ເຜີຍຄລິບຊູເປີລ໌ໄຕ້ຝຸ່ນຕູ້ຈຽນ ຖະຫລົ່ມໄຕ້ຫວັນ ຈີນ ແລະ ຍີ່ປຸ່ນ ເຮັດຄື້ນລູກໃຫຍ່ຊັດຝັ່ງ ໄຕ້ຫວັນຮັບມືເປັນປະເທດທຳອິດ ອົບພະຍົບເພີ່ມ 7,000 ຄົນ
ເມື່ອວັນທີ່ 29 ກັນຍາ ເວັບໄຊຕ໌ສະເຕດທາມ ລາຍງານວ່າ ຊູເປີລ໌ໄຕ້ຝຸ່ນຕູ້ຈຽນໄດ້ພັດຖະຫລົ່ມໄຕ້ຫວັນເປັນພື້ນທີ່ທຳອິດໃນມື້ນີ້ 29 ກັນຍາ ເຮັດໃຫ້ມີຝົນຕົກໜັກ ແລະ ລົມພັດແຮງຈົນເກືອບຕ້ານບໍ່ໄຫວ ມີລາຍງານດິນເຈື່ອນແລ້ວເທິງເກາະທາງຕະເວັນອອກສຽງເໜືອຂອງປະເທດ ຂະນະທີ່ການຄົມນາຄົມສາທາລະນະ ເຊັ່ນ: ລົດໄຟ ເຮືອເຟີຣາຣີ່ ແລະ ເຮືອບິນຕ້ອງລະງັບໃຫ້ບໍລິການ ເຊັ່ນດຽວກັບຄອນເສີດ ບອນ ໂຈວີ່ ທີ່ມີກຳນົດສະແດງໃນນະຄອນຫລວງໄທເປ ກໍຕ້ອງຍົກເລີກໄປ
ລາຍງານລະບຸວ່າ ຊູເປີລ໌ໄຕ້ຝຸ່ນຕູ້ຈຽນໄດ້ພັດເຂົ້າຖະຫລົ່ມໄຕ້ຫວັນໄວເກີນຄາດ ເຮັດໃຫ້ຕ້ອງອົບພະຍົບປະຊາຊົນເພີ່ມອີກ 7,000 ຄົນ ທາງການໄຕ້ຫວັນເຜີຍຕອນນີ້ປະຊາຊົນນັບໝື່ນຢູ່ກັນຢ່າງບໍ່ມີໄຟຟ້າໃຊ້ ຂະນະທີ່ປະຊາຊົນອີກ 24,000 ລາຍ ໄດ້ຮັບຄຳແນະນຳໃຫ້ກຽມພ້ອມອົບພະຍົບ ຢ່າງໃດກໍດີມີການຈັດຕັ້ງສູນຊ່ວຍເຫລືອຜູ້ປະສົບໄພຂຶ້ນແລ້ວກວ່າ 100 ແຫ່ງ
ນອກຈາກນີ້ທາງການໄຕ້ຫວັນຍັງໄດ້ປະກາດແນະນຳໃຫ້ປະຊາຊົນທີ່ຢູ່ຕາມຊາຍຝັ່ງອົບພະຍົບ ເພາະຊູເປີລ໌ໄຕ້ຝຸ່ນທີ່ພັດຖະຫລົ່ມໃນໄລຍະຊູເປີລ໌ມູນເຊັ່ນນີ້ນັ້ນເຮັດໃຫ້ຄື້ນຍິ່ງອັນຕະລາຍຫລາຍຂຶ້ນອີກ ເນື່ອງຈາກມີແຮງດຶງດູດຈາກດວງຈັນຫລາຍຂຶ້ນ
ສ່ວນທາງຝັ່ງຈີນກໍໄດ້ປະກາດເຕືອນໄພໃນລະດັບສີແດງ ກ່ອນທີ່ພາຍຸຈະພັດຖະຫລົ່ມໃນຕອນສວຍຂອງມື້ນີ້ ໂດຍກ່ອນໜ້ານີ້ກໍໄດ້ມີຄລິບວິດີໂອບັນທຶກພາບຄື້ນຊັດຊາຍຝັ່ງອອກມາໃຫ້ຊົມ ສະແດງໃຫ້ເຫັນວ່າຄື້ນນັ້ນລູກໃຫຍ່ ແລະ ພັດຊາຍຝັ່ງຢ່າງກະທັນຫັນ
ສ່ວນທີ່ປະເທດຍີ່ປຸ່ນນັ້ນກໍເລີ່ມໄດ້ຮັບຜົນກະທົບຈາກຊູເປີລ໌ໄຕ້ຝຸ່ນລູກນີ້ແລ້ວເຊັ່ນກັນ ທາງການລະບຸວ່າທີ່ເກາະອິຊິງາກິ ແລະ ເກາະແຫ່ງອື່ນໆ ປະຊາຊົນກໍຢູ່ກັນຢ່າງບໍ່ມີໄຟຟ້າໃຊ້ແລ້ວກວ່າ 3,200 ຄົວເຮືອນ ແລະ ໄດ້ມີການລະງັບຖ້ຽວບິນພາຍໃນປະເທດກວ່າ 100 ຖ້ຽວບິນແລ້ວ
ຢ່າງໃດກໍດີຍັງບໍ່ມີລາຍງານຜູ້ບາດເຈັບ ຫຼື ລາຍງານຄວາມເສຍຫາຍໃດໆ