ສຳນັກຂ່າວຕ່າງປະເທດລາຍງານໃນວັນທີ 30 ກັນຍາຜ່ານມານີ້ວ່າ ເຮືອບິນສູ້ຮົບຂອງຣັດເຊຍ ໄດ້ເລີ່ມປະຕິບັດການໂຈມຕີທາງອາກາດໃສ່ກຸ່ມຕິດອາວຸດຢູ່ຊີຣີ ເປັນຄັ້ງທຳອິດ ພາຍຫລັງສະພາສູງຂອງຣັດເຊຍໄດ້ມອບອຳນາດໃຫ້ ປະທານາທິບໍດີ ວະລາດິເມຍ ປູຕິນ ໃຫ້ສາມາດສົ່ງກອງທັບອາກາດເຂົ້າສູ່ຊີຣີໄດ້ ໂດຍລັດຖະບານຊີຣີເອງໄດ້ອອກມາຢືນຢັນວ່າ ປະທານາທິບໍດີ ບາຊາ ອັນ-ອັດຊາດ ແຫ່ງຊີຣີ ໄດ້ເຮັດໜັງສືເພື່ອຮ້ອງຂໍການສະໜັບສະໜູນທາງທະຫານ ຈາກຣັດເຊຍຢ່າງເປັນທາງການ.

ດ້ານເຈົ້າໜ້າທີ່ຂອງຣັດເຊຍປະຈຳນະຄອນຫລວງແບກແດດຂອງອີຣັກ ໄດ້ແຈ້ງຕໍ່ເຈົ້າໜ້າທີ່ຂອງສະຫະລັດອາເຣິກາ ໃນຕອນເຊົ້າຂອງວັນພຸດທີ 30 ກັນຍາວ່າ ເຮືອບິນຂອງຣັດເຊຍ ຈະເລີ່ມປະຕິບັດການໂຈມຕີກຸ່ມໄອເອັສໃນຊີຣີໃນມື້ນີ້ ໂດຍຂໍໃຫ້ເຮືອບິນຂອງສະຫະລັດອາເມຣິກາ ຫລີກລ່ຽງການບິນໃນນ່ານຟ້າຊີຣີ ໃນລະຫວ່າງທີ່ກອງທັບອາກາດຣັດເຊຍ ກຳລັງປະຕິບັດການໂຈມຕີຢູ່.

ແນວໃດກໍຕາມ ທ່ານ ຈອນ ເຄີບີ ໂຄສົກກະຊວງການຕ່າງປະເທດສະຫະລັດອາເມຣິກາໄດ້ຖະແຫລງວ່າ ກຸ່ມພັນທະມິດຊຶ່ງນຳໂດຍສະຫະລັດອາເມຣິກາເອງ ຈະຍັງຄົງປະຕິບັດການບິນເໜືອນ່ານຟ້າຊີຣີ ແລະ ອີຣັກຕາມແຜນເດີມ.