ຂປລ. ພິທີມອບ-ຮັບ ໜ້າທີ່ເຈົ້າແຂວງໆວຽງຈັນຜູ້ເກົ່າ ແລະ ໃໝ່ ລະຫວ່າງ ທ່ານ ຄຳເມິງ ພົງທະດີ ເລຂາພັກແຂວງ, ເຈົ້າແຂວງໆວຽງຈັນຜູ້ເກົ່າ ແລະ ທ່ານ ວິດົງ ໄຊຍະສອນ ເລຂາພັກແຂວງ, ເຈົ້າແຂວງໆວຽງຈັນຜູ້ໃໝ່ ໄດ້ຈັດຂຶ້ນໃນວັນທີ 5 ຕຸລາ 2015 ຢູ່ແຂວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ຈັນສີ ໂພສີຄຳ ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ຕາງໜ້າໃຫ້ກົມການເມືອງສູນກາງພັກ, ມີບັນດາສະຫາຍໃນຄະນະບໍລິຫານງານພັກແຂວງ ແລະ ພະນັກງານຫລັກແຫລ່ງພາຍໃນແຂວງ ເຂົ້າຮ່ວມເປັນສັກຂີພິຍານ.
ການມອບ-ຮັບໜ້າທີ່ດັ່ງກ່າວ ແມ່ນປະຕິບັດຕາມຄຳສັ່ງ ຂອງກົມການເມືອງສູນກາງພັກ ແລະ ລັດຖະດຳລັດຂອງປະທານປະເທດ ວ່າດ້ວຍການຍົກຍ້າຍສະຫາຍ ຄຳເມິງ ພົງທະດີ ກຳມະການສູນກາງພັກ, ເລຂາຄະນະບໍລິຫານງານພັກ ແຂວງວຽງຈັນ ໄປຮັບໜ້າທີ່ໃໝ່ຢູ່ຫ້ອງວ່າການ ປະທານປະເທດ ແລະ ແຕ່ງຕັ້ງທ່ານ ວິດົງ ໄຊຍະສອນ ເປັນເຈົ້າແຂວງໆວຽງຈັນ. ໃນໂອກາດນີ້ ທ່ານ ຈັນສີ ໂພສີຄຳ ໄດ້ໂອ້ລົມເຊິ່ງທ່ານໄດ້ເນັ້ນໜັກ ໃຫ້ບັນດາການນຳທຸກຂັ້ນພາຍໃນແຂວງ ສ້າງຄວາມເປັນເອກະພາບໃນ ໃຫ້ແໜ້ນແຟ້ນເພື່ອນຳພາແນວຄິດ ສະມາຊິກພັກ-ພະນັກງານ ແລະ ປະຊາຊົນບັນດາ ເຜົ່າ ໃຫ້ເຂົ້າໃຈຕໍ່ການຊັບປ່ຽນ ພະນັກງານການນຳໃນຄັ້ງນີ້, ສືບຕໍ່ປົກປັກຮັກສາຄວາມສາມັກຄີພາຍໃນພັກ ໃຫ້ໜັກແໜ້ນ ມີຄວາມເປັນເອກະພາບສູງ, ສືບຕໍ່ເປັນຫລັກແຫລ່ງເປັນຄັນທຸງ ແລະ ເປັນແກນນຳໃນການເຕົ້າໂຮມ ຄວາມສາມັກຄີ ໃນຖັນແຖວສະມາຊິກພັກ-ພະນັກງານ, ເພື່ອໃຫ້ການຮ່ວມມືກັບບັນດາການນຳຜູ້ໃໝ່ ເພືອພັດທະນາແຂວງວຽງຈັນ ໃຫ້ຈະເລີນກ້າວໜ້າຍິ່ງໆຂຶ້ນໄປ.
ແຫລ່ງຂ່າວ:
