ຂປລ. ກອງປະຊຸມໃຫຍ່ຜູ້ແທນ ອົງຄະນະພັກກະຊວງການຕ່າງປະເທດ ຄັ້ງທີ III ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ​ ໃນ​ວັນ​ທີ 15 ກັນຍາ 2015 ນີ້ ຢູ່​ສູນ​ຮ່ວມ​ມື​ ​ແລະ ຝຶກ​ອົບຮົມ​ສາກົນ​, ນະຄອນຫລວງ​ວຽງ​ຈັນ ​ພາຍ​ໃຕ້​ການ​ເປັນ​ປະທານ​ຂອງ​ສະຫາຍ ສະ​ເຫລີ​ມ​ໄຊ ກົມມະ​ສິດ ວ່າການ​ເລຂາ​ຄະນະ​ບໍລິຫານ​ງານ​ພັກ​ກະຊວງ​ການ​ຕ່າງປະ​ເທດ, ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ ສະຫາຍ ຈູມ​ມາລີ ​ໄຊ​ຍະ​ສອນ ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະຊາຊົນ​ປະຕິວັດ​ລາວ, ປະທານ​ປະ​ເທດ ​​ແຫ່ງ ສປປ ລາວ, ສະຫາຍ ທອງ​ລຸນ ສີ​ສຸ​ລິດ ກໍາມະການ ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນຕີ, ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ, ມີບັນດາ​ຜູ້​ແທນ​ສົມບູນ​ 201 ສະຫາຍ, ຍິງ 44 ສະຫາຍ ​ເຊິ່ງ​ເປັນ​ຕົວ​ແທນ​ໃຫ້​ສະມາຊິກ​ພັກ ​ກະຊວງ​ການ​ຕ່າງປະ​ເທດ​ທັງ​ໝົດ 685 ສະຫາຍ, ບັນດາ​ແຂກ​ຖືກ​ເຊີນ​ຈາກ​ກະຊວງ, ອົງການ​ອ້ອມ​ຂ້າງ​ສູນ​ກາງ, ສະມາຊິກ​ພັກ​ອາວຸ​ໂສ​ບໍານານ ​ເຂົ້າ​ຮ່ວມ.

ກອງ ​ປະຊຸມ​ຈະ​ໄດ້​ພ້ອມ​ກັນສະຫລຸບຕີ​ລາຄາ​ຄືນ​ ການຊີ້​ນໍາໆພາ​ຂອງ​ອົງຄະ​ນະ​ພັກ​ກະຊວງ​ການ​ຕ່າງປະ​ເທດ ໃນ​ການຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ IX ຂອງ​ສູນ​ກາງ​ພັກ ​ແລະ ມະຕິ​ກອງ​ປະຊຸມ​ໃຫຍ່​ ຄັ້ງ​ທີ II ຂອງ​ອົງຄະ​ນະ​ພັກ​ກະຊວງ​ການ​ຕ່າງປະ​ເທດ​ ໃນ​ໄລຍະ 5 ປີ (2011-2015) ຜ່ານ​ມາ ​ແລະ ວາງ​ທິດ​ທາງຕໍ່​ໜ້າ ​​ແຕ່​ປີ 2016-2020.