ສຳນັກຂ່າວຕ່າງປະເທດ ລາຍງານໃນວັນທີ 6 ຕຸລານີ້ວ່າ ກຸ່ມ 12 ປະເທດຮອບມະຫາສະໝຸດປາຊີຟິກ ຫລື ກຸ່ມປະເທດ TPP (Trans – Pacific Partnership) ໄດ້ບັນລຸຂໍ້ຕົກລົງຮ່ວມກັນໃນມື້ວັນຈັນທີ 5 ຕຸລາຜ່ານມານີ້ ໃນການສ້າງເຂດການຄ້າເສລີທີ່ໃຫຍ່ທີ່ສຸດໃນໂລກ ຊຶ່ງຈະຊ່ວຍເສີມສ້າງຄວາມເຂັ້ມແຂງທາງດ້ານເສດຖະກິດລະຫວ່າງບັນດາປະເທດສະມາຊິກ ຊຶ່ງປະກອບດ້ວຍ ປະເທດອົດສະຕາລີ, ບຣູໄນ, ການາດາ, ຊີເລ, ຍີ່ປຸ່ນ, ມາເລເຊຍ, ແມັກຊິກ, ນິວຊີແລນ, ເປຣູ, ສິງກະໂປ, ສະຫະລັດອາເມຣິກາ ແລະ ຫວຽດນາມ.
ທັງນີ້ ການບັນລຸຂໍ້ຕົກລົງດັ່ງກ່າວ ແມ່ນຈະເປັນການສ້າງເຂດການຄ້າເສລີທີ່ໃຫຍ່ທີ່ສຸດຂອງໂລກ ຊຶ່ງມີອັດຕາສ່ວນປະມານ 40% ຂອງຜະລິດຕະພັນມວນລວມພາຍໃນປະເທດ ຫລື ຈີດີພີ ຂອງທົ່ວໂລກ.
