ມາຮອດວັນທີ 1 ກັນຍາ 2015 ລັດວິສາຫະກິດລົດເມ ນະຄອນຫຼວງວຽງຈັນ (ນວ) ໄດ້ສຳເລັດການຍົກຍ້າຍ ແລະ ຈັດສັນບ່ອນຈອດລົດເມຊົ່ວຄາວ ຢູ່ສະຖານີລົດເມສາທາລະນະ (ຂົວດິນ) ເພື່ອຈະໄດ້ກະກຽມລົງມືກໍ່ສ້າງສະຖານີລົດເມໃໝ່ ທີ່ຈະໄດ້ເລີ່ມຈັດຕັ້ງປະຕິບັດນັບແຕ່ທ້າຍປີ 2015 ເປັນຕົ້ນໄປ ແລະ ຈະໃຫ້ສຳເລັດພາຍໃນ 4 ປີ ໂດຍແມ່ນບໍລິສັດ ຈິດຈະເລີນກໍ່ສ້າງ ຈຳກັດ ເປັນຜູ້ສຳປະທານ ເຊິ່ງສະຖານີລົດເມໃໝ່ແຫ່ງນີ້ ຈະສ້າງເປັນອາຄານ 12 ຊັ້ນ ຊັ້ນລຸ່ມຈະເປັນບ່ອນຈອດລົດເມ ເມື່ອເຖິງເວລານັ້ນ ຈະເຮັດໃຫ້ ນວ ພວກເຮົາໄດ້ສະຖານີລົດເມທີ່ໄດ້ມາດຕະຖານ.
ທ່ານ ວິລະພອນ ຜາທອງບານ ພະນັກງານວິຊາການປະຈຳຢູ່ສູນບໍລິການລົດເມສາທາລະນະ (ຂົວດິນ) ຂອງລັດວິສາຫະກິດລົດເມ ນວ ໄດ້ກ່າວວ່າ: ໂດຍປະຕິບັດຕາມການເຫັນດີຂອງຂັ້ນເທິງ ແລະ ອີງໃສ່ບ່ອນຈອດລົດຊົ່ວຄາວ ມີສະຖານທີ່ຄັບແຄບ ດັ່ງນັ້ນ ທາງລັດວິສາຫະກິດລົດເມ ນວ ໄດ້ຍົກຍ້າຍສະຖານີລົດເມຊົ່ວຄາວຢູ່ 2 ຈຸດຄື: ຈຸດທີ 1 ຫຼື ເອີ້ນວ່າຈຸດ B ແມ່ນຫຍັບມາດ້ານຂ້າງເບື້ອງທາງອອກລົດເມສະຖານີເກົ່າແຄມທາງຄູ ວຽງ ເຊິ່ງຈຸດນີ້ໄດ້ກຳນົດເອົາລົດເມ 5 ສາຍທາງຄື: ລົດເມສາຍທາງຕ່າງປະເທດລາວ-ໄທ ທ່າງ່ອນ ດົງຄຳຊ້າງ ດອນປ່າໃໝ່ ແລະ ດົງໂດກ ເວລາລົດເມອອກ ຈະລ້ຽວຂວາຢູ່ຈຸດໄຟແດງ ສ່ວນຈຸດທີ 2 ເອີ້ນວ່າຈຸດ C ແມ່ນຢູ່ຈຸດເສັ້ນທາງແພດສາດບ່ອນຈຸດລົດຕຸກໆ-ຈຳໂບ້ເກົ່າ ຈຸດນີ້ມີລົດເມ 9 ສາຍທາງຄື: ໜອງແຕ່ງ ນ້ຳຊ່ວງ ເພຍລາດ ປາກຊາບ ທ່າເດື່ອ ໂພນຕ້ອງ ທົ່ງປົ່ງ ໜອງທາ ແລະ ຄິວລົດເມສາຍເໜືອ ແລະ ເວລາລົດເມແຕ່ລະສາຍອອກ ກໍ່ຈະລ້ຽວຂວາຕາມເສັ້ນທາງຂຶ້ນຕະຫຼອດ ໂດຍລວມແລ້ວລົດເມແຕ່ລະສາຍທາງເວລາອອກກໍ່ລ້ຽວຂວາ ແລະ ເວລາເຂົ້າຄິວກໍ່ໃຫ້ລ້ຽວຂວາຕະຫຼອດ ທັງນີ້ກໍ່ເພື່ອບໍ່ໃຫ້ມີຄວາມສັບສົນ ຈະບໍ່ໄດ້ຂ້າມທາງໃນເວລາເຂົ້າຄິວ.
ສຳລັບການຈັດສັນສະຖານທີ່ບ່ອນຂາຍເຄື່ອງ ໃຫ້ພໍ່ຄ້າຊາວຂາຍທີ່ຂາຍຢູ່ຕາມແຄມທາງອອກລົດເມສະຖານີເກົ່າ ເສັ້ນທາງຄູວຽງແມ່ນໄດ້ຍົກຍ້າຍໃຫ້ໄປຂາຍຢູ່ຕາມແຄມທາງຄູວຽງ ເບື້ອງປ້ອມຕຳຫຼວດ ກົງກັນຂ້າມກັບຄິວລົດຊົ່ວຄາວຈຸທີ 1 ສ່ວນພໍ່ຄ້າຊາວຂາຍທີ່ຂາຍເຄື່ອງຢູ່ດ້ານໃນຂອງສະຖານີລົດເມເກົ່າ ໃນຜ່ານມານັ້ນ ປັດຈຸບັນແມ່ນຍັງບໍ່ທັນມີສະຖານທີ່ຮອງຮັບໃຫ້ເຂົາເຈົ້າຂາຍເທື່ອ.
ທ່ານ ວິລະພອນ ຜາທອງບານ ຍັງກ່າວຕື່ມວ່າ: ການຍົກຍ້າຍສະຖານີລົດເມຊົ່ວຄາວຄັ້ງນີ້ ເບື້ອງຕົ້ນ ກໍ່ຄືໄລຍະນີ້ແມ່ນມີຄວາມສັບສົນພໍສົມຄວນ ເພາະວ່າສະຖານີຊົ່ວຄາວແມ່ນມີສະຖານທີ່ຄັບແຄບ ແລະ ປະລິມານລົດກໍ່ຫຼາຍ ດັ່ງນັ້ນ ຈຶ່ງໄດ້ເອົາເຈົ້າໜ້າທີ່ຕຳຫຼວດຈະລາຈອນ ແລະ ພາກສ່ວນກ່ຽວຂ້ອງ ຍທຂ ມາຊ່ວຍໃນການຈັດສັນຄວາມເປັນລະບຽບຮຽບຮ້ອຍ ໂດຍໄດ້ຍົກຍ້າຍບ່ອນຈອດລົດຕຸກໆ-ຈຳໂບ້ອອກໄປຢູ່ບ່ອນໃໝ່ ແລະ ບໍ່ໃຫ້ລົດຕຸກໆ-ຈຳໂບ້ມາຈອດຢູ່ສອງຟາກຕາມແຄມທາງຄູວຽງ ຈຸດບໍລິເວນບ່ອນຈອດລົດເມ ເນື່ອງຈາກ ວ່າທາງລັດວິສາຫະກິດລົດເມ ໄດ້ນຳໃຊ້ແຄມທາງຈຸດດັ່ງກ່າວເປັນບ່ອນຈອດລົດເມສະລໍຖ້າເຂົ້າຄິວ ຈຶ່ງບໍ່ຢາກໃຫ້ມີຄວາມສັບສົນ ແລະ ສ້າງຄວາມບໍ່ສະດວກໃຫ້ແກ່ຜູ້ບໍລິການ ນອກຈາກນີ້ ເສັ້ນທາງທີ່ເຂົ້າມາແຕ່ສະຖານທູດຝຣັ່ງ ສູ່ເສັ້ນທາງຄູວຽງປັດຈຸບັນ ໄດ້ເອົາເສັ້ນທາງດັ່ງກ່າວເປັນບ່ອນຄິວລົດເມຊົ່ວຄາວ ຖືວ່າພາຫະນະຈະຜ່ານບໍ່ໄດ້ອີກແລ້ວ ແຕ່ວ່າຜູ້ທີ່ມີຈຸດປະສົງຈະໄປເສັ້ນທາງຄູວຽງ ແມ່ນໃຫ້ໄປນຳໃຊ້ເສັ້ນທາງທີ່ລ້ຽວເຂົ້າຢູ່ບໍລິສັດ ນິວຈິບເຊັງ ອັນໜຶ່ງອີກໃນປັດຈຸບັນນີ້ ທາງລັດວິສາຫະກິດລົດເມ ນວ ກໍ່ໄດ້ມີການເອົາໃຈໃສ່ປະຊາສຳພັນ ຜູ້ໂດຍສານໃຫ້ມີຄວາມລະມັດລະວັງໃນການໄປມາ ຢູ່ຈຸດສະຖານີລົດເມຊົ່ວຄາວທັງສອງຈຸດ ເປັນຕົ້ນກໍ່ແມ່ນການຍ່າງຂ້າມທາງ ນອກນີ້ ກໍ່ຍັງແຈ້ງມາຍັງຜູ້ທີ່ຈະໃຊ້ບໍລິການລົດເມສາທາລະນະ ກໍ່ໃຫ້ຕິດຕາມສາຍທາງລົດເມແລ່ນຢູ່ສອງສະຖານີໃຫ້ດີ ເພື່ອບໍ່ໃຫ້ມີຄວາມສັບສົນການບໍລິການ.
ແຫລ່ງຂ່າວ:
