ສຳນັກຂ່າວຕ່າງປະເທດລາຍງານວ່າ ໂຄສົກກະຊວງການຕ່າງປະເທດກຳປູເຈຍ ໄດ້ເປີດເຜີຍໃນມື້ວັນທີ 8 ກັນຍາຜ່ານມານີ້ ກ່ຽວກັບບໍລິສັດ Mahavir Mandir ຂອງອິນເດຍ ມີແຜນການຈະກໍ່ສ້າງຜາສາດຈຳລອງຄ້າຍຄືກັບຜາສາດຫີນນະຄອນວັດຂອງກຳປູເຈຍນັ້ນ ລັດຖະບານອິນເດຍໄດ້ແນະນຳໃຫ້ບໍລິສັດດັ່ງກ່າວ ປ່ຽນແປງຮູບແບບ ແລະ ໂຄງສ້າງຈາກແຜນເດີມແລ້ວ ເພື່ອຫລີກລ່ຽງບໍ່ໃຫ້ເປັນການຮຽນແບບຜາສາດຫີນນະຄອນວັດຂອງກຳປູເຈຍ.

ທັງນີ້ ບໍລິສັດ Mahavir Mandir ມີແຜນຈະສ້າງຜາສາດຫີນຈຳລອງຂຶ້ນພາຍໃນປະເທດອິນເດຍ  ຊຶ່ງລັກສະນະຄ້າຍຄືກັບຖອດແບບອອກມາຈາກຜາສາດຫີນນະຄອນວັດ ເຮັດໃຫ້ລັດຖະບານກຳປູເຈຍທຳການປະທ້ວງຜ່ານທາງການທູດ ເພື່ອກົດດັນລັດຖະບານອິນເດຍ ກ່ຽວກັບຄວາມພະຍາຍາມດັ່ງກ່າວ.