ວັນທີ່ 2 ກັນຍາທີ່ຜ່ານມາ ສຳນັກຂ່າວຕ່າງປະເທດ ລາຍງານກໍລະນີທີ່ມີຮ່າງກາຍໄຮ້ວິນຍານລຶກລັບ ຄ້າຍສັດປະຫລາດ ຊຶ່ງມີລັກສະນະກະໂຫລກຫົວແປກປະຫລາດ ຕົກຢູ່ໃນລັກສະນະສະພາບຮ່າງແຫ້ງ ບໍລິເວນຊາຍຝັ່ງແມ່ນ້ຳແຫ່ງໜຶ່ງ ບໍ່ໄກຈາກທີ່ຕັ້ງຂອງໂຮງໄຟຟ້ານິວເຄຍໃນປະເທດຣັດເຊຍ
ແນ່ນອນວ່າ ເມື່ອມີການພົບຊາກປິດສະໜາທີ່ມີລັກສະນະແປກປະຫລາດ ຍ່ອມມີການຕັ້ງຂໍ້ສັງເກດວ່າອາດຈະເປັນສິ່ງຊີວິດຈາກນອກໂລກ ຫລື ຊາກສັດ ຫລື ມະນຸດຕ່າງດາວ ຊຶ່ງແມ່ນແຕ່ຜູ້ຊ່ຽວຊານ ຍັງບໍ່ສາມາດສະແດງຄວາມຄິດເຫັນໃດໆ ກ່ຽວກັບເລື່ອງດັ່ງກ່າວໄດ້ໃນຂະນະນີ້
ທັງນີ້ລາຍງານລະບຸວ່າ ໃນຕອນທຳອິດ ຊາວບ້ານທີ່ອາໄສຢູ່ໃນລະແວກດັ່ງກ່າວ ຄິດວ່າຊາກທີ່ພົບ ເປັນຊາກຂອງຕົວອ່ອນມະນຸດ ເນື່ອງຈາກມີຂະໜາດນ້ອຍເກີນກວ່າຈະເປັນຊາກເດັກນ້ອຍທົ່ວໄປ ແຕ່ຮູບລັກສະນະຍັງມີຄວາມແຕກຕ່າງທາງກາຍະພາບຂອງມະນຸດຢູ່ຫລາຍ ໂດຍຊາກດັ່ງກ່າວ ໄດ້ຖືກນຳມາພິສູດໂດຍຜູ້ຊ່ຽວຊານຈາກສະຖາບັນຊີວະຟິສິກສ໌ ໃນເມືອງຄັດໂນຍາດຄ໌ ໃນໄຊເບຣີ
ແຕ່ວ່ານັກວິໄຈອອກມາໃຫ້ຄວາມເຫັນວ່າ ເຖິງແມ່ນຊາກທີ່ພົບ ຈະມີລັກສະນະຄ້າຍປາເຄິ່ງໄກ່ ແຕ່ໃນຄວາມເປັນຈິງນັ້ນ ຊາກບໍ່ມີຄວາມຜູກພັນທາງສາຍພັນຂອງສັດທັງສອງຊະນິດ ທັງຍັງມີກະໂຫລກຫົວທີ່ແປກປະຫລາດ ບໍ່ມີລຳຄໍ ແລະ ປີກ
ຢ່າງໃດກໍຕາມ ນັກວິໄຈທາງສິ່ງມີຊີວິດນອກໂລກ ຢືນຢັນວ່າ ຊາກດັ່ງກ່າວ ບໍ່ແມ່ນຊາກຂອງສິ່ງມີຊີວິດທີ່ອາໄສຢູ່ເທິງໂລກນີ້ຢ່າງແນ່ນອນ ທັງນີ້ຈະມີການນຳຮ່າງດັ່ງກ່າວ ສົ່ງໄປຍັງນະຄອນຫລວງມົດສະກູ ເພື່ອພິສູດດີເອັນເອຫາຄວາມຈິງຕໍ່ໄປ