ການຂັບລົດໃນໄລຍະກາງຄືນຖືວ່າເປັນສິ່ງທີ່ຫລາຍໆທ່ານນັ້ນພົບເປັນປະຈຳ ບໍ່ວ່າຈະຂັບລົດໄປທ່ຽວຕ່າງແຂວງທີ່ຕ້ອງໃຊ້ໄລຍະເວລາເດີນທາງດົນ ຫລືແມ່ນແຕ່ການຂັບລົດກັບເຮືອນໃນໄລຍະທີ່ເລີກວຽກເດິກ ຊຶ່ງການຂັບລົດໃນກາງຄືນນີ້ສິ່ງທີ່ຫລາຍໆທ່ານພົບນັ້ນກໍຄື ອາການເຫງົານອນ ສາຍຕາບໍ່ສູ້ແສງ ໃນມື້ນີ້ເຮົາຈະເບິ່ງເທກນິກໃນການຂັບລົດກາງຄືນ
- ຮູ້ຕົວເອງກ່ອນຂັບສະເໝີ
ການຮູ້ຕົວເອງສະເໝີ ຖືວ່າເປັນເລື່ອງທີ່ສຳຄັນເພາະການຂັບລົດເວລາກາງຄືນນັ້ນເຮົາຈະຕ້ອງພົບກັບ ອາການເຫງົານອນ ອາການເໜື່ອຍ ຈົນອາດຈະເຮັດໃຫ້ເກີດອາການຫລັບໃນໄດ້ ຊຶ່ງວິທີການແກ້ນັ້ນ ຖ້າຮູ້ສຶກວ່າບໍ່ໄຫວແທ້ໆ ກໍໃຫ້ເຂົ້າປ໊ຳນ້ຳມັນລ້າງໜ້າ ເພື່ອໃຫ້ເກີດຄວາມສົດຊື່ນ ແມ່ນແຕ່ການຈອດນອນກໍຖືວ່າເປັນອີກວິທີທີ່ດີ ແຕ່ກໍຄວນລະມັດລະວັງຄວາມປອດໄພໃນຂະນະທີ່ຈອດນອນນຳຕື່ມ
- ຂັບໃຫ້ຫ່າງລົດທີ່ມີພຶດຕິກຳແປກໆ
ໃນເມື່ອເຮົາມີຄວາມພ້ອມໃນການຂັບຂີ່ແລ້ວ ອີກສິ່ງທີ່ຄວນທີ່ຄວນລະວັງກໍຄື ຜູ້ຮ່ວມທາງທີ່ມີພຶດຕິກຳແປກໆ ໃນຂະນະທີ່ຂັບຂີ່ບໍ່ວ່າຈະເປັນການຂັບໄວຜິດປົກກະຕິ ຂັບລ້ຽວໄປມາ ຂັບລົດກິນເລນ ເມື່ອພົບຜູ້ທີ່ຂັບລົດໃນລັກສະນະແບບນີ້ຄວນລະມັດລະວັງໃຫ້ດີ
- ກ່ອນຂັບດ້ວຍຄວາມໄວຄວນເບີ່ງທາງໃຫ້ລະອຽດ
ການຂັບລົດດ້ວຍຄວາມໄວນັ້ນຕ້ອງກວດເບີ່ງທາງໃຫ້ລະອຽດກ່ອນ ເພາະໃນແຕ່ລະເສັ້ນທາງນັ້ນຈະມີສະພາບເສັ້ນທາງທີ່ແຕກຕ່າງກັນ ແລະຍິ່ງຖ້າຂັບໃນເສັ້ນທາງທີ່ມີຄວາມມືດ ແລ້ວບໍ່ມີລົດສວນມາກໍຄວນໃຊ້ໄຟສູງຊ່ວຍເພື່ອໃຫ້ເບິ່ງເຫັນຫລາຍຂຶ້ນ
- ລະມັດລະວັງຕາມແຍກ
ຕາມທາງແຍກກໍຖືວ່າເປັນອີກຈຸດທີ່ຄວນຕ້ອງມີຄວາມລະມັດລະວັງເປັນຢ່າງຫລາຍໃນການຂັບຂີ່ຊ່ວງກາງຄືນເພາະໃນບາງເທື່ອອາດຈະມີລົດລ້ຽວອອກມາໂດຍບໍ່ໄດ້ສົນໃຈໃນເລື່ອງສັນຍານໄຟ ຫລືລົດທີ່ລ້ຽວມາທີ່ແຍກ ທາງທີ່ດີເມື່ອເຖິງ 4 ແຍກຄວນຫລຸດຜ່ອນຄວາມໄວຊະລໍໜ້ອຍໜື່ງເພື່ອເບິ່ງວ່າຈະມີລົດອອກມາຫລືບໍ່
- ເຄົາລົບກົດຈະລາຈອນ
ເລື່ອງຂອງການຂັບຂີ່ເຄົາລົບກົດຈະລາຈອນນັ້ນບໍ່ວ່າຈະກາງເວັນ ຫລື ກາງຄືນ ນັ້ນກໍຄວນເຮັດຄືກັນທັງໝົດເພາະສາເຫດຂອງການເກີດອຸປະຕິເຫດໃນຫລາຍໆເທື່ອນັ້ນມາຈາກການຂັບລົດທີ່ບໍ່ເຄົາລົບກົດຈະລາຈອນ
