ສຳນັກຂ່າວຕ່າງປະເທດ ລາຍງານໃນວັນທີ 2 ຕຸລານີ້ວ່າ ບັນດາປະເທດຕ່າງໄດ້ອອກມາລະບຸ ຕົວເລກນັກສະແຫວງບຸນຢຽບກັນຕາຍໃນພິທີຮັດ ຢູ່ປະເທດອາຣັບບີ ຊາອຸດິດ ຍັງຄົງເພີ່ມຂຶ້ນ ແລະ ມີຍອດຜູ້ສູນຫາຍອີກຫລາຍຮ້ອຍຄົນ ນັບຕັ້ງແຕ່ເກີດເຫດເມື່ອ 2 ອາທິດຜ່ານມາ ໂດຍທາງການອາຣັບບີ ຊາອຸດິດ ໄດ້ອອກມາລະບຸວ່າ ຕົວເລກຜູ້ເສຍຊີວິດທັງໝົດແມ່ນ 769 ຄົນ ແລະ ບາດເຈັບ 934 ຄົນ, ແຕ່ບັນດາປະເທດຕ່າງໆທີ່ມີນັກສະແຫວງບຸນເດີນທາງເຂົ້າຮ່ວມໃນພິທີດັ່ງກ່າວ ລວມ 23 ປະເທດ ໄດ້ອອກມາລະບຸຕົວເລກຜູ້ເສຍຊີວິດ ຊຶ່ງລວມກັນຫລາຍກ່ວາ 940 ຄົນ ແລະ ຍັງມີສົບທີ່ຍັງສູນຫາຍອີກປະມານ 600 ຄົນ.
ທາງການອີຣ່ານ ໄດ້ອອກມາກ່າວໂທດຕໍ່ອາຣັບບີ ຊາອຸດິດ ເຖິງໂຫດໂສກນາຕະກຳດັ່ງກ່າວນີ້ວ່າ ຂາດຄວາມຮັບຜິດຊອບໃນການຮັກສາຄວາມປອດໄພ ແລະ ການດຳເນີນການຂອງທາງການຫລົ້ມເຫລວ.
ທັງນີ້, ພິທີຮັດ ເປັນພິທີກຳທາງສາສະໜາອິດສະລາມ ຈັດຂຶ້ນຢ່າງຍິ່ງໃຫຍ່ຢູ່ປະເທດອາຣັບບີ ຊາອຸດິດ ໂດຍມີນັກສະແຫວງບຸນຊາວມຸດສະລິມຈາກທົ່ວໂລກ ເທີນທາງເຂົ້າມາຮ່ວມໃນພິທີດັ່ງກ່າວຈຳນວນຫລາຍລ້ານຄົນໃນແຕ່ລະປີ ຊຶ່ງເຫດການທີ່ເກີດຂຶ້ນໃນປີນີ້ ແມ່ນລະຫວ່າງທີ່ນັກສະແຫວງບຸນກຳລັງເດີນທາງປະກອບພິທີແກວ່ງກ້ອນຫີນໃສ່ເສົາສາມຕົ້ນ ທີ່ຕາແສງມີນາ ໃກ້ກັບ ນະຄອນເມັກກະ ຂອງ ອາຣັບບີ ຊາອຸດິດ ແລ້ວເກີດແຕກຕື່ນຢຽບກັນຕາຍ ພາຍໃນກຸ່ມນັກສະແຫວງບຸນທີ່ຢູ່ຮ່ວມກັນໜາແໜ້ນ.
