ບໍ່ແນ່ວ່າໃນເດືອນຕຸລາຈະມີຫຍັງທີ່ໜ້າສົນໃຈຫລາຍກວ່າການເປີດຕົວຂອງສະມາດໂຟນຫລາຍໆລຸ້ນແນ່ນອນ ເພາະເບິ່ງຄືວ່າ Sharp ຈະຜະລິດ TV ເຄື່ອງທຳອິດຂອງໂລກທີ່ມີຄວາມລະອຽດລະດັບ 8K ອອກມາວາງຂາຍທີ່ຍີ່ປຸ່ນດ້ວຍລາຄາຄົນລວຍ!
ເຖິງວ່າເທກໂນໂລຍີຄວາມຄົມແຈ້ງລະດັບ 4K ຈະເປັນມາດຕະຖານຂອງ TV ສະໄໝນີ້ໄປແລ້ວແຕ່ Sharp ກໍຍັງຜະລິດ LV-85001 TV ເຄື່ອງທຳອິດຂອງໂລກທີ່ມີຄວາມລະອຽດໜ້າຈໍທີ່ສູງເຖິງ 8K (7,680 x 4,320 ພິກເຊລ) ມີຂະໜາດ 85 ນິ້ວ, ໃຊ້ໜ້າຈໍແບບ IGZO ເພື່ອໃຫ້ຄວາມສະຫວ່າງ ແລະ ລະອຽດຫລາຍກວ່າຈໍ LCD ແຖມຍັງປະຫຍັດພະລັງງານອີກດ້ວຍ, ບໍ່ພຽງເທົ່ານັ້ນ Sharp ຍັງໄດ້ກ່າວອີກວ່າ TV ຕົວນີ້ມີອັດຕາຄວາມແຈ້ງທີ່ 100,000: 1 ແລະ ມີມຸມເບີ່ງ 176 ອົງສາ ເອີ້ນໄດ້ວ່າເປັນ TV ທີ່ຂ້ອນຂ້າງຕອບໂຈດໃຜຫລາຍໆຄົນແນ່ນອນ ແຕ່ການທີ່ຈະໄດ້ພາບຄວາມຄົມແຈ້ງລະດັບ 8K ເຮົາຈຳເປັນທີ່ຈະຕ້ອງຕໍ່ກັບຊ່ອງ HDMI 2.0 ຫລາຍເຖິງ 4 ຊ່ອງ
ນອກຈາກນີ້ TV 8K ກໍຍັງຕ້ອງປະສົບບັນຫາອີກເລື່ອງໜຶ່ງກໍຄື ໃນຕອນນີ້ບໍ່ມີເນື້ອຫາໃດທີ່ອອກອາກາດທີ່ມີຄວາມລະອຽດ 8K ເລີຍແມ່ນແຕ່ຢ່າງດຽວ ແຕ່ເຖິງຈະເປັນແບບນັ້ນ Sharp ກໍໄດ້ເລີ່ມທົດສອບອອກອາກາດໄປແລ້ວໃນການເຜີຍແຜ່ພາບກິລາໂອລິມປິກໃນປີ 2012 ທີ່ຜ່ານມາ ແລະ ບໍ່ແນ່ວ່າເຮົາອາດຈະໄດ້ເຫັນມັນອີກເທື່ອໃນໂອລິມປິກໃນປີ 2016 ທີ່ບຣາຊິນເປັນເຈົ້າພາບ
ແນ່ນອນວ່າ TV ທີ່ມີສະເປັກສຸດຍອດປານນີ້ລາຄາຈະຕ້ອງສູງແນ່ນອນໂດຍ Sharp ຂາຍ TV ເຄື່ອງນີ້ໃນເດືອນໜ້າທີ່ລາຄາ $133,000 ຊຶ່ງເປັນລາຄາທີ່ມີແຕ່ມະຫາເສດຖີ ຫລື ອົງກອນເທົ່ານັ້ນທີ່ສາມາດຈ່າຍໄດ້!