ໂດຍຕອບສະໜອງຕາມຄຳເຊີນຂອງທ່ານເລຂາທິການໃຫຍ່ອົງການສະຫະປະຊາຊາດ ທ່ານ ບັນກີມູນ, ທ່ານປະທານປະເທດແຫ່ງສາທາລະນະລັດປະຊາທິປະໄຕ ປະຊາຊົນລາວ ທ່ານ ຈູມມາລີ ໄຊຍະສອນ ພ້ອມຄະນະ, ໄດ້ເດີນທາງໄປເຂົ້າຮ່ວມກອງປະຊຸມສຸດຍອດອົງການສະຫະປະຊາຊາດເພື່ອຮັບຮອງເອົາວາລະການພັດທະນາຫລັງປີ 2015 ແລະ ກອງປະຊຸມຄົບຄະນະຂອງສະມັດຊາໃຫຍ່ສະຫະປະຊາຊາດຄັ້ງທີ 70 ເຊຶ່ງຈະໄຂຂຶ້ນໃນລະຫວ່າງວັນທີ 25 ກັນຍາ ຫາ ວັນທີ 1 ຕຸລາ 2015 ທີ່ນະຄອນນິວຢອກ, ສະຫະລັດອາເມລິກາ.
ກອງປະຊຸມດັ່ງກ່າວ, ມີປະມຸກລັດ, ຫົວໜ້າລັດຖະບານຈາກ 150 ກວ່າປະເທດເຂົ້າຮ່ວມ, ເພື່ອພ້ອມກັນສະຫລຸບຕີລາຄາການຈັດຕັ້ງປະຕິບັດເປົ້າໝາຍສະຫັດສະວັດດ້ານການພັດທະນາ(MDGs)ຕະຫລອດໄລຍະ 15 ປີຜ່ານມາ ແລະ ພິຈາລະນາຮັບຮອງເອົາວາລະການພັດທະນາຫລັງປີ 2015, ລວມທັງເປົ້າໝາຍການພັດທະນາແບບຍືນຍົງທີ່ກວມເອົາ 3 ດ້ານຄື: ດ້ານເສດຖະກິດ, ສັງຄົມ ແລະ ສິ່ງແວດລ້ອມ, ໂດຍວົງຄະນາຍາດສາກົນຈະຕ້ອງພ້ອມກັນຈັດຕັ້ງປະຕິບັດໃນໄລຍະ 15 ປີຕໍ່ໜ້າ, ພ້ອມນັ້ນ ບັນດາຜູ້ນຳໂລກຍັງຈະໄດ້ແລກປ່ຽນທັດສະນະກ່ຽວກັບບັນຫາທີ່ພົ້ນເດັ່ນໃນໂລກເປັນຕົ້ນ: ການຮ່ວມມືສາກົນເພື່ອການພັດທະນາ, ການຮັກສາສັນຕິພາບ ແລະ ຄວາມໝັ້ນຄົງສາກົນ, ແລະ ທົບທວນຄືນການປະຕິບັດພາລະບົດບາດຂອງອົງການສະຫະປະຊາຊາດໃນໂອກາດສະຫລອງ 70 ປີແຫ່ງການສ້າງຕັ້ງອົງການສະຫະປະຊາຊາດ ແລະ ກຳນົດແນວທາງການປັບປຸງອົງການສະຫະປະຊາຊາດໃນຕໍ່ໜ້າ, ລວມທັງດຳເນີນການປະຕິຮູບອົງການໃຫ້ມີຄວາມສອດຄ່ອງກັບສະພາບເງື່ອນໄຂໃນປັດຈຸບັນ.
ນອກຈາກນັ້ນ, ຄະນະຜູ້ແທນລາວຍັງຈະເຂົ້າຮ່ວມກອງປະຊຸມປິ່ນອ້ອມທີ່ສຳຄັນຕ່າງໆ ແລະ ພົບປະສອງຝ່າຍກັບຄະນະຜູ້ແທນຕ່າງປະເທດຈຳນວນໜຶ່ງ, ຫລັງຈາກເຂົ້າຮ່ວມກອງປະຊຸມສຸດຍອດອົງການສະຫະປະຊາຊາດແລ້ວ,ປະທານປະເທດແຫ່ງ ສປປ ລາວ ຈະໄດ້ເດີນທາງຢ້ຽມຢາມ ສາທາລະນະລັດ ກູບາແຕ່ວັນທີ 2-4 ຕຸລາ 2015 ຕື່ມອີກ.
