ກາຍເປັນກະແສດັງໃນໂລກອອນໄລນ໌ເລີຍກໍວ່າໄດ້ ຫລັງຈາກທີ່ມີຂ່າວຂອງ Ahmed Mohamed ເດັກຊາຍມຸດສະລິມອາຍຸ 14 ປີ ທີ່ຖືກເຈົ້າຄູທີ່ໂຮງຮຽນແຈ້ງຕຳຫລວດຈັບ ຫລັງຈາກເຂົ້າໃຈຜິດວ່າ ໂມງທີ່ Ahmed ປະກອບຂຶ້ນມາເອງນັ້ນ ເປັນລະເບີດ
ບໍ່ພຽງເທົ່ານັ້ນ ກະແສຂອງເລື່ອງນີ້ຍັງລາມໄປຢ່າງຕໍ່ເນື່ອງ ຫລັງຈາກມີພາບທີ່ Ahmed ຖືກຕຳຫລວດໃສ່ກະແຈມື ດ້ວຍອາຍຸພຽງແຕ່ 14 ປີ ຊຶ່ງຊາວສະຫາລັດ ຕ່າງລົງຄວາມເຫັນວ່າ ເປັນການກະທຳທີ່ບໍ່ເໝາະສົມ ພຽງເພາະເດັກນ້ອຍຄົນນີ້ ເປັນຊາວມຸດສະລິມ ຈົນເຮັດໃຫ້ຖືກເຊື່ອງໂຍງໄປຍັງເລື່ອງຂອງ ການຫຍຽດເຊື້ອຊາດອີກດ້ວຍ ຊຶ່ງໂລກອອນໄລນ໌ ໄດ້ມີການແທັກ#IStandWithAhmed ເພື່ອໃຫ້ກຳລັງໃຈ Ahmed ກັນຢ່າງຫລວງຫລາຍ
ນອກຈາກນີ້ ຄົນດັງໃນວົງການໄອທີ ເຊັ່ນ Mark Zuckerberg ຍັງໂພດສ໌ໃຫ້ກຳລັງໃຈ ແລະລະບຸອີກດ້ວຍວ່າ ຢາກພົບ Ahmed ຢ່າງຫລາຍ ພ້ອມກັບເຜີຍວ່າ ດ້ວຍທັກສະແລະຄວາມຊອກຮູ້ໃນການສ້າງສັນສິ່ງໃໝ່ໆ ຄວນຈະໄດ້ຮັບການຍົກຍ້ອງ ບໍ່ແມ່ນການຖືກຈັບກຸມ ຊຶ່ງຄົນແບບ Ahmed ຄືຄົົນທີ່ຊາດຕ້ອງການ ອີກທັງ ຍັງໄດ້ຊວນ Ahmed ມາທີ່ Facebook ອີກດ້ວຍ
ປະທານປະເທດ ບາຣັກ ໂອບາມາ ກໍຍັງໂພດສ໌ໃຫ້ກຳລັງໃຈ ແລະເຊີນ Ahmed ມາທຳນຽບຂາວ ພ້ອມກັບບອກວ່າ ໃຫ້ນຳໂມງສຸດຍອດອັນນີ້ມາດ້ວຍເຊັ່ນກັນ
ໂມງປະດິດຂອງ Ahmed ທີ່ຄູແລະຕຳຫລວດ ກ່າວຫາວ່າເປັນ ລະເບີດ
Ahmed ຖືກຈັບໃສ່ກະແຈມື ດ້ວຍອາຍຸພຽງ 14 ປີເທົ່ານັ້ນ
ບໍ່ພຽງເທົ່ານັ້ນ Steve Wozniak ອະດີດຜູ້ຮ່ວມກໍ່ຕັ້ງບໍລິສັດ Apple ຫລັງຈາກທີ່ໄດ້ເຫັນຂ່າວຂອງ Ahmed ກໍໄດ້ເຜີຍວ່າ ຄືກັບກຳລັງອ່ານເລື່ອງຂອງຕົວເອງໃນສະໄຫມເດັກ ເນື່ອງຈາກຕົວເອງກໍເຄີຍປະດິດສິ່ງຂອງແບບນີ້ຄືກັນ
ໂດຍເຜີຍວ່າ ເລື່ອງລາວຂອງ Ahmed ນັ້ນ ເຮັດໃຫ້ຄິດເຫັນຕົວເອງສະໄໝຮຽນຢູ່ໄຮສ໌ຄູນເມື່ອປີ 1967 ຊຶ່ງຕົວເອງໄດ້ປະດິດ Electronic Metronome ຫລືເຄື່ອງເຄາະຈັງຫວະ ແລະນຳໄປໃສ່ໄວ້ໃນລັອກເກີລ໌ຂອງໝູ່ໂດຍຕົວເຄາະຈັງຫວະ ຈະເຄາະໄວຂຶ້ນ ເມື່ອລັອກເກີລ໌ຖືກເປີດອອກ ຊຶ່ງລາວຕ້ອງການໃຫ້ຄົນອື່ນຄິດວ່າ ມັນຄືລະເບີດ
ສ່ວນໃຜຢາກຕິດຕາມເລື່ອງລາວຂອງ Ahmed Mohamed ສາມາດຕິດຕາມເພິ່ມເຕິມໄດ້ທີ່ #IStandWithAhmed