ສຳນັກຂ່າວຕ່າງປະເທດ ລາຍງານໃນວັນທີ 21 ກັນຍາຜ່ານມານີ້ວ່າ ກອງທັບຊີຣີ ໄດ້ຍິງລູກສອນໄຟໂຈມຕີໃສ່ກຸ່ມຕິດອາວຸດຢູ່ເຂດອັນ-ຊາ ທາງພາກຕາເວັນອອກຂອງເມືອງອະເລບໂປ ທາງພາກເໜືອຂອງປະເທດຢ່າງໜັກ ຊຶ່ງມີລາຍງານວ່າລູກສອນໄຟໄດ້ໄປຕົກໃນເຂດຕະຫລາດ ຊຶ່ງມີປະຊາຊົນຜູ້ບໍລິສຸດຖືກລູກຫລົງເສຍຊີວິດຈຳນວນຫລາຍ.
ທ່ານ ຣາມີ ອັບເດນ ເຣາະມານ ຫົວໜ້າກຸ່ມສັງເກດການເພື່ອສິດທິມະນຸດໃນຊີຣີ (SOHR) ໄດ້ລະບຸວ່າ ການໂຈມຕີໄດ້ເຮັດໃຫ້ມີຜູ້ໄດ້ຮັບບາດເຈັບຫລາຍສິບຄົນ ຊຶ່ງບາງຄົນຍັງຕິດຢູ່ໃນຊາກຫັກພັງຂອງອາຄານ ໃນຂະນະທີ່ປະຊາຊົນເສຍຊີວິດ 18 ຄົນ.