ໃນຕອນບ່າຍຂອງວັນສຸກວັນທີ 11 ກັນຍາ 2015 ຢູ່ທີ່ສະຫະພັນບານເຕະແຫ່ງຊາດລາວ ໄດ້ມີພິທີປິດຝຶກອົບຮົມຍົກລະດັບ ກໍາມະການຕັດສິນລະດັບສູງ ພາຍຫລັງເຝິກອົບຮົມມາຕັ້ງແຕ່ວັນຈັນວັນທີ 07 ກັນຍາ 2015 ເປັນກຽດເຂົ້າຮ່ວມພິທີປິດຝຶກອົບຮົມໂດຍ ທ່ານ ຄໍາແພງ ວົງຂັນຕີ ຮອງປະທານສະຫະພັນບານເຕະແຫ່ງຊາດລາວ ເຊິ່ງມີນັກສໍາມະນາກອນ 30 ຄົນໃນນັ້ນເປັນຍິງ 2 ທ່ານ ເຊິ່ງມາຈາກ ມະຫາວິທະຍາໄລແຫ່ງຊາດລາວ ຈໍານວນ 13 ທ່ານ, ແຂວງ ສະຫວັນນະເຂດ 3 ທ່ານ, ແຂວງ ຈໍາປາສັກ 3 ທ່ານ, ກະຊວງ ປ້ອງກັນຄວາມສະຫງົບ 3 ທ່ານ, ກົມກິລາກອງທັບ 1 ທ່ານ, ວິທະຍາໄລສ້າງຄູ ບ.ເກີນ 1 ທ່ານ, ໂຄສະນາອົບຮົມສູນກາງພັກ 1 ທ່ານ, ສູນຝຶກກິລາສີເກີດ 1 ທ່ານ, ແຂວງ ຄໍາມ່ວນ 1 ທ່ານ, ກົມກິລາລະດັບສູງ 1 ທ່ານ ແລະ ສະຫະພັນບານເຕະແຫ່ງຊາດລາວ 2 ທ່ານ.
ໃນການຝຶກອົບຮົມກໍາມະການຕັດສິນລະດັບສູງຄັ້ງນີ້ໂດຍໄດ້ວິທະຍາກອນຈາກຟີຟາມາຊ່ວຍຝຶກອົບຮົມ 2 ທ່ານ ເຊິ່ງໄດ້ສອນທິດສະດີ ແລະ ປະຕິບັດຕົວຈິງ ໃຫ້ກັບນັກສໍາມະນາກອນ ໄດ້ເຂົ້າໃຈເຖິງກົດກະຕິການແຂ່ງຂັນບານເຕະຢ່າງລະອຽດ.
