ສະຫະພັນກິລາເທັນນິສແຫ່ງຊາດລາວ ໄດ້ຈັດການແຂ່ງຂັນກິລາເທັນນິສນາໆຊາດ ຄັ້ງທີ 1 ປະຈຳປີ 2015 ເພື່ອສ້າງຂະບວນການຄຳນັບຮັບຕ້ອນວັນສຳຄັນຕ່າງໆຂອງຊາດ ເວົ້າລວມ, ເວົ້າສະເພາະແມ່ນວັນສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ (2 ທັນວາ 1975 – 2 ທັນວາ 2015) ໃຫ້ມີບັນຍາກາດຟົດຟື້ນ ແລະ ມີຄວາມໝາຍຄວາມສຳຄັນຍິ່ງໆຂຶ້ນ
ຂະນະທີ່ ນາງ ອາລີຍາ ວົງດາລາ ຫຼື “ປູເປ້” ຄວ້າ 1 ຫຼຽນຄຳ ແລະ 1 ຫຼຽນທອງ ປະເພດຍິງດ່ຽວຮຸ່ນ 12 ປີ ແລະ ຄູ່ປະສົມຮຸ່ນ 14 ປີ.
ໃນລະຫວ່າງວັນທີ 5-6 ກັນຍາ ຜ່ານມາ ທີ່ສະໜາມກິລາເທັນນິສເຈົ້າອານຸວົງ ນະຄອນຫຼວງ ວຽງຈັນ, ສະຫະພັນກິລາເທັນນິສແຫ່ງຊາດລາວ ໄດ້ຈັດການແຂ່ງຂັນກິລາເທັນນິສເຍົາວະຊົນນາໆຊາດ ເພື່ອສ້າງຂະບວນການຄຳນັບຮັບຕ້ອນວັນສຳຄັນຕ່າງໆຂອງຊາດ ເວົ້າລວມ, ເວົ້າສະເພາະແມ່ນວັນຊາດ ທີ 2 ທັນວາ ຄົບຮອບ 40 ປີ ທັງເປັນການສົ່ງເສີມນັກກິລາເຍົາວະຊົນລາວ ໃຫ້ໄດ້ມີການເຄື່ອນໄຫວກິລາ ເພື່ອພັດທະນາຕົນເອງທາງດ້ານທັກສະ ກ່ອນກ້າວສູ່ອາຊີບໃນອະນາຄົດ, ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ດາວວອນ ພະຈັນທະວົງ ປະທານສະຫະພັນກິລາເທັນນິສແຫ່ງຊາດລາວ ພ້ອມດ້ວຍຄະນະນຳ, ຄູເຝິກ ແລະ ນັກກິລາແຕ່ລະພາກສ່ວນເຂົ້າຮ່ວມ.
ສຳລັບການແຂ່ງຂັນເທັນນິສຄັ້ງນີ້ ມີນັກກິລາເຂົ້າຮ່ວມທັງໝົດ 28 ຄົນ, ຍິງ 10 ຄົນ, ເຊິ່ງການແຂ່ງຂັນໄດ້ແບ່ງອອກເປັນ 2 ກຸ່ມ ຄື: ກຸ່ມຮຽນໃໝ່ 10 ຄົນ, ຍິງ 6 ຄົນ ແລະ ກຸ່ມຊຳນານແລ້ວ 18 ຄົນ, ຍິງ 4 ຄົນ ໂດຍກຸ່ມຮຽນໃໝ່ ແມ່ນແຂ່ງຂັນແບບປະສົມພົບກັນໝົດ ຜ່ານການແຂ່ງຂັນຜົນປາກົດວ່າ ອັນດັບ 1 ໄດ້ແກ່ ທ້າວ ທະນະພອນ; ອັນດັບ 2 ຮ່ວມ ນາງ ແສງສຸລິຍາ ແລະ ນາງ ເທວາ; ອັນດັບ 3 ຮ່ວມ ທ້າວ ແສງວິໄຊ, ນາງ ນັນທິດາ, ນາງ ກິນນາລີ ແລະ ທ້າວ ວິລະກອນ; ອັນດັບ 4 ຮ່ວມ ນາງ ອານຸລັກ, ທາງ ຈິດດາພາ ແລະ ທ້າວ ພຸດທະບັນດິດ.
ສ່ວນກຸ່ມຊຳນານແລ້ວ ແຂ່ງຂັນ 5 ລາຍການເຊັ່ນກັນ ຄື: ຊາຍດ່ຽວຮຸ່ນອາຍຸບໍ່ເກີນ 10 ປີ, ດ່ຽວຊາຍ-ຍິງຮຸ່ນອາຍຸບໍ່ເກີນ 12 ປີ, ຊາຍດ່ຽວຮຸ່ນອາຍຸບໍ່ເກີນ 14 ປີ ແລະ ຄູ່ປະສົມຮຸ່ນອາຍຸບໍ່ເກີນ 14 ປີ ຜ່ານການແຂ່ງຂັນປະເພດຊາຍດ່ຽວຮຸ່ນ 10 ປີ ຜົນປາກົດວ່າ ທີ 1 ໄດ້ແກ່ ທ້າວ ພູຣິພັດ ວັນນະລາດ, ທີ 2 ທ້າວ ເພັດນະສອນ ໄຊຍະເດດ, ທີ 3 ທ້າວ ສິດທິພົນ ພົມມະວົງ ແລະ ທີ 4 ທ້າວ ທະນະພອນ; ປະເພດຍິງດ່ຽວຮຸ່ນ 12 ປີ ທີ 1 ນາງ ອາລີຍາ ວົງດາລາ, ທີ 2 ນາງ ທິບພະສອນ ປານສີວົງໄຊ, ທີ 3 ນາງ ມະໄລລັກ ດີໄລລາ ແລະ ທີ 4 ນາງ ເພັດນ້ຳໜຶ່ງ ຈັນທຸມພອນ; ປະເພດຊາຍດ່ຽວຮຸ່ນອາຍຸບໍ່ເກີນ 12 ປີ ທີ 1 ທ້າວ ເສດຖະວຸດ ສັນພິບານ, ທີ 2 ທ້າວ ສຸພະວະລິດ ທິບພາວົງພັນ, ທີ 3 ທ້າວ ສິດທິພົນ ພົມມະວົງ ແລະ ທີ 4 ທ້າວ ພູລິພັດ ວັນນະລາດ; ປະເພດຊາຍດ່ຽວຮຸ່ນ 14 ປີ ທີ 1 ທ້າວ ທັດສະພອນ ໄຊຍະເດດ, ທີ 2 ທ້າວ ລັດຕະນະໄຊ ລັດຕະນະວົງ, ທີ 3 ທ້າວ ບຸນມີ ຫົວພັນ ແລະ ທີ 4 ທ້າວ ລັດຕະນະສິນ ລັດຕະນະວົງ; ປະເພດຄູ່ປະສົມ ຮຸ່ນ 14 ປີ ທີ 1 ນາງ ເພັດນ້ຳໜຶ່ງ ຈັນທຸມພອນ + ທ້າວ ເສດຖະວຸດ ສັນພິບານ, ທີ 2 ນາງ ທິບພະສອນ ປານສີວົງໄຊ + ທ້າວ ທັດສະພອນ ໄຊຍະເດດ, ທີ 3 ນາງ ອາລີຍາ ວົງດາລາ + ທ້າວ ສຸພະວະລິດ ທິບພາວົງພັນ ແລະ ທີ 4 ນາງ ມະໄລລັກ ດີໄລລາ + ທ້າວ ວິລະໄຊ ບັນນະວົງ.
ຂອບໃຈພາບແລະຂ່າວຈາກ: ໜັງສືພິມສຶກສາ ແລະ ກິລາ