ເມື່ອວັນທີ່ 29 ກັນຍາ. ສຳນັກຂ່າວຕ່າງປະເທດລາຍງານອິດທິພົນຂອງພາຍຸໄຕ້ຝຸ່ນ ຕູ້ຈຽນ ເຊີ່ງສຳນັກງານອຸຕຸນິຍົມວິທະຍາຂອງໄຕ້ຫວັນ ຍົກລະດັບຄວາມຮຸນແຮງຂອງພາຍຸຂຶ້ນເປັນ ‘ຊູເປີລ໌ສະຕອມ’ ຂະນະຖະຫລົ່ມໄຕ້ຫວັນ ດ້ວຍຄວາມໄວລົມເຖິງ 227 ກິໂລແມັດ./ຊົ່ວໂມງ. ຄືນວັນທີ່ 28 ກັນຍາ ວ່າ ກໍ່ໃຫ້ເກີດຄື້ນສູງ ລົມພັດແຮງ ແລະ ຝົນຕົກໜັກ ບາງພື້ນທີ່ວັດປະລິມານນ້ຳຝົນໃນໄລຍະ 24 ຊົ່ວໂມງ. ໄດ້ສູງເຖິງກວ່າ 900 ມິນລິແມັດ ເປັນເຫດໃຫ້ມີຜູ້ເສຍຊີວິດ ແລ້ວຢ່າງນ້ອຍ 2 ຄົນ ເປັນຜູ້ສູງອາຍຸ 1 ຄົນ ແລະ ຄົນງານກໍ່ສ້າງ 1 ຄົນ ຂະນະທີ່ມີຜູ້ໄດ້ຮັບບາດເຈັບກວ່າ 300 ຄົນ ແລະ ປະຊາຊົນປະມານ 1.8 ລ້ານຄົວເຮືອນ ປະສົບບັນຫາໄຟຟ້າດັບ ຕົ້ນໄມ້ຫັກຈຳນວນຫລາຍ
ບີບີຊີ ແຈ້ງວ່າ ໂຮງຮຽນໃນໄຕ້ຫວັນຕ້ອງປິດໂຮງຮຽນເປັນວັນທີ່ 2 ຕິດຕໍ່ກັນ ລວມທັງການຄົມມະນາຄົມທາງລົດໄຟ ແລະ ທາງອາກາດ ຖືກຍົກເລີກຢຸດໃຫ້ບໍລິການ ໂດຍທາງການໄຕ້ຫວັນຍັງອອກຄຳເຕືອນປະຊາຊົນໃຫ້ລະວັງໄພ ຈາກດິນເຈື່ອນຫລັງເກີດຝົນຕົກໜັກ
ເມື່ອວັນທີ່ 28 ກັນຍາ ທາງການໄຕ້ຫວັນໄດ້ດຳເນີນການອົບພະຍົບປະຊາຊົນຫລາຍພັນຄົນໜີໄພ ກ່ອນພາຍຸຈະເຄື່ອນຕົວມາຮອດ ແລະ ລະດົມກຳລັງທະຫານກວ່າ 2.4 ໝື່ນຄົນ ກຽມພ້ອມຮັບມືສະຖານະການສຸກເສີນ ໂດຍຂະນະນີ້ ໄຕ້ຝຸ່ນຕູ້ຈຽນ ໄດ້ອ່ອນກຳລັງລົງ ຂະນະມຸ່ງໜ້າໄປຍັງມົນທົນຟູຈ້ຽນຂອງຈີນ ແລະຄາດວ່າຈະຂຶ້ນຝັ່ງແຜ່ນດິນໃຫຍ່ຈີນໃນມື້ນີ້ 29 ກັນຍາ