ສະບູ່ຕ້ານເຊື້ອແບກທີເຣຍມີສ່ວນປະສົມຂອງສານເຄມີທີ່ຊື່ວ່າ Triclosan ຊຶ່ງເປັນສານເຄມີທີ່ອັນຕະລາຍໃນການກຳຈັດແບກທີເຣຍອອກຈາກມືຂອງເຈົ້າຫລາຍກວ່າສະບູ່ທົ່ວໄປທີ່ໃຊ້ກັນໃນທຸກມື້
ການສຶກສາໃໝ່ໄດ້ຂໍ້ສະຫລຸບຂອງຄຳຖາມທີ່ກ່ຽວກັບການໃຊ້ສານເຄມີຊຶ່ງຖືກລະບຸວ່າອາດເປັນອັນຕະລາຍໃນສະບູ່ຕ້ານເຊື້ອແບກທີເຣຍ
ຕະຫລາດສະບູ່ຕ້ານເຊື້ອແບກທີເຣຍເປັນທຸລະກິດທີ່ມີມູນຄ່າຫລາຍໃນສະຫາລັດອະເມຣິກາ ແຕ່ສານເຄມີທີ່ໃຊ້ກັນຢ່າງແພ່ຫລາຍໃນສະບູ່ຂ້າເຊື້ອຢ່າງ Triclosan ນັ້ນຖືກເຊື່ອມໂຍງເຖິງຄວາມຕ້ານທານຂອງຢາ ແລະ ການຖືກລົບກວນຂອງລະບົບຮໍໂມນໃນສັດລ້ຽງລູກດ້ວຍນົມ
ໃນການສຶກສາໜຶ່ງພົບຄວາມເປັນໄປໄດ້ທີ່ສານນີ້ຈະເປັນສານກໍ່ມະເຮັງ ຫລືເປັນສານທີ່ເພີ່ມຄວາມສ່ຽງທີ່ກໍ່ໃຫ້ເກີດມະເຮັງໄດ້ ຊຶ່ງຜົນກະທົບທີ່ເປັນອັນຕະລາຍເຫລົ່ານີ້ໄດ້ມີການແຈ້ງໄປຍັງ The U. S. Food and Drug Administration ຫລືອົງການອາຫານ ແລະ ຢາຂອງສະຫາລັດ ທີ່ເບິ່ງແຍງໃນເລື່ອງຄວາມປອດໄພ ແລະ ຂໍ້ຈຳກັດຂອງການໃຊ້ງານແລ້ວ
ການສຶກສານີ້ຕີພິມໃນວາລະສານ the Journal of Antimicrobial Chemotherapy ຊຶ່ງເຫັນເຖິງຜົນກະທົບຕໍ່ສາຍພັນແບກທີເຣຍ 20 ສາຍພັນທີ່ເປັນອັນຕະລາຍ ລວມທັງເຊື້ອ Escherichia coli, Listeria monocytogenes ແລະ Salmonella enteritidis
ຊຶ່ງໃນການທົດລອງນັ້ນໄດ້ເຮັດປະເມີນຄວາມສາມາດໃນການຂ້າເຊື້ອພະຍາດຂອງສະບູ່ຕ້ານເຊື້ອທີ່ມີສ່ວນປະສົມຂອງ Triclosan ໂດຍທຳການລ້ຽງເຊື້ອໃນຈານເພາະເຊື້ອທີ່ມີທັງສະບູ່ຕ້ານເຊື້ອແບກທີເຣຍ ແລະ ສະບູ່ທຳມະດາ ທີ່ອຸນຫະພູມ 22 – 40 ອົງສາ ຮຽນແບບການສຳຜັດນ້ຳອຸ່ນ ແລະ ນ້ຳຮ້ອນເປັນເວລາ 20 ວິນາທີ ຊຶ່ງເປັນໄລຍະເວລາທີ່ອົງການອະນາໄມໂລກແນະນຳໃຫ້ລ້າງມື
ລວມທັງໄດ້ທົດສອບກັບອາສາສະໝັກ 16 ຄົົນທີ່ມືມີການປົນເປື້ອນເຊື້ອແບກທີເຣຍ Serratia marcescens (ສາຍພັນທີ່ມັກພົບໃນຫ້ອງນ້ຳ) ແລະ ໃຫ້ພວກເຂົາລ້າງມືດ້ວຍສະບູ່ທຳມະດາ ແລະ ສະບູ່ຕ້ານເຊື້ອແບກທີເຣຍເປັນເວລາ 30 ວິນາທີດ້ວຍນ້ຳອຸນຫະພູມ 40 ອົງສາ
ສຳລັບການທົດລອງທັງໝົດ ທີມນັກວິໄຈໄດ້ໃຊ້ສະບູ່ຕ້ານເຊື້ອແບກທີເຣຍທີ່ມີສ່ວນປະສົມຂອງ Triclosan 0.3% ຊຶ່ງເປັນຄ່າສູງສຸດທີ່ອະນຸຍາດໃຫ້ຜະລິດໄດ້ໃນຜະລິດຕະພັນທີ່ວາງຂາຍໃນ ຍຸໂຣບ, ແຄນາດາ, ຈີນ ແລະ ຍີ່ປຸ່ນ
ຈາກການທົດລອງພົບວ່າ ບໍ່ມີຄວາມແຕກຕ່າງກັນລະຫວ່າງສະບູ່ຕ້ານເຊື້ອແບກທີເຣຍ ແລະ ສະບູ່ປົກກະຕິ ແຕ່ພົບວ່າ ສະບູ່ຕ້ານເຊື້ອທີ່ມີສ່ວນປະສົມຂອງ Triclosan ນັ້ນມີປະສິດທິພາບຂຶ້ນມາຫລັງຈາກ 9 ຊົ່ວໂມງທີ່ເຊື້ອຈຸລິນຊີແຊ່ຢູ່ ຊຶ່ງນັ້ນດົນເກີນໄປສຳລັບການລ້າງມື
ນັກວິໄຈກ່າວວ່າ ຜູ້ບໍລິໂພກຄວນຈະຮັບຮູ້ວ່າ ສະບູ່ຂ້າເຊື້ອແບກທີເຣຍນັ້ນບໍ່ຮັບປະກັນການປ້ອງກັນພະຍາດ ແລະ ຄວນຈະຫ້າມການເວົ້າເຖິງປະສິດທິພາບທີ່ເກີນຈິງຂອງຜະລິດຕະພັນທີ່ອາດສ້າງຄວາມສັບສົນໃຫ້ກັບຜູ້ບໍລິໂພກໄດ້ Min Suk Rhee ໜຶ່ງໃນທີມວິໄຈເລື່ອງນີ້ກ່າວ