ໃນບາງເທື່ອການພິມຂໍ້ຄວາມຍາວໆລົງໂທລະສັບມືຖື ກັບແທັບເລັດ ຈຳເປັນຕ້ອງໃຊ້ຄີບອດ ໃນການພິມເພື່ອຄວາມສະດວກ ວ່ອງໄວ ແລະ ຄ່ອງຕົວກວ່າການພິມແບບໃຊ້ນິ້ວສຳຜັດທີ່ຈໍ ຊຶ່ງບາງທ່ານກໍຊື້ຄີບອດ Bluetooth ທີ່ເຊື່ອມຕໍ່ກັບຄອມພິວເຕີ ມາໃຊ້ເຊື່ອມຕໍ່ກັບມືຖືຫລືແທັບເລັດ ແຕ່ກໍມີຂະໜາດ ໃຫຍ່ ແລະ ແບນ ກິນພື້ນທີ່ຈັດວາງ ຕອນນີ້ LG ເປີດຕົວ ຄີບອດ LG Rolly ທີ່ເຮັດມາໃນລັກສະນະເປັນແທ່ງໄມ້ ມ້ວນໄດ້ ແລ້ວ ແພ່ອອກມາເປັນຄີບອດພ້ອມໃຊ້ງານໄດ້ທັນທີ ແລະສາມາດໃຊ້ປະໂຫຍດໄດ້ຫລາຍກວ່າຄີບອດ Bluetooth ທົ່ວໄປນຳອີກ
ໂດຍລັກສະນະຄີບອດ LG Rolly ນັ້ນເປັນແທ່ງໄມ້ ແຕ່ແພ່ອອກມາຈະກາຍເປັນຄີບອດໄຮ້ສາຍ ສາມາດເຊື່ອມຕໍ່ກັບ ສະມາດໂຟນ ແລະ ແທັບເລັດໄດ້ທັນທີ ໂດຍເມື່ອທຳການແພ່ອອກມາເປັນແຜ່ນຄີບອດແລ້ວຈະເຊື່ອມຕໍ່ກັບ ສະມາດໂຟນ ຫລື ແທັບເລັດ ຜ່ານທາງ Bluetooth ໂດຍອັດຕະໂນມັດ
https://youtu.be/-BOmdKWrBrs
LG Rolly ສາມາດເປັນຂາຕັ້ງສະມາດໂຟນ ແລະ ແທັບເລັດໄດ້ອີກດ້ວຍ ແລະ ຍັງສາມາດເຊື່ອມຕໍ່ກັບ ສະມາດໂຟນ ຫລື ແທັບເລັດອີກເຄື່ອງ ດ້ວຍຟັງຊັ່ນ Dual Pairing ເພື່ອສາມາດພິມງານ 2 ເຄື່ອງພ້ອມໆກັນໄດ້
ດ້ວຍການອອກແບບໃນລັກສະນະມ້ວນເປັນແທ່ງໄມ້ ສະດວກໃນການໃສ່ກະເປົ໋າ ແລະ ພົກພາງ່າຍຫລາຍໆ ສ່ວນແບດເຕີລີ່ນັ້ນໃຊ້ຖ່ານແບບ AAA ຊຶ່ງເມື່ອໃສ່ແລ້ວສາມາດໃຊ້ໄດ້ດົນສູງສຸດ 3 ເດືອນ
ຄີບອດ LG Rolly ຈະເລີ່ມຈຳໜ່າຍໃນເດືອນກັນຍານີ້ ທີ່ ອະເມຣິກາ ຍຸໂຣບ ແລະ ຈຳໜ່າຍໃນຝັ່ງເອເຊຍພາຍໃນປີນີ້ ໂດຍໄລຍະນີ້ LG ຈະກຽມຈັດສະແດງຄີບອດມ້ວນໄດ້ນີ້ ໃນງານ IFA 2015 ທີ່ກຸງເບີລິນ ປະເທດເຍີຣະມັນ 4-9 ກັນຍານີ້