ວັນ​ທີ 4 ກັນຍາ 2015 ທີ່ສະໜາມ​ບິນ​ສາກົນ​ວັດ​ໄຕ ຄະນະກົມ​ການບິນ​ພົນ​ລະ​ເຮືອນ​ໄດ້ ຕ້ອນຮັບ ນາງ ສຸດາ​ພອນ ວິ​ຊຸນນະ​ຣາດ ນັກ​ບິນ​ເພດ​ຍິງ​ຄົນ​ທຳອິດ​ຂອງ​ລາວ ທີ່​ປະຕິບັດ​ຖ້ຽວ​ບິນທຳ​ອິດ ເຮືອບິນ A320 ນຳ​ໂດຍທ່ານ ຢາ​ກົວ ລໍ​ປາງ​ກາວ ຫົວໜ້າ​ກົມ​ການບິນ​ພົນ​ລະ​ເຮືອນ ມີທ່ານ ສົມ​ສະໄໝ ວິ​ຊຸນ​ນະ​ຣາດ ແລະ ທ່ານ​ນາງ ເລືອງ​ສະໄໝ ເລືອ​ງວັນ​ໄຊ ຮອງ​ຜູ້ອຳນວຍການລັດ​ວິ​ສາ​ຫະ​ກິດ​ການບິນ​ລາວ ພ້ອມ​ດ້ວຍ​ພະນັກງານ​ຈຸ​ບິນ.

ໃນ​ທ້າຍ​ເດືອນ​ກັນຍາ 2013 ໄດ້​ເດີນທາງ​ໄປ​ປະເທດ​ຝຣັ່ງ ທີ່ເມືອງຕູ​ລູ​ເຊີ ເພື່ອ​ເລີ່ມ​ຕົ້ນ​ຊີວິດນັກຮຽນ​ການບິນ ຈົນ​ຮອດ​ວັນ​ທີ 15 ເມສາ 2014 ສາມາດ​ຊອບປ່ອຍ​ບິນ​ດ່ຽວ​ທີ່​ເອີ້ນ​ວ່າ Solo Flight ດ້ວຍ​ເຮືອບິນ​ຈັກ​ດຽວ​ໄດ້ ຫຼັງ​ຈາກ​ນັ້ນ ໄດ້​ສືບຕໍ່​ຮຽນ​ທາງດ້ານ​ທິດ​ສະ​ດີ​ການບິນ ແລະ ເຝິກອົບຮົມ​ເຮືອບິນ 2 ຈັກ ແລະ ບິນ​ກາງຄືນ ດ້ວຍ​ຜົນສຳເລັດ ແລະ ໄດ້​ຮັບ​ໃບ​ປະກາດ​ເປັນ​ນັກບິນ​ການ​ຄ້າ Commercial Pilot ໃນ​ວັນ​ທີ 16 ເມສາ 2015 ແລ້ວສືບຕໍ່​ເຝິກອົບຮົມເອົາ​ຊະນິດ​ເຮືອບິນ​ໂດຍສານ A320 ສຳເລັດ ໃນ​ວັນ​ທີ 18 ກໍລະກົດ 2015 ຈາກ​ນັ້ນ ໄດ້​ເຝິກອົບຮົມ​ການບິນທາງ​ດ້ານ​ກົດໝາຍ​ການບິນ​ຂອງລາວ ແລະ ຂໍ້​ກຳນົດ​ກົດ​ລະບຽບວ່າ​ດ້ວຍ​ການບິນ​ພົນ​ລະ​ເຮືອນລາວ ທີ່​ກົມ​ການບິນ​ລາວ ແລະ ເລີ່ມ​ຕົ້ນ​ຊີວິດ​ນັກ​ບິນ Airline Pilot (APL) ນັບ​ແຕ່​ວັນ​ທີ 4 ກັນຍາ 2015 ນີ້​ເປັນຕົ້ນ​ໄປ ໂດຍ​ທີ່​ຕ້ອງສະ​ສົມ​ປະສົບ​ການ​ໃນ​ການບິນຂຶ້ນ-ລົງກັບ​ອາຈານ 60 ຄັ້ງ ແລະ ສອບເສັງ​ຜ່ານ ​ຈຶ່ງ​ຈະ​ໄດ້ເປັນ​ນັກ​ບິນ​ຊ່ວຍ (First Office) ໄດ້​ຢ່າງ​ສົມບູນ​ແບບ ໃນ​ຖ້ຽວ​ບິນແຕ່​ສະໜາມ​ບິນ​ສາກົນ​ວັດ​ໄຕຫາສະໜາມ​ບິນ​ຫຼວງ​ພະ​ບາງ.

ນາງ ສຸດາ​ພອນ ກ່າວ​ວ່າ: ເສັ້ນທາງ​ຂອງ​ຊີວິດ​ນັກ​ບິນ​ຍັງຍາວ​ໄກ ເຊິ່ງ​ຈະ​ເຝິກຝົນ​ຫຼໍ່​ຫຼອມຕົນ​ເອງ ​ໃຫ້​ກາຍເປັນ​ນັກ​ບິນ​ທີ່​ມີຄວາມ​ສາມາດ​ທີ່​ຄ່ອງ​ແຄ້ວ-ປອດ​ໄພ ກາຍເປັນ​ພະນັກງານທີ່​ມີ​ຄຸນສົມບັດ ມີ​ຄວາມ​ຮູ້​ຄວາມສາມາດ​ສູງ​ຂອງ​ບໍລິສັດ ເຊິ່ງ​ຜົນສຳເລັດ​ຂອງ​ຂ້າພະເຈົ້າ​ໃນ​ມື້ນີ້ ໄດ້​ສະແດງ​ໃຫ້​ເຖິງ​ຄວາມ​ສາມາດ ຊື່​ສຽງ​ຂອງ​ສະຫະພັນ​ແມ່ຍິງ ແລະ ການ​ຍົກ​ບົດບາດ​ຂອງແມ່ຍິງ​ລາວ ​ເທົ່າ​ທຽມ​ກັບ​ເພດຊາຍ​ໃນ​ຂະແໜງການ​ບິນ ແລະ ເປັນ​ແບບຢ່າງ​ທີ່​ດີ​ໃຫ້​ແກ່​ຊາວໜຸ່ມ​ເຍົາວະ​ຊົນ​ຮຸ່ນ​ຫຼັງ ໃນ​ການຕັ້ງໜ້າ​ສຶກ​ສາ​ຄົ້ນຄວ້າ​ຮ່ຳຮຽນ ຫັນ​ມາ​ສົນໃຈ​ອາຊີບ​ນັກ​ບິນ ແລະ ກຽມພ້ອມ​ທີ່​ຈະ​ກາຍເປັນ​ກະ​ດູ​ສັນຫຼັງທີ່​ແຂງ​ແກ່ນ​ຂອງ​ປະເທດ ເພື່ອ​ພ້ອມ​ກັນ​ພັດທະນາ​ຊາດລາວ​ເຮົາ ໃຫ້​ຈະເລີນ​ຮຸ່ງເຮືອງ ແລະ ກ້າວ​ຂຶ້ນ​ສູ່​ສັງຄົມ​ນິຍົມ​ຢ່າງສະຫງ່າ​ງາມ.

ແຫລ່ງຂ່າວ: