ກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງການເງິນ ໄດ້ອັດລົງດ້ວຍຜົນສຳເລັດສະຫງ່າງາມ ໃນວັນທີ 4 ກັນຍານີ້, ພາຍຫລັງໄດ້ດໍາເນີນມາເປັນເວລາ 2 ວັນ, ໂດຍໄດ້ເປັນເອກະພາບປ່ອນບັດເລືອກເອົາ ຄະນະບໍລິຫານງານພັກຊຸດໃໝ່ຈໍານວນ 15 ສະຫາຍ ແລະ ໃນນັ້ນໄດ້ເລືອກເອົາສະຫາຍ ດຣ. ລຽນ ທີແກ້ວ ເປັນເລຂາຄະນະບໍລິຫານງານພັກ ກະຊວງດັ່ງກ່າວອີກຄັ້ງໃໝ່, ສະຫາຍບຸນໂຈມ ອຸບົນປະເສີດ ເປັນຮອງເລຂາຄະນະ ແລະ ທັງເປັນປະທານກວດກາ, ສະຫາຍ ທຸມ ຄຳພານິດ ແລະ ສະຫາຍ ບຸນທົງ ໝັ້ນອານົງ ເປັນຮອງປະທານກວດກາ.
ໃນໂອກາດນີ້, ສະຫາຍ ດຣ. ບຸນປອນ ບຸດຕະນະວົງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດມະຫາພາກ ແລະ ບໍລິການ ກໍໄດ້ໃຫ້ກຽດໂອ້ລົມແນະນໍາຄະນະພັກຊຸດໃໝ່ ໃຫ້ເອົາໃຈໃສ່ຊີ້ນຳ-ນຳພາການເມືອງແນວຄິດ ແລະ ການຈັດຕັ້ງປະຕິບັດວຽກງານ ວິຊາສະເພາະໃຫ້ມີຜົນສຳເລັດດີກວ່າເກົ່າ ແລະ ເນັ້ນໃຫ້ມີການແບ່ງໜ້າທີ່ຮັບຜິດຊອບ ວຽກງານໃຫ້ລະອຽດຈະແຈ້ງ ແລະ ເອົາໃຈໃສ່ປັບປຸງແບບແຜນວິທີເຮັດວຽກ ຂອງຄະນະພັກໃຫ້ດີ, ໂດຍຍຶດຖືຫລັກການລວມສູນປະຊາທິປະໄຕ ໃຫ້ເຂັ້ມງວດ, ເອົາໃຈໃສ່ເສີມຂະຫຍາຍທ່າແຮງການນຳພາລວມ ຂອງໝູ່ຄະນະ, ທ່າແຮງສະຕິປັນຍາແລະ ຫົວຄິດປະດິດສ້າງຂອງບຸກຄົນ, ປະຕິບັດລະບອບປະຊຸມ ແລະ ລາຍງານສ່ອງແສງ, ຂໍຄວາມເຫັນຂອງຄະນະພັກໃຫ້ເຂັ້ມງວດ, ມີການກວດກາວຽກງານໃນແຕ່ລະໄລຍະ ນັບທັງໝູ່ຄະນະ ແລະ ຄວາມຮັບຜິດ ຊອບຂອງບຸກຄົນ ເພື່ອສົ່ງເສີມດ້ານດີ ແລະ ປັບປຸງແກ້ໄຂຈຸດອ່ອນຄົງຄ້າງຕ່າງໆ ໃຫ້ມີປະສິດທິຜົນ ແລະ ເປັນຮູບປະທຳ. ພ້ອມນີ້ ສະຫາຍ ດຣ. ບຸນປອນ ບຸດຕະນະວົງ ຍັງໄດ້ເນັ້ນວ່າ: ຄະນະພັກຊຸດໃໝ່ ຕ້ອງຖືຄວາມສາມັກຄີເປັນປຶກແຜ່ນ, ເປັນແບບຢ່າງນຳໜ້າ, ມີຄຸນສົມບັດສິນທຳປະຕິວັດ, ມີຄວາມປອດໃສຂາວສະອາດ ໃນການປະຕິບັດໜ້າທີ່ວຽກງານ ແລະ ການດຳລົງຊີວິດ, ຍາມໃດກໍໃຫ້ຖືເອົາຜົນປະໂຫຍດ ຂອງປະເທດຊາດ ແລະ ຂອງສ່ວນລວມ ຢູ່ເໜືອຜົນປະໂຫຍດສ່ວນຕົວ ແລະ ຫວັງຢ່າງຍິ່ງວ່າ ອົງຄະນະພັກກະຊວງພ້ອມດ້ວຍພະນັກງານ -ລັດຖະກອນທຸກຖ້ວນໜ້າ ຈະສາມາດຍາດໄດ້ຜົນສຳເລັດອັນໃໝ່ ທີ່ຍິ່ງໃຫຍ່ກວ່າເກົ່າ ໃນການປະຕິບັດໜ້າທີ່ການເມືອງ ທີ່ໄດ້ຮັບມອບໝາຍ, ສ້າງລະບົບການເງິນ -ງົບປະມານຂອງປະເທດຊາດ ໃຫ້ເຂັ້ມແຂງໝັ້ນຄົງ ແລະ ທັນສະໄໝ, ເປີດກວ້າງການຮ່ວມມືກັບສາກົນ ບົນພື້ນຖານໄດ້ຮັບຜົນປະໂຫຍດຮ່ວມກັນ ເພື່ອຮັບໃຊ້ການພັດທະນາ ເສດຖະກິດ-ສັງຄົມ ໃຫ້ບັນລຸຄາດໝາຍຂອງພັກ ແລະ ລັດ ທີ່ໄດ້ວາງໄວ້ເປັນຢ່າງດີ.
ຂ່າວຈາກ:
