ສຳນັກຂ່າວຕ່າງປະເທດລາຍງານວ່າ ໃນວັນທີ 23 ກັນຍາຜ່ານມານີ້ ທ່ານ ຢານຕຸນ ຮອງປະທານາທິບໍດີມຽນມາ ໄດ້ເຂົ້າຮ່ວມພິທີເປີດເຂດເສດຖະກິດພິເສດຕິລາວາ (Thilawa) ໄລຍະທຳອິດ ຊຶ່ງຕັ້ງຢູ່ຫ່າງຈາກນະຄອນຢາງກຸ້ງໃຊ້ເວລາເດີນທາງປະມານ 1 ຊົ່ວໂມງ ໂດຍເຂດເສດຖະກິດພິເສດດັ່ງກ່າວນີ້ ຈະເປັນທີ່ຕັ້ງຂອງໂຮງງານປະມານ 100 ແຫ່ງ ທີ່ສາມາດສ້າງວຽກເຮັດງານທຳໃຫ້ແກ່ຊາວມຽນມາໄດ້ເຖິງ 40,000 ຄົນ ຊຶ່ງໂຄງການດັ່ງກ່າວນີ້ ແມ່ນເປັນການຮ່ວມມືລະຫວ່າງລັດຖະບານມຽນມາ ແລະ ລັດຖະບານຍີ່ປຸ່ນ ໃນມູນຄ່າທັງໝົດ 1,5 ຕື້ໂດລາ.

ທັງນີ້ ມຽນມາກຳລັງວາງແຜນຈະສ້າງເຂດເສດຖະກິດພິເສດຂຶ້ນອີກ 2 ແຫ່ງຢູ່ເມືອງທະວາຍ ທ່າເຮືອທາງພາກໃຕ້ ແລະ ຢູ່ເມືອງຈອກພະຍູ ທາງພາກຕາເວັນຕົກຂອງປະເທດ.