ຂປລ. ນັບແຕ່ນີ້ຈົນເຖິງປີ 2020 ແຂວງອັດຕະປຶ ຈະສູ້ຊົນເຮັດໃຫ້ ຜະລິດຕະພັນພາຍໃນ GDP ໃຫ້ໄດ້ສະເລ່ຍ 2.900 ໂດລາສະຫະລັດ ຕໍ່ຄົນ/ປີ ຈາກ 1.700 ໂດລະສະຫະລັດຕໍ່ຄົນ/ປີ ໃນປັດຈຸບັນ, ລວມຍອດຜະລິດຕະພັນພາຍໃນ ຂະຫຍາຍຕົວສະເລ່ຍ 14% ຕໍ່ປີ, ໃນນັ້ນ ກະສິກໍາ–ປ່າໄມ້ 8%, ອຸດສາຫະກໍາ 13,40% ແລະ ບໍລິການ 15-20% ຕໍ່ປີ, ອັດຕາເງິນເຟີ້ ໃຫ້ຢູ່ໃນລະດັບທີ່ເໝາະສົມ 5%, ສູ້ຊົນປະຕິບັດລາຍຮັບ ເຂົ້າງົບປະມານ ທັງໝົດໃຫ້ໄດ້ໃນ ລະຫວ່າງ 10-15% ຂອງGDP, ດຸນງົບປະມານໃຫ້ຢູ່ໃນລະດັບບໍ່ເກີນ 5-10%, ຄວາມຕ້ອງການທຶນ ເພື່ອການພັດທະນາປະມານ 50% ຫລືປະມານ 7,1 ພັນຕື້ກີບ, ສູ້ຊົນເຮັດໃຫ້ມູນຄ່າການສົ່ງອອກ ຂະຫຍາຍຕົວໃນລະດັບບໍ່ຫລຸດ 15% ແລະ ການນໍາເຂົ້າບໍ່ເກີນ 10%. ນີ້ແມ່ນບາງຄໍາເຫັນຂອງທ່ານ ແຄນທອງ ສີສຸວົງ ຮອງເຈົ້ົາແຂວງໆ ອັດຕະປື ກ່າວຕໍ່ກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງອັດຕະປື ເມື່ອບໍ່ດົນມໍ່ມານີ້.
ທ່ານ ຮອງເຈົ້າແຂວງໆອັດຕະປື ກ່າວຕື່ມວ່າ: ເພື່ອຢາກເຮັດໄດ້ຕາມ ຕົວເລກເປົ້າໝາຍດັ່ງ ກ່າວນັ້ນ ແຂວງອັດຕະປື ຈະສືບຕໍ່ເປີດກວ້າງ ການຮ່ວມມືກັບສາ ກົນ ດ້ວຍຫລາຍຮູບຫລາຍສີ, ເປັນເຈົ້າການຕາມທິດທາງ ຕ່າງຝ່າຍຕ່າງມີຜົນປະໂຫຍດ, ສ້າງເງື່ອນໄຂເອື້ອອໍານວຍ ໃຫ້ແກ່ການເຊື່ອມໂຍງກັບພາກພື້ນ, ນໍາໃຊ້ທ່າແຮງທີ່ບົ່ມຊ້ອນ ແລະ ຂໍ້ໄດ້ປຽບຂອງແຂວງ, ຮັບປະກັນ ການພັດທະນາທີ່ຍືນຍົງ, ມີຄວາມສອດຄ່ອງກົມກຽວ ລະຫວ່າງການພັດທະນາ ເສດຖະກິດ-ວັດທະນະທໍາ ແລະ ການປົກປັກຮັກສາສິ່ງແວດລ້ອມ,ທັງ ເປັນເຈົ້າການຮັບມືກັບ ໄພທໍາມະຊາດຢ່າງທັນການ, ຮັບປະກັນການພັດທະນາ ຊົນນະບົດຮອບດ້ານ ຕິດພັນກັບການແກ້ໄຂຄວາມທຸກຍາກ, ພັດທະນາ ຊັບພະຍາກອນມະນຸດ ໃຫ້ມີຄຸນນະພາບ, ສ້າງກໍາລັງແຮງງານໃຫ້ມີສີມື, ມີລະບຽບວິໄນ ແລະ ອົດທົນ, ສ້າງໃຫ້ໄດ້ຊ່ຽວຊານ ທາງດ້ານວິຊາການ ແລະ ເຕັກນິກ, ສ້າງຄວາມເຂັ້ມແຂງໃຫ້ແກ່ພະນັກງານລັດ, ວິສາຫະກິດ ແລະ ຜູ້ປະກອບການ ສາມາດແຂ່ງຂັນໄດ້ຢູ່ພາຍໃນ ແລະ ຕ່າງປະເທດ, ຮັກສາສະຖຽນລະພາບ ທາງດ້ານການເມືອງ, ຮັບປະກັນຄວາມສະຫງົບ ແລະ ມີຄວາມເປັນລະບຽບ ຮຽບຮ້ອຍໃນສັງຄົມ ຢ່າງໜັກແໜ້ນ, ມີຄວາມສາມັກຄີປອງດອງ ປະຊາທິປະໄຕຍຸຕິທໍາ ແລະ ສີວິໄລ.
ແຫລ່ງຂ່າວ:
