ພິທີຖະແຫຼງຂ່າວ ງານປະເພນີບຸນນະມັດສະການ ພຣະທາດຫຼວງ ແລະ ງານວາງສະແດງສິນຄ້າ ປະຈຳປີ ຄສ 2025 ຈັດຂຶ້ນ ທີ່ເດີ່ນພຣະທາດຫຼວງວຽງຈັນ...

ຍີ່ປຸ່ນ ຊ່ວຍເຫຼືອລ້າໂຄງການເກັບກູ້ລະເບີດບໍ່ທັນແຕກ ຢູ່ແຂວງ ຈຳປາສັກ ສາລະວັນ ແລະ ເຊກອງ ມູນຄ່າ 4,5 ລ້ານໂດລາສະຫະລັດ

ລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອວຽກງານ ລບຕ ຢູ່ພາກໃຕ້ຂອງລາວ ໃນວັນທີ 20 ຕຸລາ 2025 ທີ່ນະຄອນຫຼວງວຽງຈັນ ສປປ ລາວ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດຍີ່ປຸ່ນ ປະຈໍາລາວ ໄດ້ຈັດພິທີລົງນາມເອກະ...