ຄາດວ່າເດືອນມີນາ ( 3 ) 2016 ຂົວຂ້າມນຳ້ເຊໂດນແຫ່ງໃໝ່ທີ່ເມືອງປາກເຊ ຂະໜາດ 4 ເລນ ທີ່ສ້າງແທນຂົວເກົ່າສະໄໝຝຣັ່ງຈະໄດ້ເປີດນຳໃຊ້ ມາຮອດປັດຈຸບັນການກໍ່ສ້າງສຳເລັດແລ້ວ 87%.
ທ່ານ ບຸນທະວີ ວິສຸດທິວົງ ຫົວໜ້າໂຄງການກໍ່ສ້າງ ລາຍງານໃຫ້ຮູ້ວ່າ: ບໍລິສັດລາວເວີນ ເຊິ່ງເປັນຜູ້ ຮັບເໝົາກໍ່ສ້າງ ໄດ້ເລັ່ງຂຸ້ນຂ້ຽວຈັດຕັ້ງປະຕິບັດບັນດາໜ້າວຽກຕ່າງໆ ມາຮອດປັດຈຸບັນສຳເລັດແລ້ວ 87% ໃນວຽກທາງເບຕົງເຂົ້າຫາຫົວຂົວ, ເສົາໃຫຍ່, ເສົານ້ອຍ ແລະ ວຽກເທເບຕົງຂົວ; ສຳລັບວຽກເທ ເບຕົງຂົວຄາດວ່າຈະໃຫ້ຈອດກັນໃນເດືອນທັນວາ 2015 ແລະ ຮອດເດືອນມີນາ 2016 ຈະມີພິທີມອບ – ຮັບ ແລະ ເປີດການນຳໃຊ້ຢ່າງເປັນທາງການ.
ຂົວຂ້າມນຳ້ເຊໂດນແຫ່ງນີ້ ໄດ້ເລີ່ມລົງມືກໍ່ສ້າງມາແຕ່ກາງປີ 2013 ມີມູນຄ່າກໍ່ສ້າງ 14,82 ລ້ານ ໂດລາສະຫະລັດ, ມີຄວາມຍາວ 220 ແມັດ, ກວ້າງ 17 ແມັດ ແລະ ມີທາງລົດແລ່ນຂຶ້ນ-ລົງໄດ້ 4 ເລນ. ໂຄງການນີ້ຖ້າສຳເລັດ ໃນເດືອນມີນາ 2016 ຈະສ້າງຄວາມສະດວກສະບາຍໃຫ້ຊາວເມືອງປາກເຊ ເພາະ ປັດຈຸບັນມີຄວາມຫຍຸ້ງຍາກສົມຄວນ ໂດຍສະເພາະໃນຊົ່ວໂມງເຂົ້າ-ອອກການ. ຖ້າອີງຕາມຄຳໃຫ້ສຳພາດ ຂອງທ່ານ ຈັນທະວີສຸກ ວັນສີລິ ຮອງຫົວໜ້າພະແນກໂຍທາທິການ ແລະ ຂົນສົ່ງທີ່ໄດ້ໃຫ້ສຳພາດໃນ ທ້າຍເດືອນເມສາ 2015 ວ່າ ໂຄງການນີ້ຈະສຳເລັດໃນກາງປີ 2016 ຖືວ່າການກໍ່ສ້າງຈະສຳເລັດກ່ອນແຜນ.
ແຫຼ່ງຂ່າວ: ໜັງສືພິມຈຳປາໃໝ່