ສຳນັກຂ່າວຕ່າງປະເທດລາຍງານວ່າ ທີມນັກວິໄຈຈາກມະຫາວິທະຍາໄລບຣາຊິນໄດ້ອອກມາເປີດເຜີຍວ່າ ພິດຈາກຕົວຕໍ່ພັນໂພລີເບຍ ພໍລິດຕາ (Polybia paulista) ສາມາດນຳໄປໃຊ້ຕໍ່ສູ້ກັບມະເຣັງໄດ້ ໂດຍຈາກການທົດລອງໃນຫ້ອງປະຕິບັດການພົບວ່າ ພິດຈາກຕົວຕໍ່ຊະນິດນີ້ສາມາດຂ້າເຊລມະເຣັງໄດ້ໂດຍທີ່ບໍ່ສົ່ງຜົນຮ້າຍຕໍ່ເຊລປົກກະຕິ
ງານວິໄຈຊິ້ນນີ້ຕີພິມໃນວາລະສານ Biophysical Journal ໂດຍທີມວິໄຈໃຊ້ໜູໃນການທົດລອງແລ້ວພົບວ່າ ສານພິດ MP1 ທີ່ຢູ່ໃນພິດຂອງຕໍ່ຊະນິດນີ້ ສາມາດກວດຈັບ ແລະ ທຳລາຍເຊລມະເຣັງໄດ້ ໂດຍເຮັດໃຫ້ເຊລມະເຣັງຂັບໂມເລກຸນຂອງສານທີ່ສຳຄັນອອກມາ
ທີມວິໄຈຍັງບອກຕື່ມອີກວ່າ ການຄົ້ນພົບເທື່ອນີ້ອາດມີປະໂຫຍດຕໍ່ການພັດທະນາວິທີປິ່ນປົວພະຍາດມະເຣັງແບບປະສົມຜະສານ ຊຶ່ງເປັນການປິ່ນປົວດ້ວຍຢາຄອບຄູ່ໄປກັບການປິ່ນປົວດ້ວຍການໂຈມຕີສ່ວນຕ່າງໆ ຂອງເຊລມະເຣັງໄປພ້ອມໆກັນ ຢ່າງໃດກໍຕາມ ງານວິໄຈຊິ້ນນີ້ຍັງຢູ່ໃນຂັ້ນເລີ່ມຕົ້ນ ແລະ ຈະຕ້ອງມີການສຶກສາໃຫ້ລະອຽດເພື່ອຫາວິທີການປິ່ນປົວທີ່ເໝາະສົມ ແລະ ປອດໄພສຳລັບມະນຸດຕໍ່ໄປ
ສຳລັບຕົວຕໍ່ສາຍພັນໂພລີເບຍ ພໍລິດຕາ ເປັນຕົວຕໍ່ສາຍພັນທີ່ມີນິໄສໂຫດຮ້າຍ ແລະ ມີຖິ່ນກຳເນີດຢູ່ທາງພາກຕະເວັນອອກສຽງໃຕ້ຂອງບຣາຊິນ