ຫາກເບິ່ງຈາກການພັດທະນາສະມາດໂຟນຂອງ Samsung ມາເລື້ອຍໆຈະເຫັນໄດ້ວ່າ Samsung ນັ້ນມີການພັດທະນາຈໍສະແດງຜົນຂອງສະມາດໂຟນມາຢ່າງຕໍ່ເນື່ອງ.. ຈົນຫລ້າສຸດໄດ້ປ່ອຍ Galaxy Note5 ທີ່ຂຶ້ນຊື່ວ່າເປັນສະມາດໂຟນທີ່ມີຈໍສະແດງຜົນງາມທີ່ສຸດອອກມາໃຫ້ເຮົາໄດ້ຊົມກັນແລ້ວ ແຕ່ເບິ່ງຄືວ່າ Samsung ຈະບໍ່ຢຸດພຽງເທົ່ານັ້ນເພາະມີຂ່າວລືວ່າຕົ້ນປີໜ້າຈະມີສະມາດໂຟນທີ່ມີໜ້າຈໍພັບໄດ້ອອກມາໃຫ້ເຮົາໄດ້ໃຊ້ກັນ
ຈາກທາງເວັບ Weibo ຂອງປະເທດຈີນໄດ້ອ້າງວ່າ ຕົນນັ້ນມີຂໍ້ມູນເຊີງເລິກກ່ຽວກັບໂຄງການໃໝ່ຂອງ Samsung ໃນຊື່ Project Valley ໂດຍໃນໂປຣເຈັກກຳລັງຢູ່ໃນການທົດສອບຈໍສະແດງຜົນແບບໃໝ່ທີ່ມີຄວາມສາມາດໃນການພັບໜ້າຈໍໄດ້ກັບການໃຊ້ CPU ທັງ 2 ລຸ້ນນັ້ນຄື Snapdragon 620 ແລະ Snapdragon 820, RAM 3GB ແລະຮອງຮັບ microSD ຊຶ່ງຄາດວ່າຈະມີການເປີດຕົວໃນເດືອນມັງກອນ 2016
ນອກຈາກນີ້ Weibo ຍັງກ່າວເຖິງ GalaxyS7 ວ່າ ທາງ Samsung ໄດ້ມີການນຳຊິບເຊັດ Snapdragon 820 ມາທົດສອບແທ້! ດັ່ງນັ້ນບໍ່ແນ່ວ່າເຮົາອາດຈະໄດ້ເຫັນ GalaxyS7 ໃນຮູບແບບໃໝ່ທີ່ບໍ່ເຄີຍເຫັນກໍເປັນໄດ້ ແຕ່ຢ່າງໃດກໍຕາມທັງ 2 ຂ່າວນີ້ກໍເປັນພຽງຂ່າວລືທີ່ເຮົາຕ້ອງຖ້າລຸ້ນກັນຕໍ່ໄປ