ແອບ Move to iOS ນັບເປັນແອບພິເຄຊັ່ນທຳອິດຂອງ Apple ທີ່ເຮັດໃຫ້ກັບ Android ໂດຍມີຈຸດໝາຍເພື່ອອຳນວຍຄວາມສະດວກໃຫ້ຜູ້ໃຊ້ງານ Android ຍ້າຍຂໍ້ມູນມາຍັງ iOS ໄດ້ງ່າຍໆ ແລະພຽງແຕ່ມື້ດຽວຂອງການເປີດຕົວແອບພິເຄຊັ່ນ Move to iOS ນີ້ ສາວົກແອນດຣອຍກໍພາກັນໄປແຈກ 1 ດາວໃຫ້ກັບແອບນີ້ ພ້ອມສະແດງຄວາມຄິດເຫັນໃນເຊີງລົບຕໍ່ແອບດັ່ງກ່າວ
ປະຈຸບັນຄະແນນຂອງ Move to iOS ຢູ່ທີ່ 1.7 ເຕັມ 5 ຄະແນນ ເນື່ອງຈາກສາວົກ Android ກວ່າໝື່ນສອງພັນຄົນເຂົ້າໄປກົດໃຫ້ຄະແນນໜຶ່ງດາວ ພ້ອມຄອມເມ້ນເຈັບໆຄັນໆເຊັ່ນ “ຄິດວ່າຂ້ອຍເປັນບ້າໄປແລ້ວຫວາ ທີ່ຈະໃຫ້ຍ້າຍຈາກ Android ໄປ iOS ນະ” “ຈິງຈັງເກີນໄປບໍ່? ນີ້ຄິດຈະໃຫ້ຄົນຍ້າຍເຂົ້າໄປຢູ່ໃນລະບົບປິດຢ່າງ iOS ນິຫວາ” “ຮູ້ບໍ່ວ່າເປັນຫຍັງຄົນໃຊ້ iPhone ເຖິງບໍ່ຊັງ Android ຫລາຍເທົ່າທີ່ຄົນໃຊ້ Android ຊັງ iOS ເພາະ Google ເຂົາໃຈກວ້າງເຮັດແອບລົງໃນທຸກ OS ບໍ່ຄື Apple ທີ່ຄິດແຕ່ຈະຫາເງິນແຖມຍັງຂາດຊຶ່ງນະວັດຕະກຳ” ແລະ ອື່ນໆ
ນອກຈາກຄອມເມ້ນໃນເຊີງກັດ Apple ພຽງຢ່າງດຽວ ກໍຍັງມີຜູ້ໃຊ້ງານບາງຄົນລອງໃຊ້ແອບແລ້ວກໍວິຈານວ່າດີໄຊນ໌ບໍ່ດີບໍ່ງາມ ເປີດແອບແລ້ວເຄື່ອງຊ້າ ບໍ່ສາມາດຮອງຮັບກັບ Android ທຸກເຄື່ອງໄດ້ ແຕ່ກໍມີຜູ້ໃຊ້ງານບາງຄົນຄືກັນທີ່ໂຫວດ 5 ດາວໃຫ້ກັບແອບນີ້ ແລ້ວບອກວ່າຕົວແອບມັນກໍບໍ່ໄດ້ມີບັນຫາຫຍັງ ພວກທີ່ໃຫ້ 1 ດາວບໍ່ມັກກັນໄປເອງ
ໃຜຢາກຕາມເຂົ້າໄປອ່ານຄອມເມ້ນຂອງສາວົກ Android ກໍເຂົ້າໄປເບິ່ງໄດ້ທີ່ Playstore ບໍ່ແນ່ວ່ານີ້ອາດຈະກາຍເປັນແອບທີ່ມີຄົນເຂົ້າໄປໃຫ້ 1 ດາວຫລາຍທີ່ສຸດໃນອະນາຄົດອັນໃກ້ນີ້ກໍເປັນໄດ້