ສຳນັກຂ່າວຕ່າງປະເທດລາຍງານວ່າ ໃນວັນທີ 26 ສິງຫາຜ່ານມານີ້ ທ່ານ ຈູຊີຈິນ ຜູ້ຈັດການທົ່ວໄປຂອງບໍລິສັດກໍ່ສ້າງທາງລົດໄຟຈີນ ຫລື (CRCC) ປະຈຳພາກພື້ນອາຊີຕາເວັນອອກສຽງໃຕ້ໄດ້ກ່າວວ່າ ຈີນ ແລະ ໄທ ວາງແຜນທີ່ຈະລົງນາມຂໍ້ຕົກລົງລະຫວ່າງລັດຖະບານສອງປະເທດ ໃນໂຄງການກໍ່ສ້າງເສັ້ນທາງລົດໄຟຄວາມໄວສູງ ພາຍໃນຕົ້ນເດືອນກັນຍານີ້ ຫລັງຈາກທີ່ໄດ້ເຈລະຈາກັນມາຫລາຍກ່ວາ 6 ຄັ້ງ ໂດຍໂຄງການດັ່ງກ່າວ ແມ່ນມີກຳນົດສ້າງໃຫ້ສຳເລັດພາຍໃນ 3 ປີ ແລະ ໄດ້ມີການເປີດເຜີຍຄ່າໂດຍສານລະຫວ່າງນະຄອນຄຸນໝິງ ສປ ຈີນ ແລະ ບາງກອກ ປະເທດໄທ ປະມານ 700 ຢວນ ຫລື ປະມານ 841,000 ກີບ ຊຶ່ງຖືກກ່ວາລາຄາປີ້ໂດຍສານເຮືອບິນເຖິງເຄິ່ງໜຶ່ງ.
ທັງນີ້ ຕາມແຜນງານການກໍ່ສ້າງ ເສັ້ນທາງລົດໄຟໄທ – ຈີນ ຈະມີຄວາມຍາວທັງໝົດ 867 ກິໂລແມັດ ແລະ ສາມາດແລ່ນໄດ້ຄວາມໄວສູງສຸດ 180 ກິໂລແມັດຕໍ່ຊົ່ວໂມງ.