ສຳນັກຂ່າວໄທຣັດ ລາຍງານໃນວັນທີ 7 ກັນຍານີ້ວ່າ ເວລາປະມານ 8:30 – 9:00 ໂມງຂອງມື້ນີ້ (7 ກັນຍາ) ໄດ້ເກີດມີລູກໄຟຂະໜາດໃຫຍ່ລຸກຂຶ້ນເທິງທ້ອງຟ້າ ຊຶ່ງສາມາດເບິ່ງເຫັນໄດ້ໃນຫລາຍພື້ນທີ່ຂອງບາງກອກ ແລະ ຫລາຍແຂວງທາງພາກກາງຂອງປະເທດໄທ ກ່ອນທີ່ຈະມີຄັວນໃນລັກສະນະເປັນທາງຍາວໃຫ້ເຫັນຢ່າງຊັດເຈນ.

ດຣ ສະຣັນ ໂປດຍະຈິນດາ ຮອງຜູ້ອຳນວຍການສະຖາບັນວິໄຈດາລາສາດແຫ່ງຊາດໄທ ໄດ້ອອກມາເປີດເຜີຍວ່າ ປະກົດການດັ່ງກ່າວນີ້ ອາດເກີດຈາກວັດຖຸຂະໜາດນ້ອຍທີ່ມາຈາກນອກໂລກ ຊຶ່ງເອີ້ນວ່າສະເກັດດາວຕົກ ຫລື ອຸກກາບາດ ຜ່ານຊັ້ນບັນຍາກາດຈົນເກີດໄຟເຜົາໄໝ້ ຖືເປັນເລື່ອງປົກກະຕິທີ່ເກີດຂຶ້ນ ແລະ ບໍ່ມີອັນຕະລາຍຫຍັງ ຂໍໃຫ້ປະຊາຊົນຢ່າຕື່ນຕົກໃຈ.