ຂປລ. ໃນວັນທີ 28 ສິງຫາ 2015 ນີ້, ກະຊວງການຕ່າງປະເທດ ໄດ້ຈັດຕັ້ງພິທີ ມອບ-ຮັບ ໜ້າທີ່ລະຫວ່າງ ທ່ານ ທອງລຸນ ສີສຸລິດ, ເລຂາຄະນະບໍລິຫານງານພັກ ກະຊວງການຕ່າງປະເທດ ຜູ້ເກົ່າ ແລະ ທ່ານ ສະເຫລີມໄຊ ກົມມະສິດ, ຜູ້ວ່າການເລຂາຄະນະບໍລິຫານງານພັກ ກະຊວງການຕ່າງປະເທດ ຜູ້ໃໝ່, ປະກາດແຕ່ງຕັ້ງ ທ່ານ ແສງເພັດ ຮຸ່ງບຸນຍວງ ເປັນຮອງເລຂາຄະນະ ບໍລິຫານງານພັກກະຊວງ. ພ້ອມດຽວກັນນັ້ນ ກໍໄດ້ປະກາດແຕ່ງຕັ້ງລັດຖະມົນຕີຊ່ວຍວ່າການ ກະຊວງການຕ່າງປະເທດ ຄົນໃໝ່ ອີກ 3 ທ່ານ ຄື: ທ່ານ ແສງເພັດ ຮຸ່ງບຸນຍວງ ອະດີດ ຫົວໜ້າກົມຈັດຕັ້ງ-ພະນັກງານ ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ ອະດີດຮອງຫົວໜ້າຄະນະພົວພັນ ຕ່າງປະເທດສູນກາງພັກ ແລະ ທ່ານນາງ ຄຳເພົາ ເອິນທະວັນ ອະດີດຫົວໜ້າຫ້ອງການ ກະຊວງການຕ່າງປະເທດ.
ໃນໂອກາດດັ່ງກ່າວ ທ່ານ ທອງລຸນ ສີສຸລິດ ກຳມະການ ກົມການເມືອງ ສູນກາງພັກ ຮອງນາຍົກລັດຖະມົນຕີ ລັດຖະມົນຕີວ່າການ ກະຊວງການຕ່າງປະເທດ, ໄດ້ໃຫ້ກຽດໂອ້ລົມ ແລະ ຍ້ອງຍໍຊົມເຊີຍ ສະຫາຍ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການ ກະຊວງການຕ່າງປະເທດ ທີ່ໄດ້ຮັບແຕ່ງຕັ້ງເປັນຜູ້ວ່າການ ເລຂາຄະນະບໍລິຫານງານພັກ ກະຊວງການຕ່າງປະເທດ ຈາກກົມການເມືອງສູນກາງພັກ ແລະ ບັນດາສະຫາຍ ທີ່ໄດ້ຮັບການແຕ່ງຕັ້ງ ໃຫ້ດຳລົງຕຳແໜ່ງເປັນ ລັດຖະມົນຕີຊ່ວຍວ່າການ ໃນຄັ້ງນີ້. ພ້ອມທັງຊີ້ນຳໃຫ້ຜູ້ວ່າການ ເລຂາຄະນະບໍລິຫານງານພັກ, ຮອງເລຂາຄະນະພັກ, ບັນດາສະຫາຍ ລັດຖະມົນຕີຊ່ວຍວ່າການຄົນໃໝ່ ໃຫ້ສືບຕໍ່ເອົາໃຈໃສ່ ຊີ້ນຳ-ນຳພາ ດ້ານການເມືອງແນວຄິດ ໃຫ້ແກ່ພະນັກງານ, ວຽກງານວິຊາສະເພາະ ແລະ ວຽກງານຄົ້ນຄວ້າ ໃນການເປັນເສນາທິການໃຫ້ຂັ້ນເທິງ ເພື່ອສືບຕໍ່ນຳເອົານະໂຍບາຍ ການຕ່າງປະເທດ ຂອງພັກ-ລັດ ໄປຈັດຕັ້ງຜັນຂະຫຍາຍ, ໂດຍສະເພາະແມ່ນ ການປະຕິບັດບັນດາ ມະຕິຂອງກອງປະຊຸມວຽກງານ ການຕ່າງປະເທດ ຄັ້ງທີ 12 ແລະ ເນື້ອໃນຂອງກອງປະຊຸມໃຫຍ່ ຄັ້ງທີ 3 ຂອງອົງຄະນະພັກ ກະຊວງການຕ່າງປະເທດ ທີ່ຈະໄຂຂຶ້ນໃນໄວໆນີ້ ໃຫ້ປະກົດຜົນເປັນຈິງ. ເພື່ອປະກອບສ່ວນເຂົ້າໃນ ພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ ແລະ ການເຊື່ອມໂຍງເຂົ້າໃນພາກພື້ນ ແລະ ສາກົນ ຂອງປະເທດເຮົາໃນໄລຍະໃໝ່ ໃຫ້ເຕັມໄປດ້ວຍຜົນສຳເລັດ ອັນສູງເດັ່ນກວ່າເກົ່າ.
ຂອບໃຈຂ່າວຈາກ:
