ຊຳຊຸງເປີດຕົວ SleepSense ອຸປະກອນທີ່ຈະຊ່ວຍເບິ່ງແຍງການນອນຫລັບ ພ້ອມທັງຄວບຄຸມອຸປະກອນຕ່າງໆ ພາຍໃນເຮືອນໃຫ້ອັດຕະໂນມັດ
ເມື່ອວັນທີ່ 3 ກັນຍາ 2015 ຊຳຊຸງໄດ້ເປີດຕົວ SleepSense ອຸປະກອນທີ່ຈະຊ່ວຍເຮັດໃຫ້ການນອນຫລັບຂອງເຈົ້າສະມາດຫລາຍຂຶ້ນ ຫລັບສະບາຍເຕັມອິ່ມ ດ້ວຍຄຳແນະນຳຕ່າງໆ ຈາກ SleepSense ທີ່ຈະຄອຍຖ້າກວດຈັບລັກສະນະການນອນຫລັບຂອງເຈົ້າໃນຂະນະທີ່ກຳລັງນອນຫລັບ ເຊັ່ນການເຄື່ອນໄຫວຮ່າງກາຍ ການຫາຍໃຈ ໄລຍະເວລາການນອນແລະ ອື່ນໆ ວ່າຄວນຈະປັບປຸງຮູບແບບການນອນຢ່າງໃດໃຫ້ມີຄຸນນະພາບຊີວິດທີ່ດີຂຶ້ນ ພ້ອມທັງຊ່ວຍປຸກໃຫ້ເຈົ້າຕື່ນໃນຕອນເຊົ້າໄດ້ຢ່າງສົດຊື່ນ ພຽງແຕ່ວາງ SleepSense ໄວ້ບ່ອນນອນແລະເຊື່ອມຕໍ່ກັບສະມາດໂຟນ ກໍສາມາດໃຊ້ງານຟັງຊັ່ນຕ່າງໆ ຜ່ານແອັບພິເຄຊັ່ນໄດ້ທັນທີ
ນອກຈາກຈະເຮັດຫນ້າທີ່ເປັນຜູ້ຊ່ວຍແນະນຳການນອນຫລັບທີ່ດີແລ້ວ SleepSense ຍັງສາມາດຊ່ວຍຄວບຄຸມອຸປະກອນຕ່າງໆ ພາຍໃນເຮືອນໃນຂະນະທີ່ເຈົ້ານອນຫລັບໄດ້ອີກດ້ວຍ (ເບື້ອງຕົ້ນຢືນຢັນແຕ່ວ່າຈະຮອງຮັບສະເພາະອຸປະກອນຂອງຊຳຊຸງ) ເຊັ່ນ ປິດ TV ໃຫ້ອັດຕະໂນມັດເມື່ອນອນຫລັບ ຄວບຄຸມອຸນຫະພູມຂອງເຄື່ອງປັບອາກາດ ຫລອດໄຟ ກ້ອງວົງຈອນປິດແລະ ອື່ນໆ ດ້ວຍການກວດຈັບຂອງເຊນເຊີແລະເຊື່ອມຕໍ່ຜ່ານແອັບ SamsungSmartThings ຊຶ່ງທຸກສິ່ງທຸກຢ່າງສາມາດເຮັດວຽກໄດ້ໃນຂະນະທີ່ເຈົ້ານອນຫລັບ
ທັງນີ້ສຳລັບລາຄາຂອງ SleepSense ນັ້ນຍັງບໍ່ມີການເປີດເຜີຍໃນຂະນະນີ້ ໂດຍຈະເລີ່ມວາງຈຳໜ່າຍໃນເກົາຫລີໃຕ້ກ່ອນເປັນບ່ອນທຳອິດໃນປາຍປີນີ້