ສຳນັກຂ່າວຕ່າງປະເທດ ລາຍງານໃນວັນທີ 26 ສິງຫາຜ່ານມານີ້ວ່າ ໜ່ວຍກູ້ໄພທາງທະເລຂອງເອີຣົບ ໄດ້ເຂົ້າຊ່ວຍເຫລືອເຮືອຜູ້ອົບພະຍົບລີ້ໄພ ທີ່ລອຍລຳຢູ່ນ່ານນ້ຳທະເລເມດິແຕຣານຽນ ໃກ້ກັບຊາຍຝັ່ງຂອງປະເທດລີບີ ໂດຍສາມາດຊ່ວຍເຫລືອຜູ້ອົບພະຍົບໄດ້ 439 ຄົນ ໃນຂະນະທີ່ພົບສົບຜູ້ເສຍຊີວິດຢູ່ເທິງເຮືອເຖິງ 50 ສົບ ໂດຍຍັງບໍ່ທັນຮູ້ສາເຫດຂອງການຕາຍເທື່ອ.

ທັງນີ້ ຈຳນວນຜູ້ອົບພະຍົບທີ່ລັກລອບອອກຈາກປະເທດລີບີ ເພື່ອຈຸດປະສົງເຂົ້າໄປສູ່ທະວີບເອີຣົບ ໄດ້ສູງຂຶ້ນເລື້ອຍໆໃນໄລຍະຫລາຍເດືອນຜ່ານມາ ເຮັດໃຫ້ເຈົ້າໜ້າທີ່ຂອງສະຫະພາບເອີຣົບລະບຸວ່າ ຕັ້ງແຕ່ເລີ່ມເຂົ້າປີ 2015 ເຖິງດຽວນີ້ ມີຜູ້ອົບພະຍົບປະມານ 250,000 ຄົນ ໄດ້ລັກລອບເຂົ້າມາໃນເອີຣົບ ແລະ ມີຜູ້ອົບພະຍົບຫລາຍກ່ວາ 2,000 ຄົນ ຕ້ອງເສຍຊີວິດ ໃນຂະນະທີ່ຍັງລອຍແພຢູ່ກາງທະເລເມດິແຕຣານຽນ.