ໃນວັນທີ 11 ກັນຍານີ້, ຢູ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ ໄດ້ຈັດກອງປະຊຸມປຶກສາຫາລືຮ່າງແຜນບູລິມະສິດປະຊາຄົມວັດທະນະທຳ-ສັງຄົມ ອາຊຽນ ແລະ ບັນດາເນື້ອໃນຕ່າງໆໃຫ້ແກ່ການເປັນປະທານອາຊຽນຂອງລາວ ໃນປີ 2016 ນີ້, ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມຸນຕຣີ ລັດຖະມົນຕີຊ່ວຍ ວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີທ່ານ ປິ່ນປາຖະ ໜາ ພັນທະມາລີ ຫົວໜ້າກົມສື່ມວນຊົນ, ເຈົ້າໜ້າທີ່ອາວຸໂສວັດທະນະທຳ-ສັງຄົມອາ ຊຽນ ແລະ ເຈົ້າໜ້າທີ່ອາວຸໂສຈາກກະຊວງຕ່າງໆເຂົ້າຮ່ວມເປັນຈຳນວນຫລາຍ.
ເຈົ້າໜ້າທີ່ອາວຸໂສວັດທະນະທຳ-ສັງຄົມອາຊຽນຂອງລາວ ໃຫ້ຮູ້ວ່າ: ເພື່ອເປັນການກຽມຄວາມພ້ອມທາງດ້ານເນື້ອໃນໃຫ້ແກ່ການເປັນປະທານອາຊຽນຂອງລາວ ກໍຄືການເປັນປະທານກອງປະຊຸມປະຊາຄົມວັດທະນະທຳ-ສັງຄົມອາຊຽນ ປີ 2016ນີ້, ເຈົ້າໜ້າທີ່ອາວຸໂສທັງ 10 ກວ່າກະຊວງ ໄດ້ຮ່ວມກັນປຶກສາຫາລື ແລະ ແລກປ່ຽນບົດຮຽນໃນການເປັນປະທານອາຊຽນທີ່ຜ່ານມາຂອງບັນດາປະເທດສະມາຊິກຕ່າງໆ ໃນການກໍານົດແຜນບູລິມະສິດຂອງຕົນ, ໃນໄລຍະຜ່ານມາ ຊຶ່ງມີທັງຜົນສຳເລັດ ແລະ ສິ່ງຄົງຄ້າງຕ່າງໆໃນການນຳສະເໜີແຜນບູລິມະສິດຂອງຕົນ ເພື່ອເປັນບົດຮຽນສຳລັບການເປັນປະທານອາຊຽນຂອງລາວມີຜົນສຳເລັດສູງ. ນອກຈາກນີ້ ເຈົ້າໜ້າທີ່ອາວຸໂສຂອງກະຊວງແຮງງານ ແລະ ສະຫວັດດີການ ໄດ້ສະເໜີໃຫ້ຈັດກອງປະຊຸມສຳມະນາກ່ຽວກັບການສົ່ງເສີມວຽກທີ່ມີຄຸນຄ່າ ແລະ ເປັນທຳເພື່ອພັດ ທະນາເສດຖະກິດຊົນນະບົດ,
ກະຊວງສຶກສາທິການ ແລະ ກິລາ ໄດ້ສະເໜີເອົາວຽກການສຶກສາກ່ອນໄວຮຽນ ແລະ ວຽກງານກິລາ ເປັນກິດຈະກຳຕິດພັນກັບການສົ່ງເສີມການຮັກສາສຸຂະພາບ ແລະ ເຈົ້າໜ້າທີ່ອາວຸໂສຂອງຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ໄດ້ສະເໜີຕໍ່ກອງປະຊຸມໃນການແກ້ໄຂບັນຫາລະເບີດບໍ່ທັນແຕກຢູ່ລາວ ແລະ ການຈັດ ສັນພູມລຳເນົາ ແລະ ບ່ອນທຳມາຫາກິນຢ່າງຖາວອນໃຫ້ປະຊາຊົນ, ເພື່ອຫລຸດຜ່ອນ ແລະ ແກ້ໄຂຄວາມທຸກຍາກຂອງເຂົາເຈົ້າໃຫ້ບັນລຸຜົນສຳເລັດໂດຍໄວ, ພິເສດ ສູນກາງສະຫະພັນແມ່ຍິງລາວ ກໍໄດ້ສະເໜີກ່ຽວກັບການສ້າງວຽກເຮັດງານທຳໃຫ້ແມ່ຍິງຜູ້ທຸກຍາກ ແລະ ການເຊື່ອມຊຶມບົດບາດຍິງ-ຊາຍ, ເຂົ້າໃນທຸກຂະແໜງການ ແລະ ສັງຄົມ, ເພື່ອໃຫ້ປະທານກອງປະຊຸມພິຈາລະນາ ແລະ ປັບປຸງໃຫ້ສອດຄ່ອງ.
ແຫລ່ງຂ່າວ:
