ໃນວັນທີ 21 ກັນຍານີ້, ໂຮງຮຽນວິຊາຊີບຄົນພິການສີເກີດ ເມືອງນາຊາຍທອງ ນະຄອນຫລວງວຽງຈັນ ໄດ້ມີພິທີມອບໃບປະກາສະນີຍະບັດ ແລະ ໃບຢັ້ງຢືນໃຫ້ແກ່ນັກສຶກສາທີ່ຮຽນຈົບຢູ່ໂຮງຮຽນດັ່ງກ່າວໃນສົກປີ 2014-2015 ຈໍານວນ 64 ຄົນ, ໃນນັ້ນມີຍິງ 20 ກວ່າຄົນ, ໂດຍການເຂົ້າຮ່ວມຂອງ ທ່ານ ຄໍາເພັດ ມະນີວົງ ຫົວໜ້າສູນການແພດຟື້ນຟູໜ້າທີ່ການ, ກະຊວງສາທາລະນະສຸກ ແລະ ທ່ານຄຸນແມ່ ບຸນຮັກ ສາສີຕະກຸນ ຕາງໜ້າປະທານມູນນິທິສົ່ງເສີມການສຶກສາເຊນປອນເດີຊາດ ໃຫ້ກຽດມອບໃບປະກາສະນີຍະບັດ ແລະ ໃບຢັ້ງຢືນດັ່ງກ່າວ, ເຊິ່ງມີພະນັກງານ, ຄູອາຈານ ແລະ ນັກຮຽນເຂົ້າຮ່ວມເປັນຈໍານວນຫລາຍ.
ຮອງອໍານວຍການໂຮງຮຽນດັ່ງກ່າວໃຫ້ຮູ້ວ່າ: ນັກຮຽນທີ່ຮຽນຈົບໃນສົກປີ 2014-2015 ນີ້, ມີທັງຫລັກສູດລະບົບ 2 ປີສາຂາບໍລິຫານທຸລະກິດ ແລະ ເຕັກໂນໂລຊີຂໍ້ມູນຂ່າວສານແມ່ນໄດ້ຮັບໃບປະກາສະນີຍະບັດທຽບເທົ່າຊັ້ນກາງ ແລະ ຫລັກສູດລະບົບ 1 ປີປະກອບມີສາຂາອີເລັກໂຕຼນິກ, ແກະສະລັກໄມ້, ຕັດຫຍີບ ແລະ ສ້ອມແປງລົດຈັກແມ່ນໄດ້ຮັບໃບຢັ້ງຢືນເພື່ອໃຫ້ພວກເຂົາສາມາດນໍາໃຊ້ໃນການໄປປະກອບອາຊີບຫາລ້ຽງຕົນເອງໄດ້.
ໂຮງຮຽນວິຊາຊີບຄົນພິການສີເກີດແມ່ນໂຄງການຮ່ວມມືລະຫວ່າງສູນການແພດໜ້າທີ່ການ ແລະ ມູນນິທິສົ່ງເສີມການສຶກສາເຊນປອນເດີຊາດແຫ່ງປະເທດໄທ, ໂດຍມູນນິທິດັ່ງກ່າວເປັນຜູ້ສະໜັບສະໜູນທັງໝົດເພື່ອສ້າງໂອກາດໃຫ້ຄົນພິການທາງດ້ານຮ່າງກາຍໃນທົ່ວປະເທດ, ໂດຍສະເພາະຜູ້ທີ່ຫຍຸ້ງຍາກ, ຂາດເຂີນ ແລະ ດ້ອຍໂອກາດໄດ້ຮັບການສຶກສາແລະວິຊາຊີບທີ່ດີເພື່ອໃຫ້ສາມາດນາໄປປະກອບອາຊີບໄດ້.
ແຫລ່ງຂ່າວ:
