ເຫດການດັ່ງກ່າວໄດ້ເກີດຂຶ້ນໃນວັນທີ 15 ກັນຍາ 2015 ຜ່ານມານີ້, ທີ່ບ້ານໂພຄຳ ເມືອງໄຊທານີ ນະຄອນຫລວງວຽງຈັນ ເຊິ່ງຜູ້ກໍ່ເຫດຊື່ທ້າວ ຄຳເມີງ (ຜູ້ເປັນຜົວ) ອາຍຸ 34 ປີອາຊີບກຳມະກອນ ພັກເຊົາຢູ່ບ້ານດັ່ງກ່າວ, ເຊິ່ງໄດ້ກໍ່ເຫດຄາດຕະກຳນາງ ໄມແກ້ວ (ຜູ້ເປັນເມຍ) ອາຍຸ 32 ປີ ຢູ່ບ້ານດອນຕີ້ວ ເມືອງໄຊທານີ ນະຄອນ ຫລວງວຽງຈັນ ຍ້ອນຄວາມຫຶງຫວງ.
ໜ່ວຍງານສືບສວນ-ສອບສວນ ປກສ ໄຊທານີ ນະຄອນຫລວງວຽງຈັນ ໃຫ້ຮູ້ວ່າ: ໃນວັນທີ 16 ກັນຍາຜ່ານມາ, ໄດ້ຮັບແຈ້ງຈາກອຳນາດການປົກຄອງບ້ານດອນຕີ້ວ ວ່າ: ນາງ ໄມແກ້ວ ໄດ້ຫາຍຕົວໄປແຕ່ຕອນເຊົ້າຂອງວັນທີ 15 ກັນຍາຜ່ານມາ, ດັ່ງນັ້ນ ເຈົ້າໜ້າທີ່ ປກສ ເມືອງ ແລະ ອຳນາດການປົກຄອງບ້ານ ຈຶ່ງໄດ້ລົງເກັບກຳຂໍ້ມູນ ແລະ ຊອກຫາແຫລ່ງຂ່າວຈາກພີ່ນ້ອງ, ໝູ່ຄູ່ ຈຶ່ງຮູ້ວ່າ: ນາງ ໄມແກ້ວ ໄດ້ຖືກຂ້າຕາຍແລ້ວ ຢູ່ຫ້ອງເຊົ່າຂອງທ້າວ ຄຳເມີງຢູ່ບ້ານໂພຄຳ ເມືອງໄຊທານີ ແລະ ເຈົ້າໜ້າທີ່ສາມາດນຳຈັບຕົວຜູ້ກະທຳຜິດໄດ້ ທີ່ບ້ານໂພນປ່າເປົ້າ, ເມືອງສີສັດຕະນາກ ນະຄອນຫລວງວຽງຈັນ.
ຜ່ານການສືບສວນ-ສອບສວນ ທ້າວ ຄຳເມີງ ໄດ້ຮັບສາລະພາບວ່າ: ໃນຕອນເຊົ້າຂອງວັນທີ 15 ກັນຍາຜ່ານມາ, ນາງ ໄມແກ້ວ ໄດ້ໄປຫາຕົນຢູ່ຫ້ອງແຖວ ທີ່ບ້ານໂພຄຳ ເມືອງໄຊທານີ, ເຊິ່ງຕົນ ແລະ ເມຍ ກໍໄດ້ດື່ມເບຍ ແລະ ລົມກັນເລັກນ້ອຍ
ຈາກນັ້ນ ຜູ້ເປັນເມຍໄດ້ເວົ້າເຖິງເລື່ອງສາມີເກົ່າ ຂະນະນັ້ນ ຕົນເອງກໍມີອາການມືນເມົາແລ້ວ ຈຶ່ງເກີດໂມໂຫຫຶງຫວງຢ່າງແຮງ ແລະ ໄດ້ບີບຄໍເມຍຈົນເສຍຊີວິດ ຈາກນັ້ນ ໄດ້ເອົາຫົ່ມຜ້າປົກຮ່າງເມຍໄວ້ ແລະ ລ໋ອກປະຕູຫ້ອງໄວ້ ແລ້ວຫລົບໜີໄປພັກເຊົາຢູ່ເຮືອນໝູ່ ແລະ ຖືກເຈົ້າໜ້າທີ່ນຳຈັບໂຕມາດຳເນີນຄະດີ.
ຜ່ານມາ ທ້າວ ຄຳເມີງ ເຄີຍຕ້ອງໂທດມາແລ້ວຫລາຍປີ ໃນຂໍ້ຫາຄາດຕະກຳເມຍ ຢູ່ປະເທດໄທ.
ຂ່າວຈາກ:
