ພາຍຸໄຕ້ຝຸ່ນມູຈີແກແຜ່ອິດທິພົນພື້ນທີ່ທາງໃຕ້ຂອງປະເທດຈີນຕັ້ງແຕ່ວັນອາທິດ ໂດຍຫລ້າສຸດໃນມື້ວັນຈັນ ຈຳນວນຜູ້ເສຍຊີວິດເພາະພາຍຸລູກນີ້ເພີ່ມຂຶ້ນເປັນ 7 ລາຍ ແລະ ມີຜູ້ບາດເຈັບອີກຫລາຍກວ່າ 200 ຄົນ…
ສຳນັກຂ່າວຕ່າງປະເທດລາຍງານວ່າ ຈຳນວນຜູ້ເສຍຊີວິດໃນປະເທດຈີນຈາກອິດທິພົນຂອງພາຍຸໄຕ້ຝຸ່ນ ‘ມູຈີແກ’ ເພີ່ມຂຶ້ນເປັນ 7 ຄົນແລ້ວ ຫລັງຈາກພາຍຸເຄື່ອນຕົວຂຶ້ນຝັ່ງໃນມົນທົນກວາງຕຸ້ງທາງໃຕ້ຂອງຈີນເມື່ອຕອນສວຍຂອງມື້ອາທິດທີ່ 4 ຕຸລາ ໂດຍອິດທິພົນຂອງມູຈີແກເຮັດໃຫ້ເກີດຝົນຕົກໜັກ, ລົມແຮງພັດອາຄານທີ່ກຳລັງກໍ່ສ້າງເປ່ເພເສຍຫາຍຫລາຍຫລັງ ແລະ ເຮັດໃຫ້ເກີດໄຟດັບກະທົບຜູ້ຄົນຫລາຍພັນ ຂະນະທີ່ມີລາຍງານພົບຜູ້ໄດ້ຮັບບາດເຈັບອີກ 223 ຄົນ
ໄຕ້ຝຸ່ນມູຈີແກ ເຄື່ອນຕົວຂຶ້ນຝັ່ງເມືອງເຈີ້ນຈຽງເມື່ອວັນອາທິດ ໂດຍກ່ອນໜ້ານັ້ນທາງການຈີນໄດ້ປະກາດເຕືອນໄພພາຍຸຂັ້ນສີແດງ ແລະ ອົບພະຍົບປະຊາຊົນໃນພື້ນທີ່ຊາຍຝັ່ງທາງໃຕ້ເກືອບ 200,000 ຄົນ ຢ່າງໃດກໍຕາມ ມີລາຍງານວ່າເຮືອປະມົງຈຳນວນຫລາຍຍັງຕິດຢູ່ກາງທະເລ ຊຶ່ງເຈົ້າຫນ້າທີ່ສາມາດຊ່ວຍເຫລືອຊາວປະມົງກັບເຂົ້າຝັ່ງໄດ້ 117 ຄົນ ພົບຜູ້ເສຍຊີວິດ 1 ລາຍ ແລະ ມີຊາວປະມົງສູນຫາຍອີກ 16 ຄົນ
ອິດທິພົນຂອງໄຕ້ຝຸ່ນມູຈີແກຍັງເຮັດໃຫ້ເກີດພາຍຸລູກໃຫ່ຍໃນເມືອງຝໍຊານ ໃນມົນທົນກວາງຕຸ້ງ ເປັນເຫດໃຫ້ມີຜູ້ເສຍຊີວິດ 3 ລາຍອີກດ້ວຍ ອີກດ້ານໜຶ່ງ ສຳນັກງານກິດຈະການພົນລະເຮືອນຂອງເຂດປົກຄອງຕົນເອງກວາງສີຈ້ວງ ຊຶ່ງເປັນທາງຜ່ານຂອງມູຈີແກ ລາຍງານວ່າ ໄຕ້ຝຸ່ນສົ່ງຜົນກະທົບຕໍ່ຜູ້ຄົນຫລາຍກວ່າ 1.44 ລ້ານຄົນໃນຕອນສວຍຂອງວັນຈັນ ໂດຍພົບຜູ້ເສຍຊີວິດ 1 ລາຍທີ່ເມືອງໜານໜິງນຳອີກ
ນອກນີ້ ໄຕ້ຝຸ່ນ ມູຈີແກ ເປັນພາຍຸລູກທີ່ 22 ຂອງປີ 2015 ເຂົ້າພັດຖະຫລົ່ມປະເທດຈີນໃນວັນຢຸດຍາວວັນຊາດພໍດີ ໂດຍກ່ອນໜ້ານີ້ ມູຈີແກເຄື່ອນຕົວຜ່ານພາກເໜືອຂອງປະເທດຟິລິບປິນ ເຮັດໃຫ້ເກີດນ້ຳຖ້ວມ ແລະ ດິນເຈື່ອນໃນບາງພື້ນທີ່ ມີຜູ້ເສຍຊີວິດ 2 ລາຍ ແລະ ສູນຫາຍ 30 ຄົນ
