ພາຍໃນງານ Hey Siri ນັ້ນແອັບເປີ້ນໄດ້ເປີດຕົວອຸປະກອນໃໝ່ໆ ຫລວງຫລາຍ ບໍ່ວ່າຈະເປັນ iPhone 6s, iPhone 6s Plus, AppleTV, iPad Pro ແລະ iPad mini 4 ຊຶ່ງກໍໄດ້ຮັບຄວາມສົນໃຈຈາກຄົນຮັກແອັບເປີ້ນແລະຄົນທົ່ວໄປຂ້ອນຂ້າງຫລາຍ ແລະມື້ນີ້ທາງ Laopost ກໍມີຂໍ້ມູນທີ່ຫລາຍຄົນຢາກຮູ້ແຕ່ອາດຈະຍັງບໍ່ຮູ້ມາຝາກກັນ ຈະມີຫຍັງແດ່ນັ້ນມາເບິ່ງພ້ອມໆ ກັນເລີຍ
1. ຮອງຮັບ Bluetooth 4.2
ອຸປະກອນໃໝ່ທຸກອັນ (ຍົກເວັ້ນ Apple TV) ຈະຮອງຮັບ Bluetooth 4.2 ຊຶ່ງເປັນເວີລ໌ຊັ່ນໃໝ່ຫລ້າສຸດຂອງລະບົບ Bluetooth ປັບປຸງລະບົບຄວາມປອດໄພແລະຄວາມເປັນສ່ວນຕົວ ສົ່ງຂໍ້ມູນໄດ້ໄວຂຶ້ນ 2.5 ເທົ່າ ຊຶ່ງຖືວ່າເປັນສິ່ງທີ່ຈຳເປັນໃນຍຸກ Internet of Things ຈຶ່ງບໍ່ໜ້າແປກໃຈທີ່ iPhone, iPad ແລະ iPod touch ທີ່ເປີດຕົວໃນປີນີ້ຈະຮອງຮັບ Bluetooth 4.2 ກັນທັງໝົດ ແຕ່ກໍໜ້າເສຍດາຍທີ່ Apple TV ລຸ້ນໃໝ່ຍັງຮອງຮັບແຕ່ Bluetooth 4.0 ເທົ່ານັ້ນ
2. iPhone 6s/6s Plus ໜັກກວ່າເກົ່າ
iPhone 6s ແລະ iPhone 6s Plus ຈະມີນ້ຳໜັກທີ່ຫລາຍກວ່າລຸ້ນກ່ອນໜ້າເລັກນ້ອຍ (ປະມານ 15-20 ກຣາມ) ລວມທັງຂະໜາດເຄື່ອງທີ່ໃຫຍ່ຂຶ້ນປະມານ 0.1-0.2 ມມ. ແຕ່ໃນການໃຊ້ງານຈິງອາດບໍ່ຄ່ອຍຮູ້ສຶກແຕກຕ່າງປານໃດ ທັງນີ້ອາດເນື່ອງມາຈາກການເພີ່ມລະບົບ 3D Touch ເຂົ້າໄປ
3. ທີ່ມາຂອງພາບ Wallpaper iPhone 6s
ຮູບພາບ Wallpaper ທີ່ຢູ່ເທິງໜ້າຈໍຂອງ iPhone 6s ໃນງານເປີດຕົວນັ້ນຄືພາບຂອງປາກັດຮາບມູນທີ່ທີມງານແອັບເປີ້ນໄດ້ເດີນທາງມາຖ່າຍພາບເຖິງປະເທດໄທ
4. ກ່ຽວກັບກ້ອງຂອງ iPhone 6s
iPhone 6s ມາພ້ອມກັບກ້ອງທີ່ປະສິດທິພາບດີກວ່າລຸ້ນກ່ອນໜ້າ ບໍ່ວ່າຈະເປັນກ້ອງຫລັງທີ່ຖ່າຍພາບໄດ້ຄວາມລະອຽດສູງສຸດ 12 ລ້ານພິກເຊລ ຮອງຮັບການຖ່າຍພາບພາໂນລາມາຄວາມລະອຽດສູງສຸດ 63 ລ້ານພິກເຊລ (ຈາກແຕ່ກ່ອນ 43 ລ້ານພິກເຊລ) ແລະກ້ອງຫນ້າທີ່ເພີ່ມຈາກ 1.2 ລ້ານພິກເຊລເປັນ 5 ລ້ານພິກເຊລ ຊ່ວຍໃຫ້ຖ່າຍເຊລຟີ່ໄດ້ດີຂຶ້ນ ແຕ່ໜ້າເສຍດາຍທີ່ຟັງຊັ່ນປ້ອງກັນພາບຖ່າຍສັ່ນໄຫວກັບມີສະເພາະໃນ iPhone 6s Plus ເທົ່ານັ້ນ ນອກຈາກນີ້ iPhone 6s ຍັງສາມາດຖ່າຍວິດີໂອ 4K ໄດ້ ແລະມາພ້ອມຟັງຊັ່ນ Playback Zoom ສາມາດຊູມເບິ່ງວິດີໂອທີ່ຖ່າຍມາແບບສະເພາະຈຸດໄດ້
5. iPhone 6s ເຄື່ອງດຽວຍັງຮອງຮັບເຄືອຂ່າຍໄດ້ບໍ່ທົ່ວໂລກ
iPhone 6s ແລະ iPhone 6s Plus ແຕ່ລະລຸ້ນຈະຮອງຮັບສັນຍານ LTE ໄດ້ເກືອບທຸກປະເທດໃນໂລກ ແຕ່ຢ່າງໃນສະຫາຣັດອາເມຣິການັ້ນຈະຕ້ອງເຮັດແຍກອອກເປັນ 2 ລຸ້ນ ຄືລຸ້ນ CDMA EV-DO Rev ທີ່ຮອງຮັບສັນຍານ CDMA ຂອງເຄືອຂ່າຍຢ່າງ Verizon ແລະລຸ້ນທີ່ຮອງຮັບ LTE Band 30 ສຳລັບເຄືອຂ່າຍ AT&T ແຕ່ສຳລັບ iPad mini 4 ແລະ iPad Pro ຈະມີສະເພາະລຸ້ນ CDMA Rev. A ແລະ B ເທົ່ານັ້ນ ແຕ່ບໍ່ມີລຸ້ນ LTE Band 30
6. ປະສິດທິພາບຂອງ iPad mini 4
iPad mini 4 ມີຕົວເຄື່ອງທີ່ບາງແລະເບົາກວ່າເກົ່າ ພ້ອມທັງໜ້າຈໍທີ່ດີກວ່າເກົ່າ ສະແດງສີສັນໄດ້ງາມ ພາບຄົມແຈ້ງ ເຊັ່ນດຽວກັບ iPad Air 2 ແຕ່ສະເປັກອື່ນໆ ກໍຍັງບໍ່ທຽບເທົ່າ iPad Air 2 ຢ່າງຊິບກໍໃຊ້ A8 ແທນທີ່ຈະເປັນ A8X ລວມທັງແບດເຕີຣີ່ທີ່ມີຄວາມຈຸນ້ອຍກວ່າລຸ້ນກ່ອນໜ້າຢູ່ 20% ແຕ່ກໍຍັງດີທີ່ກ້ອງຂອງ iPad mini 4 ນັ້ນມີປະສິດທິພາບທຽບເທົ່າ iPad Air 2
7. iPad Pro ໃຊ້ສາຍສາກຂອງລຸ້ນອື່ນໆໄດ້
iPad Pro ສາມາດໃຊ້ສາຍສາກຮ່ວມກັບ Adapter ຂອງ iPad ລຸ້ນອື່ນໆ ໄດ້ ແຕ່ແບດເຕີຣີ່ຂອງ iPad Pro ນັ້ນມີຄວາມຈຸນ້ອຍກວ່າຂອງ iPad 3 ແລະ iPad 4 ປະມານ 10% ໂດຍບ່ອນສາກຂອງ iPad 4 ນັ້ນມີກຳລັງໄຟ 12 ວັດ ແລະໃຊ້ເວລາສາກປະມານ 5 ຊົ່ວໂມງ ຊຶ່ງຄາດວ່າຖ້ານຳມາໃຊ້ກັບ iPad Pro ໜ້າຈະໃຊ້ເວລາສາກຕ່ຳກວ່າ 5 ຊົ່ວໂມງຢູ່ເລັກນ້ອຍ
8. ກ່ຽວກັບ Smart Keyboard ຂອງ iPad Pro
Smart Keyboard ຂອງ iPad Pro ນັ້ນມີດີໄຊນ໌ຄ້າຍກັບ Fabric Skin Keyboard Folio ທີ່ Logitech ໄດ້ຜະລິດອອກມາສຳລັບໃຊ້ງານກັບ iPad Air ກ່ອນໜ້ານີ້ ໂດຍ Smart Keyboard ສາມາດເຊື່ອມຕໍ່ຫລືຖອດອອກໄດ້ທີ່ Smart Connector ຊຶ່ງຢູ່ບໍລິເວນຂອບຂອງຕົວເຄື່ອງ iPad Pro ແຕ່ດີໄຊນ໌ຂະນະພັບເກັບນັ້ນຍັງເບິ່ງດີບໍ່ເທົ່າຂອງ Logitech ນອກຈາກນີ້ເບິ່ງຄືວ່າ Smart Connector ອາດຖືກອອກແບບມາເພື່ອໃຊ້ກັບ Dock ສາກແບດເຕີຣີ່ຂອງ iPad Pro ໃນອະນາຄົດກໍເປັນໄດ້ ສ່ວນຄີບອດອາດປ່ຽນໄປໃຊ້ການເຊື່ອມຕໍ່ແບບ Bluetooth ແທນ
9. ກ່ຽວກັບ Apple TV ລຸ້ນໃໝ່
Apple TV ລຸ້ນໃໝ່ເປັນ Apple TV ເຄື່ອງທີ່ 4 ມີຄວາມໜາແລະນ້ຳໜັກຫລາຍກວ່າເກົ່າປະມານ 50% ຄາດວ່າໜ້າຈະມາຈາກການເຮັດໃຫ້ຮອງຮັບ Wi-Fi 802.11ac ພ້ອມ MIMO ເພາະຕ້ອງໃຊ້ຕົວຮັບສັນຍານຂະໜາດໃຫຍ່ຂຶ້ນ ຮອງຮັບ Dolby Digital 7.1, HDMI 1.4 ແລະ USB-C ມາພ້ອມແລມ 2GB ຊຶ່ງຄາດວ່າໜ້າຈະສາມາດຫລິ້ນເກມທີ່ພັດທະນາສຳລັບ iPhone 6 Plus ໄດ້ ແຕ່ບໍ່ມີຊ່ອງ Optical Audio ແລ້ວ ຮອງຮັບພຽງແຕ່ Bluetooth 5.0 ແລະຍັງບໍ່ມີການຢືນຢັນວ່າຈະຮອງຮັບກາຫລິ້ນເພງຈາກ iTunes Music ໂດຍບໍ່ຕ້ອງຜ່ານ Apple Music ຫລືບໍ່ ສ່ວນຄວາມຈຸ 32/64GB ນັ້ນຈະມີພຽງພໍຕໍ່ການໃຊ້ງານຫລືບໍ່
10. Apple TV ຈະໃຊ້ Siri Remote ແລະຈອຍຫລິ້ນເກມໄດ້
Siri Remote ສຳລັບໃຊ້ງານກັບ Apple TV ລຸ້ນໃໝ່ຈະມີຊ່ອງ Lightning port ສາມາດສາກແບດເຕີຣີ່ ຊຶ່ງສາມາດໃຊ້ສຽບສາຍຄ້ອງມືທີ່ແອບເປີນຈະຂາຍແຍກໄດ້ ສຳລັບປ້ອງກັນຣີໂມດຫລຸດມືເມື່ອໃຊ້ຫລິ້ນເກມ (ເຊັ່ນດຽວກັບເຄື່ອງ Wii ຂອງນິນເທນໂດ) ນອກຈາກນີ້ຍັງມີຈອຍເກມ Nimbus ຂອງ Steelseries ທີ່ຈະຜະລິດອອກມາຮອງຮັບການຫລິ້ນເກມເທິງ Apple TV ອີກດ້ວຍ ຊຶ່ງໃນອະນາຄົດອາດຈະມີ ຈອຍເກມຫລືອຸປະກອນອື່ນໆ ສຳລັບໃຊ້ຫລິ້ນເກມອອກມາອີກກໍເປັນໄດ້