ຂປລ.ກອງປະຊຸມຕົວແທນສະມາຊິກພັກຂອງອົງຄະນະພັກ ຫ້ອງວ່າການລັດຖະບານ (ຫລບ) ໄດ້ໄຂຂຶ້ນໃນຕອນເຊົ້າ ຂອງວັນທີ 1 ຕຸລາ 2015 ທີ່ຫ້ອງປະຊຸມໃຫຍ່ ຂອງ ຫລບ, ພາຍໃຕ້ການເປັນປະທານຂອງ ສະຫາຍ ສອນໄຊ ສີພັນດອນ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າ ຫລບ. ໂດຍໄດ້ຮັບກຽດເຂົ້າຮ່ວມຂອງ ສະຫາຍ ທອງສິງ ທຳມະວົງ ກຳມະການ ກົມການເມືອງສູນກາງພັກ, ນາຍົກລັດຖະມົນຕີ. ມີບັນດາສະຫາຍກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ; ບັນດາສະຫາຍກໍາມະການສູນກາງ, ລັດຖະມົນຕີປະຈໍາ ຫລບ, ບັນດາຄະນະພັກ, ພະນັກງານອາວຸໂສບໍານານ, ບັນດາສະມາຊິກພັກ-ພະນັກງານ ພ້ອມດ້ວຍແຂກຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງບົດສະຫຼຸບຕີລາຄາການເຄື່ອນໄຫວ ຊີ້ນໍາ-ນໍາພາ ຂອງອົງຄະນະພັກຫ້ອງວ່າການລັດຖະບານ ນັບແຕ່ກອງປະຊຸມໃຫຍ່ ຄັ້ງທີ III ເຖິງປະຈຸບັນ ແລະ ທິດທາງໃນຕໍ່ໜ້າ ຈາກສະຫາຍ ສອນໄຊ ສີພັນດອນ. ພ້ອມທັງປ່ອນບັດຄັດເລືອກເອົາຜູ້ແທນສົມບູນ ແລະ ຜູ້ແທນສໍາຮອງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ X ຂອງພັກ, ເຊິ່ງມີຜູ້ລົງສະໝັກເລືອກຕັ້ງ ຈຳນວນ 8 ສະຫາຍ ທີ່ເປັນຕົວແທນສະມາຊິກພັກ ທົ່ວຫ້ອງວ່າການລັດຖະບານ ຈໍານວນ 328 ສະຫາຍ, ເລືອກເອົາ 5 ສະຫາຍ ເປັນຍິງ 3 ສະຫາຍ ຄື : ສະຫາຍ ສົມສະໜິດ ສຸວັນນະລາດ; ສະຫາຍ ນາງ. ບຸບຜາ ເຄນວົງດາລາ; ສະຫາຍ ດຣ. ນາງ ວຽງສະຫວັນ ດວງສະຫວັນ, ສະຫາຍ ນາງ. ບົວທາ ຂັດທິຍະ; ສະຫາຍ ຮສ.ດຣ. ສິງ ເມໂນລາດ ແລະ ເລືອກໄດ້ຜູ້ແທນ ສໍາຮອງ ຈຳນວນ 2 ສະຫາຍ.
ແຫລ່ງຂ່າວ:
