ຍົກນິ້ວໃຫ້ເລີຍ.. ເດັກຍິງອັງກິດເຊື້ອສາຍອິນເດຍໜ້າຕາງາມ ໄວ 12 ປີ ໄອຄິວສູງເຖິງ 162 ຫລາຍກວ່າ ອັນເບີດ ໄອນ໌ສະໄຕນ໌ ແລະ ສະຕີເຟັ່ນ ຂະນະທີ່ ພໍ່ເຜີຍສ່າ ລູກສາວອ່ານນິຍາຍແຟນຕາຊີເລື່ອງດັ່ງ ‘ແຮລ໌ລີ່ ພອດເຕີລ໌’ 7 ເຫລັ້ມຈົບ ມາແລ້ວເຖິງ 3 ຮອບ
ສຳນັກຂ່າວຕ່າງປະເທດລາຍງານເລື່ອງຮືຮາຂອງເດັກຍິງລີເດຍ ຊີບາດຕຽນ ຊາວອັງກິດເຊື້ອສາຍອິນເດຍ ໄວ 12 ປີ ໃນເມືອງເອເສັກຊ໌ ປະເທດອັງກິດ ທີ່ມີລະດັບປັນຍາ ຫລື IQ (ໄອຄິວ) ສູງເຖິງ 162 ຫລາຍກວ່າ ອັນເບີດ ໄອນ໌ສະໄຕນ໌ ແລະ ສະຕີເຟັ່ນ
ເດິ ກາດຽນ ລາຍງານວ່າ ຈາກການເຮັດບົດທົດສອບທີ່ອອກໂດຍສະມາຄົມເມນຊາ ຊຶ່ງເປັນສະມາຄົມເຟ້ນຫາບຸກຄົນທີ່ມີໄອຄິວສູງນັ້ນ ເດັກຍິງລິເດຍໄດ້ໄປທົດສອບວັດໄອຄິວ ທີ່ວິທະຍາໄລເບິລ໌ເບັກ ນະຄອນຫລວງລອນດອນ ໃນວັນຢຸດ ແລະ ເດັກຍິງໃຊ້ເວລາເຮັດພຽງບໍ່ຈັກນາທີເທົ່ານັ້ນກໍສຳເລັດຮຽບຮ້ອຍ ທີ່ສຳຄັນ ຍັງໄດ້ຄະແນນສູງສຸດ ຊຶ່ງຄິດເປັນ 1% ຂອງຈຳນວນຜູ້ທີ່ມາສອບວັດໄອຄິວທັງໝົດ ໂດຍເດັກຍິງລິເດຍ ຍັງເລົ່າກ່ຽວກັບຂໍ້ສອບຊຶ່ງມີຫລາຍວິຊາ ຢ່າງເຊັ່ນ ພາສາ ລວມທັງການປຽບທຽບແລະ ອື່ນໆ ວ່າ ຕອນທຳອິດ ນາງກໍຮູ້ສຶກງົງໆ ຄືກັນ ແຕ່ກໍເລີ່ມລົງມືເຮັດຂໍ້ສອບທັນທີ ຊຶ່ງຂໍ້ສອບກັບງ່າຍກວ່າທີ່ນາງຄິດໄວ້ຫລາຍ ແລະ ພໍເຮັດໄປ ນາງກໍຮູ້ສຶກສະບາຍ ບໍ່ຄຽດຫຍັງ
ທ້າວລຸນ ຊີບາດຕຽນ ພໍ່ຂອງເດັກຍິງລິເດຍ ເລົ່າເຖິງຄວາມເປັນເດັກສະຕິປັນຍາດີຂອງລູກສາວວ່າ ລິເດຍອ່ານນິຍາຍເລື່ອງແຮລ໌ລີ່ ພອດເຕີລ໌ 7 ເຫລັ້ມຈົບ ໄປແລ້ວເຖິງ 3 ຮອບ ນອກຈາກນັ້ນ ລິເດຍຍັງມີຄວາມສາມາດໃນດ້ານອື່ນໆ ດ້ວຍ ຢ່າງເຊັ່ນ ຫລິ້ນໄວໂອລິນເປັນຕັ້ງແຕ່ອາຍຸ 4 ປີ ແລະ ເລີ່ມເວົ້າຕັ້ງແຕ່ອາຍຸແຄ່ 6 ເດືອນເທົ່ານັ້ນ
ທັງນີ້ ສະມາຄົມເມນຊາ ຖືເປັນສະມາຄົມຂອງຄົົນທີ່ມີໄອຄິວສູງ ທີ່ເກົ່າແກ່ທີ່ສຸດໃນໂລກ ແລະ ທາງສະມາຄົມໄດ້ເປີດກວ້າງໃຫ້ທຸກຄົນສາມາດມາທົດສອບໄອຄິວ ຂະນະທີ່ ໃນຈຳນວນຄົນທີ່ມີໄອຄິວສູງນັ້ນ ມີພຽງປະມານ 2% ຂອງຜູ້ທີ່ມາທົດສອບ ສ່ວນລະດັບປັນຍາ (Intelligence Quotient) ຫລືເອີ້ນສັ້ນໆວ່າໄອຄິວ ໝາຍເຖິງ ຄວາມສະຫລາດທາງປັນຍາ ການຄິດ ການໃຊ້ເຫດຜົນ ການຄິດໄລ່ ການເຊື່ອມໂຍງ ໂດຍໄອຄິວ ເປັນຄວາມໄວຂອງສະຫມອງທີ່ຕິດຕົວມາຕັ້ງແຕ່ເກີດ ປ່ຽນແປງແກ້ໄຂໄດ້ຍາກ ສຳລັບຄົນສ່ວນໃຫຍ່ມີໄອຄິວ 90-110 ຄົົນທີ່ມີໄອຄິວເກີນ 120 ຖືວ່າ ມີໄອຄິວໃນລະດັບສູງ