ມະຫາວິທະຍາໄລແຫ່ງຊາດ (ມຊ) ແມ່ນສູນກາງສຶກສາຊັ້ນສູງລະດັບຊາດ ເຊິ່ງໄດ້ກຳນົດບົດບາດ ແລະ ພາລະໜ້າທີ່ ເພື່ອສ້າງຊັບພະຍາກອນມະນຸດ ໃຫ້ກາຍເປັນນັກບໍລິຫານ ນັກວິຊາການ ແລະ ນັກຄົ້ນຄວ້າວິທະຍາສາດ ທີ່ມີຄວາມຮູ້ຄວາມສາມາດ ມີຄຸນສົມບັດສິນທຳປະຕິວັດ ໂດຍມະຫາວິທະຍາໄລແຫ່ງຊາດ ສ້າງຕັ້ງຂຶ້ນ 1996 ມາຮອດປັດຈຸບັນ ໄດ້ສ້າງນັກສຶກສາລະດັບປະລິນຍາຕີ ຈຳນວນ 15 ຮຸ່ນ ປະລິນຍາໂທ 7 ຮຸ່ນ ແລະ ໃນສົກປີ 2014-2015 ນີ້ ມີຜູ້ສຳເລັດການສຶກສາລະດັບປະລິນຍາເອກຮຸ່ນທຳອິດ ຈຳນວນ 19 ຄົນ.
ພິທີມອບ-ຮັບໃບປະກາສະນິຍະບັດຂອງມະຫາວິທະຍາໄລແຫ່ງຊາດ ປະຈຳສົກປີ 2014-2015 ຈັດຂຶ້ນວັນທີ 13 ກັນຍາ 2015 ຢູ່ທີ່ສະໂມສອນຄະນະເສດຖະສາດ ແລະ ບໍລິຫານທຸລະກິດ ໃຫ້ກຽດມອບຄັ້ງນີ້ ໂດຍທ່ານ ສຈ.ດຣ. ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດ ມີທ່ານ ສຈ.ດຣ. ບຸນຕຽມ ພິດສະໄໝ ປະທານສະພາມະຫາວິທະຍາໄລ ພ້ອມດ້ວຍບັນດາຮອງອະທິການບໍດີ ຄະນະພາກວິຊາ ພະນັກງານ ຄູ-ອາຈານ ແລະ ນັກສຶກສາເຂົ້າຮ່ວມ.
ສຳລັບສົກປີ 2014-2015 ມະຫາວິທະຍາໄລແຫ່ງຊາດ ໄດ້ດຳເນີນການຮຽນ-ການສອນໃນຫຼາຍລະດັບ ເຊິ່ງມີທັງໝົດ 168 ຫຼັກສູດ ປະກອບດ້ວຍຫຼັກສູດປະລິນຍາເອກ 3 ຫຼັກສູດ ປະລິນຍາໂທ 43 ຫຼັກສູດ ປະລິນຍາຕີ 121 ຫຼັກສູດ ແລະ ອະນຸປະລິນຍາຕີ 1 ຫຼັກສູດ ສະເພາະໃນສົກຮຽນ 2014-2015 ມີຜູ້ສຳເລັດການສຶກສາໃນແຕ່ລະຫຼັກສູດ ແລະ ສາຂາວິຊາຕ່າງໆ ຈຳນວນ 7.257 ຄົນ/ຍິງ 2.959 ຄົນ ໃນນັ້ນ ມີລະດັບປະລິນຍາເອກ 19 ຄົນ ປະລິນຍາໂທ 434 ຄົນ ປະລິນຍາຕີ 6.602 ຄົນ ແລະ ອະນຸປະລິນຍາຕີ 202 ຄົນ ເຊິ່ງໃນຈຳນວນ 7 ພັນກວ່າຄົນ ເປັນພະສົງ-ສາມະເນນ ຈຳນວນ 62 ອົງ ນັກສຶກສາກຽດນິຍົມ 32 ຄົນ ແລະ ນັກສຶກສາຕ່າງປະເທດ 129 ຄົນ.
ແຫລ່ງຂ່າວ:
