ສຳນັກງານຕ່າງປະເທດ ລາຍງານໃນວັນທີ 6 ຕຸລານີ້ວ່າ ເຈົ້າໜ້າທີ່ສະພາຊີກວົງເດືອນແດງ ໄດ້ອອກມາເປີດເຜີຍໃນມື້ວັນຈັນທີ 5 ຕຸລາຜ່ານມານີ້ ເຖິງພາບທີ່ສ້າງຄວາມສະຫລົດໃຈ ເມື່ອເຈົ້າໜ້າທີ່ອາສາສະໝັກໄດ້ເຂົ້າດຳເນີນການເກັບກູ້ ຊາກສົບທີ່ເໜົ່າເປື່ອຍຂອງຜູ້ອົບພະຍົບ ລອຍຂຶ້ນມາຄ້າງຢູ່ຕາມຊາຍຫາດຕ່າງໆ ແຄມທະເລເມດິແຕຣານຽນ ໃກ້ກັບນະຄອນຫລວງຂອງປະເທດລີບີ ໂດຍໃນນັ້ນພົບ 75 ສົບ ຢູ່ບໍລິເວນຊາຍຫາດຂອງນະຄອນຫລວງຕຣິໂປລີ ແລະ ອີກ 10 ສົບ ໃນເມືອງຊາບຣາທາ ຫ່າງອອກໄປທາງພາກຕາເວັນຕົກປະມານ 70 ກິໂລແມັດ ລວມທັງໝົດ 85 ສົບ.
ທັງນີ້ ພາບດັ່ງກ່າວໄດ້ສະແດງໃຫ້ເຫັນເຖິງຊາຕາກຳຂອງຊາວຜູ້ອົບພະຍົບ ທີ່ເສຍຊີວິດຈາກເຫດເຮືອຂວ້ຳຢູ່ກາງທະເລ ຊຶ່ງສະເພາະພາຍໃນປີນີ້ ແມ່ນມີຜູ້ອົບພະຍົບຂ້າມທະເລເມດິແຕຣານຽນແລ້ວ ປະມານ 515,000 ຄົນ ຊຶ່ງໃນນັ້ນຫລາຍກ່ວາ 3,000 ຄົນ ຕ້ອງມາຈົບຊີວິດ ຫລື ສູນຫາຍຢູ່ກາງທະເລ.
