ຂປລ. ປັດຈຸບັນ ການກໍ່ສ້າງ ຂົວເບຕົງອັດແຮງ ຂ້າມນ້ຳເຊໂປນ ຫາເມືອງນອງ ມີຫລາຍໜ້າວຽກ ສຳເລັດເປັນສ່ວນໃຫຍ່ ໂດຍລວມ ໜ້າວຽກທັງໝົດ ແມ່ນປະຕິບັດໄດ້ 86%.
ທ່ານ ສະດາເພັດ ພົມມະລາດ ຜູ້ຈັດການ ໂຄງການກໍ່ສ້າງຂົວເບຕົງອັດແຮງຂ້າມນ້ຳເຊໂປນ ໄດ້ລາຍງານ ຕໍ່່ທ່ານ ດຣ ສຸພັນ ແກ້ວມີໄຊ ເຈົ້າແຂວງ ສະຫວັນນະເຂດ ໂອກາດເຄື່ອນໄຫວ ເຮັດວຽກ ໃນວັນທີ 9 ກັນຍາ ນີ້ວ່າ: ຂົວຂ້າມນ້ຳເຊໂປນ ໄດ້ລົງມືກໍ່ສ້າງ ມາແຕ່ວັນທີ 1/4/2013 ແລະ ຄາດວ່າຈະໃຫ້ສຳເລັດ ໃນວັນທີ 30/3/2017, ມີລວງຍາວ ທັງໝົດ 188,7ແມັດ, ລວງກວ້າງໜ້າທາງ 7 ແມັດ, ທາງຄົນຍ່າງເບື້ອງລະ 1,5 ແມັດ ລວມແລ້ວ 10 ແມັດ, ເປັນຂົວເບຕົງອັດແຮງ ສາມາດ ຮັບນ້ຳໜັກໄດ້ 40 ໂຕນ. ສຳລັບໜ້າວຽກ ທີ່ພວມດຳເນີນຢູ່ ແມ່ນການສ້າງຮາວພະນັກຂົວ, ປັບປຸງຫົວຂົວ ກໍ່ສ້າງຕະຝັ່ງກັນເຈື່ອນ, ຈາກນັ້ນແມ່ນ ຈະໄດ້ປູຢາງ ເຂົ້າຫົວຂົວ ທັງສອງສົ້ນລວມ 800 ກວ່າແມັດ ແລະ ຕິດຕັ້ງ ດອກໄຟເຍືອງທາງ ບໍລິເວນຂົວ ອີກຈຳນວນໜຶ່ງ.
ຫາກການກໍ່ສ້າງຂົວ ແຫ່ງນີ້ສຳເລັດ ຈະສ້າງປະໂຫຍດ ອັນມະຫາສານ ໃຫ້ແກ່ການ ພັດທະນາ ພື້ນຖານ ໂຄງລ່າງຂອງເມືອງນອງ ໄດ້ຫລາຍສົມຄວນ ເພາະວ່າຂົວ ທີ່ພວກເຮົາຊົມໃຊ້ ຢູ່ທຸກມື້ນີ້ ແມ່ນເປັນລັກສະນະ ຂົວອູ່, ຮັບນ້ຳໜັກບໍ່ໄດ້ຫລາຍ, ເປັນຂົວທີ່ແຄບ ສະນັ້ນຂົວແຫ່ງໃໝ່ນີ້ ຈະເຮັດໃຫ້ ປະຊາຊົນຊົນ ພໍ່ຄ້າຊາວຂາຍ ພາຍໃນເມືອງສາມາດ ນຳເອົາຜົນຜະລິ ດອອກມາສູ່ຕະຫລາດ ພາຍນອກ ໄດ້ຫລາຍຂຶ້ນ ໂດຍສະເພາະແມ່ນກ້ວຍ, ຢາງໂບງ ແລະ ເຄື່ອງປ່າ ຂອງດົງ ອີກຈຳນວນໜ່ຶງ.
ແຫລ່ງຂ່າວ:
