ວັນທີ 22 ກັນຍານີ້ ສະຫະພັນກິລາເພາະກາຍແຫ່ງຊາດ ຮ່ວມກັບບໍລິສັດລາວເວີນ(ສູນການຄ້າລາວໄອເຕັກ)ໄດ້ຈັດພິທີຖະແຫຼງຂ່າວການກະກຽມຈັດການປະກວດກິລາເພາະກາຍປະຈຳປີ 2015 ຂຶ້ນຢູ່ສະມາຄົມນັກຂ່າວແຫ່ງປະເທດລາວ ໂດຍການເຂົ້າຮ່ວມຂອງທ່ານ ບຸນມີ ບັນນະວົງ ປະທານສະຫະພັນກິລາເພາະກາຍແຫ່ງຊາດລາວ, ມີຮອງປະທານສະມາຄົມນັກຂ່າວແຫ່ງປະເທດລາວ ແລະ ນັກກິລາເພາະກາຍເຂົ້າຮ່ວມນຳອີກ.
ປະທານສະຫະພັນກິລາເພາະກາຍແຫ່ງຊາດຖະແຫຼງວ່າ: ການແຂ່ງຂັນປະກວດກິລາເພາະກາຍປະຈຳປີ 2015 ຈະຈັດຂຶ້ນທ້າຍເດືອນຕຸລານີ້, ຢູ່ຕຶກໄອເຕັກມໍຊັ້ນ 7 ໃນນະຄອນຫຼວງວຽງຈັນເລີ່ມເວລາ 19:00 ເປັນຕົ້ນໄປ, ເພື່ອແນໃສ່ສົ່ງເສີມໃຫ້ທຸກຄົນ, ໂດຍສະເພາະແມ່ນໄວໜຸ່ມຫັນມາອອກກຳລັງກາຍເພື່ອສຸຂະພາບ ແລະ ຫ່າງໄກຈາກຢາເສບຕິດ ແລະ ໃຊ້ເວລາຫວ່າງໃຫ້ເປັນປະໂຫຍດຫຼາຍຂຶ້ນ, ພ້ອມທັງເປັນການສົ່ງເສີມການຫຼິ້ນກິລາເພາະກາຍໃນສັງຄົມລາວໃຫ້ນັບມື້ກວ້າງຂວາງ ແລະ ສາມາດເຊື່ອມໂຍງເຂົ້າກບສາກົນເທື້ອລະກ້າວ, ຊຶ່ງການແຂ່ງຂັນຄັ້ງ
ນີ້ຄາດວ່າຈະມີນັກກິລາເພາະກາຍຈາກສູນຝຶກແບບຕ່າງໆໃນນະຄອນຫຼວງວຽງຈັນເຂົ້າຮ່ວມເປັນຈຳນວນຫຼາຍ, ໂດຍການແຂ່ງຂັ້ນຈະຈັດເປັນ 3 ລຸ່ນຄື: ຮຸ່ນ 60-65 ກິໂລ, 65-70 ກິໂລ ແລະ ຮຸ່ນ 71 – 80 ກິໂລ, ນອກນັ້ນ ຍັງຈະມີນັກເພາະກາຍຈາກຕ່າງປະເທດຂຶ້ນສະແດງໃນງານຄັ້ງນີ້ອີກດ້ວຍ, ເພື່ອເຮັດໃຫ້ງານຄັ້ງນີ້ມີບັນຍາກາດຟົດຟື້ນ ແລະ ປະສົບຜົນສຳເລັດໄປດ້ວຍດີ,ດັ່ງນັ້ນ ຈຶ່ງຮຽກຮ້ອງມາຍັງບັນດານັກທຸລະກິດ, ບໍລິສັດຫ້າງຮ້ານຕ່າງໆຈົ່ງໃຫ້ການສະໜັບສະໜູນງານດັ່ງກ່າວດ້ວຍ.
ປະທານສະຫະພັນກິລາດັ່ງກ່າວໃຫ້ຮູ້ ອີກວ່າ: ກິລາເພາະການຖືເປັນພື້ນຖານໃຫ້ກິລາທຸກປະເພດ, ເນື່ອງຈາກເປັນການສ້າງທຸກສ່ວນຂອງຮ່າງກາຍໃຫ້ແຂງແຮງ ແລະ ມັນຈຳເປັນຢ່າງຍິ່ງທີ່ທຸກຄົນຕ້ອງມີຮ່າງກາຍແຂງແຮງ, ເພື່ອສຸຂະພາບທີ່ດີ, ສາມາດຕ້ານທານກັບໂລກໄພໄຂ້ເຈັບຕ່າງໆໄດ້, ຊຶ່ງຜ່ານມາສະຫະພັນກິລາເພາະກາຍຂອງລາວເຮົາເຄີຍປະກວດມາແລ້ວ 2 ຄັ້ງຄື: ໃນປີ 2006 ແລະ ປີ 2009, ພ້ອມນັກກໍຍັງສົ່ງນັກກິລາເຂົ້າຮ່ວມແຂ່ງຂັນໃນມະຫະ ກຳກິລາຊີ ເກມຄັ້ງທີ 27 ແລະ ກໍໄດ້ຮັບຜົນສຳເລັດເປັນຢ່າງດີ, ປັດຈຸບັນກິລາເພາະກາຍແມ່ນໄດ້ຮັບຄວາມນິຍົມຫຼາຍຈາກສັງຄົມເຫັນໄດ້ຈາກການເພີ່ມຂຶ້ນຂອງສູນກິລາເພາະກາຍ, ສະເພາະຢູ່ນະຄອນຫຼວງວຽງຈັນມີເຖິງ 27 ແຫ່ງ ແລະ ຄາດວ່າຈະເພີ່ມຂຶ້ນເລື້ອຍໆໃນອະນາຄົດ.
ແຫລ່ງຂ່າວ:
