ຂປລ. ເນື່ອງໃນໂອກາດ ທີ່ ສປປ ລາວ ໄດ້ຮັບກຽດເປັນເຈົ້າພາບ ຈັດກອງປະຊຸມລັດຖະມົນຕີພັດທະນາຊົນນະບົດ ແລະ ລຶບລ້າງຄວາມທຸກຍາກ ອາຊຽນ ຄັ້ງທີ IX ພາຍໃຕ້ຄຳຂວັນ “ສົ່ງເສີມການເປັນຄູ່ຮ່ວມງານກັນ ລະຫວ່າງ ພາກລັດ, ເອກະຊົນ ແລະ ອົງການຈັດຕັ້ງສັງຄົມ ເພື່ອບັນລຸເປົ້າໝາຍ ການພັດທະນາແບບຍືນຍົງຫລັງປີ 2015” ຕິດພັນກັບງານ ລະນຶກວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ເຊິ່ງກອງປະຊຸມຈະຈັດຂຶ້ນ ແຕ່ວັນທີ 13-17 ຕຸລາ 2015 ທີ່ນະຄອນຫລວງວຽງຈັນ.
ທ່ານ ບຸນເຮືອງ ດວງພະຈັນ ລັດຖະມົນຕີປະຈຳ ຫ້ອງວ່າການລັດຖະບານ ປະທານຄະນະ ພັດທະນາຊົນນະບົດ ແລະ ລຶບລ້າງ ຄວາມທຸກຍາກຂັ້ນສູນກາງ ໃນນາມຜູ້ປະສານງານຂອງອາຊຽນ ໄດ້ຂໍເຊີນຊວນ ມາຍັງພີ່ນ້ອງຮ່ວມຊາດ ທຸກຖ້ວນໜ້າໃນທົ່ວປະເທດ ຈົ່ງ ຮ່ວມແຮງຮ່ວມໃຈ ເສີມຂະຫຍາຍສິດເປັນເຈົ້າ ເພື່ອສ້າງຂະບວນການຕ້ອນຮັບ ແລະ ເປັນເຈົ້າພາບທີ່ດີ ໃຫ້ແກ່ກອງປະຊຸມດັ່ງກ່າວ ໃຫ້ໄດ້ຮັບຜົນສຳເລັດອັນຈົບງາມ. ກອງປະຂຸມຄັ້ງນີ້ ຈະມີຕົວແທນຈາກ 10 ປະເທດສະມາຊິກອາຊຽນ ແລະ ຄາດວ່າຈະມີການເຊື້ອເຊີນ ບັນດາປະເທດຄູເຈລະຈາເຂົ້າຮ່ວມນຳ, ໂດຍປະເທດສະມາຊິກ ກໍຈະມີການທົບທວນການຮ່ວມມື ແລະ ນຳສະເໜີ ຜົນການແກ້ໄຂຄວາມທຸກຍາກ ຂອງແຕ່ລະປະເທດ ເພື່ອທອດຖອນບົດຮຽນນຳກັນ, ໃນຂະນະທີ່ ສປປ ລາວ ກໍຈະມີການສະເໜີຜົນສຳເລັດ ແລະ ຂໍ້ຫຍຸ້ງຍາກ ຂອງການແກ້ໄຂຄວາມທຸກຍາກ ໃນໄລຍະຜ່ານມາ ແລະ ສິ່ງສຳຄັນ ບັນດາປະເທດສະມາຊິກ ຈະໄດ້ສຸມໃສ່ປຶກສາຫາລື ແລະ ພ້ອມກັນວາງທິດທາງແຜນການ ເພື່ອຈັດຕັ້ງປະຕິບັດວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກ ກໍຄື ການພັດທະນາແບບຍືນຍົງ ຢ່າງມີປະສິດທິພາບຫລັງປີ 2015 ກໍຄືໃນອະນາຄົດ.
ທ່ານ ບຸນເຮືອງ ດວງພະຈັນ ໃຫ້ຮູ້ຕື່ມວ່າ: ມາຮອດປັດຈຸບັນ ພັກ-ລັດຖະບານ ສປປ ລາວ ໄດ້ມີຜົນສຳເລັດເປັນໜ້າພໍໃຈ ໃນວຽກງານດັ່ງກ່າວ ເນື່ອງຈາກໄດ້ມີການ ສຸມທຶນຮອນ ເຂົ້າໃນການພັດທະນາ ດ້ານພື້ນຖານໂຄງລ່າງ ທັງຕົວເມືອງ ແລະ ຊົນນະບົດ, ເສດຖະກິດຂະຫຍາຍຕົວຢ່າງຕໍ່ເນື່ອງ ສາມາດເຮັດໃຫ້ບັນດາເມືອງ, ບ້ານ ແລະ ຄອບຄົວທຸກຍາກຫລຸດລົງ, ປະຊາຊົນບັນດາເຜົ່າ ມີຊີວິດການເປັນຢູ່ດີຂື້ນເລື້ອຍໆ. ຢ່າງກໍຕາມ ຮັບຮູ້ວ່າຍັງມີປະຊາຊົນ ຈຳນວນບໍ່ໜ້ອຍ ທີ່ ຍັງມີຄວາມຕ້ອງການໃຫ້ລັດຖະບານ ເພີ່ມທະວີການພັດທະນາ ດ້ານພື້ນຖານໂຄງລ່າງໃຫ້ຫລາຍຂຶ້ນ ເພື່ອອຳນວຍຄວາມສະດວກດ້ານຕ່າງໆ ໃຫ້ແກ່ປະຊາຊົນ ໃນການຜະລິດຈຳໜ່າຍສິນຄ້າ, ການຂົນສົ່ງ, ການໄປມາຫາສູ່ ແລະ ອື່ນໆ ເຊິ່ງລັດຖະບານກໍມີ ຄວາມພະຍາຍາມຕະຫລອດມາ ແລະ ຈະສືບຕໍ່ດຳເນີນການແກ້ໄຂໃຫ້ບັນລຸ ຕາມຄາດໝາຍຢ່າງແທ້ຈິງ.
ແຫລ່ງຂ່າວ:
